കാലിൽ വെടികൊണ്ടതും പിന്നെ മുടന്തൽ; ഒന്ന് നടക്കാൻ പോലും കഴിയാതെ നിന്നതും വാലിൽ തീകൊളുത്തി ക്രൂരത; വേദന കൊണ്ട് പുളഞ്ഞ് നിലത്തുകിടന്ന് ഉരുണ്ട ആ കാട്ടാനയ്ക്ക് സംഭവിച്ചത്

കൊളംബോ: ശ്രീലങ്കയിൽ കാട്ടാനയെ അതിക്രൂരമായി കൊലപ്പെടുത്തിയ സംഭവത്തിൽ മൂന്നുപേരെ പോലീസ് അറസ്റ്റ് ചെയ്തു. ആനയുടെ വാലിൽ തീകൊളുത്തിയതിനൊപ്പം കാലിൽ വെടിയുതിർക്കുകയും ചെയ്തതായാണ് വിവരം. 42-നും 50-നും ഇടയിൽ പ്രായമുള്ള അനുരാധപുര സ്വദേശികളാണ് പിടിയിലായത്. സമൂഹ മാധ്യമങ്ങളിൽ പ്രചരിച്ച സംഭവത്തിന്റെ ദൃശ്യങ്ങൾ വലിയ പ്രതിഷേധങ്ങൾക്ക് വഴിവെച്ചിരുന്നു.

വാലിൽ തീപിടിച്ച് വേദനകൊണ്ട് പുളഞ്ഞ ആന തീ കെടുത്താൻ നിലത്തുകിടന്ന് ഉരുളുന്ന ദൃശ്യങ്ങൾ ഏറെ ദുഃഖകരമാണ്. വനംവകുപ്പ് ഈ വിവരം സ്ഥിരീകരിക്കുകയും, മുൻപും ഇതേ കൊമ്പനാനയെ വേട്ടക്കാർ ഉപദ്രവിച്ചിരുന്നതായും തങ്ങൾ ചികിത്സ നൽകിയിരുന്നതായും അറിയിച്ചു.

ശ്രീലങ്കയിൽ ആനകളെ കൊല്ലുന്നത് വധശിക്ഷ ലഭിക്കാവുന്ന കുറ്റമാണ്. എന്നാൽ, കഴിഞ്ഞ അരനൂറ്റാണ്ടായി രാജ്യത്ത് വധശിക്ഷ നടപ്പാക്കിയിട്ടില്ല. 1976-ലാണ് അവസാനമായി വധശിക്ഷ നടപ്പാക്കിയത്. അതിനാൽ, പ്രതികൾക്ക് ജീവപര്യന്തം തടവ് ലഭിക്കാനാണ് സാധ്യതയെന്ന് റിപ്പോർട്ടുകൾ സൂചിപ്പിക്കുന്നു. അറസ്റ്റിലായവരെ ഡിസംബർ 24 വരെ റിമാൻഡ് ചെയ്തിട്ടുണ്ട്.

ആനകളെ ശ്രീലങ്കയിൽ വളരെ പവിത്രമായി കാണുന്ന മൃഗമാണ്. എന്നിരുന്നാലും, വിളകൾ നശിപ്പിക്കുന്ന വന്യജീവികളെ, പ്രത്യേകിച്ച് ആനകളെ, നാടൻ സ്ഫോടകവസ്തുക്കൾ ഉപയോഗിച്ച് കൊല്ലുന്നത് ശ്രീലങ്കയിൽ സാധാരണമാണ്. ഈ ക്രൂരകൃത്യം ആവർത്തിക്കാതിരിക്കാൻ നടപടിയെടുക്കണമെന്നും കുറ്റവാളികൾക്ക് കടുത്ത ശിക്ഷ ഉറപ്പാക്കണമെന്നും ആവശ്യപ്പെട്ട് കഴിഞ്ഞ ദിവസം സർക്കാരിന് ഒരു നിവേദനം സമർപ്പിച്ചിരുന്നു. ഈ സംഭവം ശ്രീലങ്കയിലെ മനുഷ്യ-വന്യജീവി സംഘർഷങ്ങളുടെ ഗൗരവവും വന്യജീവി സംരക്ഷണ നിയമങ്ങൾ കർശനമായി നടപ്പാക്കേണ്ടതിന്റെ ആവശ്യകതയും വീണ്ടും ഓർമ്മിപ്പിക്കുന്നു.