അണക്കെട്ടുകളിൽ ജലനിരപ്പ് ഉയരുന്നു; ആമിറാത്തിലുള്ള ഓടകൾ എല്ലാം നിറഞ്ഞൊഴുകി; ഒമാനിൽ കനത്ത മഴ തുടരുന്നു; പൊതുജനങ്ങൾക്ക് മുന്നറിയിപ്പ് നൽകി അധികൃതർ

മസ്കറ്റ്: ഒമാനിലെ മസ്കത്ത് ഗവർണറേറ്റിൽ കനത്ത മഴ തുടരുന്നു. സീബ്, ആമിറാത്ത് വിലായത്തുകൾ ഉൾപ്പെടെയുള്ള നിരവധി പ്രദേശങ്ങളിലെ വാദികളും ഓടകളും നിറഞ്ഞൊഴുകി. മഴ ശക്തമായി തുടരുന്ന സാഹചര്യത്തിൽ താഴ്ന്ന പ്രദേശങ്ങളും വാദികളും ഒഴിവാക്കണമെന്ന് അധികൃതർ പൊതുജനങ്ങൾക്ക് കർശന മുന്നറിയിപ്പ് നൽകി.

മിതമായ കാറ്റോടു കൂടിയ ശക്തമായ മഴ ജനജീവിതത്തെ കാര്യമായി ബാധിച്ചു. സീബ് വിലായത്തിലെ അൽ ഖൗദ്, അൽ ഹൈൽ (തെക്ക്, വടക്ക്), അൽ മബീല (തെക്ക്, വടക്ക്), സൂർ ആൽ ഹദീദ്, അൽ ബനൂദ്, ഹല്ലത് അൽ സൂഖ്, അൽ മൗലിഹ് (തെക്ക്, വടക്ക്), വിമാനത്താവള ഉയർന്ന പ്രദേശങ്ങൾ എന്നിവിടങ്ങളിലാണ് മഴ ഏറ്റവും കൂടുതൽ ലഭിച്ചത്. ഈ പ്രദേശങ്ങളിലെ നിരവധി ഓടകൾ കരകവിഞ്ഞൊഴുകി.

ആമിറാത്ത് വിലായത്തിലും വിവിധ തീവ്രതകളിൽ മഴ രേഖപ്പെടുത്തി. നഹ്ദ, അൽ ഹാജിർ, സൈഹ് അൽ ധബി, ആമിറാത്ത് ഉയർന്ന പ്രദേശങ്ങൾ, അൽ ബജ്റിയ, അൽ ജഫൈന, അൽ ദഖൽ, വാദി അൽ സറീൻ, വാദി അൽ മൈഹ് തുടങ്ങിയ ഗ്രാമങ്ങളിലൂടെ ഒഴുകുന്ന വാദികളും ഓടകളും നിറഞ്ഞൊഴുകി. മഴയെ തുടർന്ന് വാദി അൽ സറീൻ, ആമിറാത്ത്, അൽ ജഫൈന എന്നിവിടങ്ങളിലെ അണക്കെട്ടുകളിൽ ജലനിരപ്പ് ഉയർന്നതായും അധികൃതർ അറിയിച്ചു. അടിയന്തര സാഹചര്യങ്ങൾ നേരിടാനും പൊതുജനങ്ങളുടെ സുരക്ഷ ഉറപ്പാക്കാനും അധികൃതർ ജാഗ്രതയോടെ പ്രവർത്തിക്കുന്നുണ്ട്.