തിരഞ്ഞെടുപ്പ് യുദ്ധം ജയിച്ചിട്ടും ഡികെയും സിദ്ധയും രണ്ടറ്റത്ത് നിന്നത് പ്രതിസന്ധിയായി; രണ്ടു കരുത്തരേയും വശങ്ങളിലിരുത്തിയുള്ള അന്നത്തെ പ്രാതല്‍ സര്‍ക്കാരായി; രണ്ടര കൊല്ലം കഴിയുമ്പോഴും 'ഡികെ'യെ അനുനയിപ്പിച്ചത് 'ബ്രേക്ക്ഫാസ്റ്റ്' നയതന്ത്രം; കര്‍ണ്ണാടകയില്‍ കെസി തന്ത്രത്തില്‍ മൃതസജ്ഞീവിനി; ആ പ്രതിസന്ധിയൊഴിഞ്ഞത് ഇങ്ങനെ
തിരഞ്ഞെടുപ്പ് യുദ്ധം ജയിച്ചിട്ടും ഡികെയും സിദ്ധയും രണ്ടറ്റ് നിന്നത് പ്രതിസന്ധിയായി
ബംഗ്ലൂരു: കര്‍ണ്ണാടകയില്‍ 'ഡികെ'യെ അനുനയിപ്പിച്ചത് ''ബ്രേക്ക്ഫാസ്റ്റ്'' നയതന്ത്രം. 2023 ലെ കര്‍ണ്ണാടക നിയമസഭയിലെ തെരഞ്ഞെടുപ്പ് വിജയത്തിന് തെട്ടുപിന്നാലെ ഉടലെടുത്ത മുഖ്യമന്ത്രി സ്ഥാനാര്‍ത്ഥി തര്‍ക്കം രമ്യമായി പരിഹരിച്ചതും ഇത്തരത്തിലൊരു ബ്രേക്ക് ഫാസ്റ്റായിരുന്നു. കര്‍ണ്ണാടകയിലെ പ്രതിസന്ധിയ്ക്ക് പ്രാതല്‍ ഭക്ഷണ സൗഹൃദമെന്ന മാജിക് അന്ന് മുമ്പോട്ട് വച്ചത് കെസിയെന്ന ഹൈക്കമാണ്ടിലെ കരുത്തനായിരുന്നു. വീണ്ടും ബംഗ്ലൂരില്‍ കെസി വേണുഗോപാല്‍ എംപിയുടെ സമയോചിതമായ കരുനീക്കങ്ങളാണ് മഞ്ഞുരുക്കലുണ്ടാക്കിയതെന്നാണ് സൂചന. 2023ല്‍ രാഹുല്‍ ഗാന്ധിയുടെ നിര്‍ദ്ദേശ പ്രകാരം ദൗത്യമേറ്റെടുത്ത വേണുഗോപാല്‍ ഡി.കെ.ശിവകുമാറിനോടും സിദ്ധരാമയ്യയോടും ആശയവിനിമയം നടത്തി, വന്‍ഭൂരിപക്ഷത്തോടെ ബിജെപിക്കെതിരെ നേടിയ വിജയത്തിന്റെ ശോഭ കെടുത്തുന്ന നീക്കത്തെ തകര്‍ത്തു. അത് വീണ്ടും നടന്നു 2025 നവംബറിലും.
