തലയിൽ പൂച്ചയെ വച്ച് യുവതി എയർപോർട്ടിൽ; എല്ലാം കണ്ട് അമ്പരന്ന് ആളുകൾ; ബാഗേജ് ഫീ ഒഴിവാക്കാൻ ഇവർ കാണിച്ചത്

ടാമ്പ: വിമാനത്താവളത്തിലെ ബാഗേജ് ഫീസ് ഒഴിവാക്കുന്നതിനായി വളർത്തുപൂച്ചയെ തലയിൽ തൊപ്പിപോലെ വെച്ച് സുരക്ഷാ പരിശോധനകളെ അതിജീവിച്ച് കടന്നുപോയ യുവതിയുടെ ദൃശ്യങ്ങൾ സമൂഹ മാധ്യമങ്ങളിൽ തരംഗമായി. അമേരിക്കയിലെ ടാമ്പ വിമാനത്താവളത്തിൽ നിന്നുള്ളതെന്നു കരുതുന്ന ഈ വീഡിയോ ദൂരക്കാഴ്ചയിൽ പൂച്ചയെ ഒരു ഹൈ-ഫാഷൻ രോമത്തൊപ്പിയായി തോന്നിപ്പിക്കുംവിധമായിരുന്നു.

വീഡിയോയിൽ, അതീവ ആത്മവിശ്വാസത്തോടെ നടന്നുപോകുന്ന യുവതിയുടെ തലയിൽ പൂച്ച അനങ്ങാതെയും ശാന്തമായും ഇരിക്കുന്നത് കാണാം. പൂച്ചയുടെ രോമത്തിന്റെ നിറം യുവതിയുടെ വസ്ത്രവുമായി ചേർന്നിരുന്നതിനാൽ, ദൂരെനിന്ന് നോക്കുമ്പോൾ ഇതൊരു ജീവനുള്ള മൃഗമാണെന്ന് പെട്ടെന്ന് തിരിച്ചറിയാൻ സാധിച്ചിരുന്നില്ല. 'എക്സ്' ഉൾപ്പെടെയുള്ള സമൂഹ മാധ്യമങ്ങളിൽ ഈ ദൃശ്യങ്ങൾ അതിവേഗം പ്രചരിക്കുകയും വലിയ ചർച്ചകൾക്ക് വഴിയൊരുക്കുകയും ചെയ്തു.

ഒരു കുപ്പി വെള്ളം പോലും സുരക്ഷാ പരിശോധനകൾ കടത്തിവിടാൻ പ്രയാസമായിരിക്കുന്ന സാഹചര്യത്തിൽ, ഇത്രയും തന്ത്രപരമായി ഒരു ജീവിയെ കടത്തിയ യുവതിയെ പലരും 'ജീനിയസ്' എന്നാണ് വിശേഷിപ്പിച്ചത്. യാത്രകളിൽ സാധാരണയായി അസ്വസ്ഥരാകാറുള്ള പൂച്ച ഇത്രയും സമാധാനത്തോടെ തലയിൽ ഇരുന്നത് പൂച്ച സ്നേഹികളെ അത്ഭുതപ്പെടുത്തി. അതേസമയം, ഇത് അനുകരിക്കാൻ ശ്രമിക്കുന്നവർക്ക് മുന്നറിയിപ്പുമായി ചിലർ രംഗത്തെത്തിയിട്ടുണ്ട്. സ്വന്തം പൂച്ചയെ കുറച്ചധികം നേരം കൈയ്യിൽ പിടിച്ചാൽ പോലും മാന്താൻ സാധ്യതയുള്ളവർക്ക് ഈ 'പൂച്ചത്തൊപ്പി' വിദ്യ ഒരു സ്വപ്നം മാത്രമായിരിക്കുമെന്നും അവർ ചൂണ്ടിക്കാട്ടി.