കര്‍ണ്ണാടകയിലും ഡല്‍ഹിയും രാവും പകലും നീളുന്ന ചര്‍ച്ചകള്‍.ഒടുവില്‍ മഞ്ഞുരുക്കം. നയതന്ത്ര ഇടപെടലില്‍ ഭക്ഷണത്തിന് പ്രാധാന്യം തിരിച്ചറിഞ്ഞ കെസി ഇരുവരേയും തന്റെ വസതിയിലേക്ക് വിളിച്ച് പ്രഭാതഭക്ഷണം നല്‍കിയാണ് 2023ലെ പ്രതിസന്ധിയ്ക്ക് പരിഹാരം കണ്ടത്. കെ.സി.ക്ക് ഇരുവശവും സൗഹൃദം പങ്കിട്ട് ഭക്ഷണം കഴിക്കുന്ന ആ ചിത്രം ഇന്നും ജനങ്ങളുടെ മനസ്സിലുണ്ട്. കര്‍ണ്ണാടകയിലെ കോണ്‍ഗ്രസ് സര്‍ക്കാരിനെ 2023ല്‍ രക്ഷിച്ചത് ഈ പ്രാതല്‍ സൗഹൃദ സംഭാഷണമായിരുന്നു. ഇന്ന് വീണ്ടും കര്‍ണ്ണാടക കോണ്‍ഗ്രസിനും സര്‍ക്കാരിനും മേല്‍ കാര്‍മേഘങ്ങള്‍ ഉരുണ്ടുകൂടിയപ്പോഴും കെസിയുടെ പഴയ തന്ത്രം വീണ്ടും ഹൈക്കമാണ്ടിനെ തുണച്ചു.
നേതൃമാറ്റം എന്ന ആശയം കര്‍ണ്ണാടകയിലും അവിടെന്ന് ഡല്‍ഹിയിലേക്ക് നീണ്ടപ്പോഴും പക്വതയോടെയാണ് ഹൈക്കമാന്‍ഡ് പ്രതികരിച്ചത്. ഡി.കെ.യെ അനുകൂലിക്കുന്ന ചില എം.എല്‍.എ.മാര്‍ ഡല്‍ഹിയിലെത്തിയതും തുടര്‍ന്ന് നേതൃമാറ്റമെന്ന ആവശ്യത്തിന് ശക്തിപ്രാപിച്ചപ്പോഴും രാഷ്ട്രീയ മുതലെടുപ്പിനുള്ള അവസരമായി ബിജെപി അതിനെ കണ്ടു. എന്നാലതിന് അവര്‍ക്ക് അവസരം നല്‍കാതെ പ്രതിസന്ധി പരിഹരിക്കപ്പെട്ടു.രാഹുല്‍ ഗാന്ധിയുടെ നിര്‍ദ്ദേശ പ്രകാരമുള്ള കെസിയുടെ ചടുലമായ നീക്കങ്ങളും ഇടപെടലും ഇപ്പോഴും ഉണ്ടായി എന്നതാണഅ വസ്തുത. അനുരജ്ഞന ചര്‍ച്ചകള്‍ക്ക് കെസി വേണുഗോപാലിനെ നിയോഗിക്കാന്‍ കര്‍ണ്ണാടകയില്‍ നിന്നുള്ള എഐസിസി അധ്യക്ഷന്‍ മല്ലികാര്‍ജ്ജുന്‍ ഖാര്‍ഗെയ്ക്കും രണ്ടാമതൊന്ന് അലോചിക്കേണ്ടി വന്നില്ല.
കര്‍ണ്ണാടക രാഷ്ട്രീയത്തിലെ ശക്തിദുര്‍ഗങ്ങളായ സിദ്ധരാമയ്യയോടും ഡികെ ശിവകുമാറിനോടും വ്യക്തിബന്ധം പുലര്‍ത്തുന്ന വേണുഗോപാല്‍ വീണ്ടും ദൗത്യം നിറവേറ്റിയെന്നാണ് ഡല്‍ഹിയില്‍ നിന്നുള്ള റിപ്പോര്‍ട്ട്. കഴിഞ്ഞ രണ്ടുദിവസമായി ഫോണില്‍ ഇരു നേതാക്കളുമായും ആശയവിനിമയം നടത്തുകയും പ്രശ്‌നപരിഹാരത്തിനായി ഹൈക്കമാന്‍ഡിന്റെ നിര്‍ദേശങ്ങള്‍ കെ.സി. ഇരുവര്‍ക്കും കൈമാറുകയും ചെയ്തു. ഇരുവരും പരസ്പരം കൂടിക്കാഴ്ച നടത്തി തര്‍ക്കരഹിതമായി സര്‍ക്കാരിനെ മുന്നോട്ട് കൊണ്ടുപോകേണ്ടതിന്റെ പ്രാധാന്യം കെസി അവരെ ധരിപ്പിച്ചു.
കെസിയെ തള്ളാനോ, അദ്ദേഹത്തിന്റെ നിര്‍ദ്ദേശം നിരസ്സിക്കാനോ കഴിയാതെ ധര്‍മ്മസങ്കടത്തിലായ ഇരുനേതാക്കളും മഞ്ഞുരുക്കുന്നതിന് വാതിലുകള്‍ തുറന്നിട്ടുവെന്നാണ് കോണ്‍ഗ്രസിനുള്ളിലെ സംസാരം. ഡി.കെ.യെ പ്രഭാതഭക്ഷണത്തിനു ക്ഷണിക്കാന്‍ സിദ്ധരാമയ്യയോട് കെസി ആവശ്യപ്പെടുകയായിരുന്നു. ഇനി സമയക്കുറവുണ്ടെങ്കില്‍ ഉച്ചഭക്ഷണം ഡി.കെ.യുടെ വീട്ടിലാക്കാന്‍ സിദ്ധരാമയ്യ ക്കും കെ.സി. നിര്‍ദേശം നല്‍കി. ഇതിനിടെ കര്‍ണ്ണാടകയിലെ ഓരോ നീക്കങ്ങളും കെസി ഡല്‍ഹിയിലെ കോണ്‍ഗ്രസ് നേതൃത്വത്തെ അറിയിച്ചു കൊണ്ടിരുന്നു. അവിടിന്നുള്ള നിര്‍ദ്ദേശങ്ങള്‍ കൂടി ഉള്‍ക്കൊണ്ട് കെസി കരുനീക്കങ്ങള്‍ വേഗത്തിലാക്കി.
നേതാക്കള്‍ക്കിടയിലെ ഭിന്നതമുതലാക്കി രാഷ്ട്രീയ നേട്ടം കൊയ്യാമെന്ന് കരുതിയ ബിജെപിയേയും ചില മാധ്യമങ്ങളെയും നിരാശരാക്കി സിദ്ധരാമയ്യയുടെ ഫോണ്‍ ഡികെ ശിവകുമാറിനെത്തി. രാവിലെ തന്റെ വീട്ടില്‍ കാവേരിയില്‍ ഒരുമിച്ച് പ്രഭാതഭക്ഷണം, അതിനു ശേഷം മാധ്യമങ്ങളെ കാണാം. ഇതായിരുന്നു സന്ദേശം. സിദ്ധരാമയ്യയുടെ വീട്ടിലെത്തിയ ഡികെ ഊഷ്മളമായ സൗഹൃദം പങ്കിട്ടശേഷം, ഒരുമിച്ചുള്ള പ്രാതലിന് പിന്നാലെ ഇരുവരും മാധ്യമങ്ങളെ കണ്ട് ഹൈക്കമാന്‍ഡിന്റെ നിര്‍ദേശങ്ങള്‍ ശിരസ്സാവഹിക്കുമെന്ന് അറിയിച്ചു. കോണ്‍ഗ്രസിനെ ദുര്‍ബലപ്പെടുത്താനില്ലെന്നും ഒറ്റക്കെട്ടായി മുന്നോട്ട് പോകുമെന്നും ഇരുവരും നിലപാട് വ്യക്തമാക്കിയാതോടെ കുറഞ്ഞ് ദിവസമായി നിലനിന്ന സംഘര്‍ഭരിതമായ അന്തരീക്ഷത്തിനും അനിശ്ചിത്വത്തിനും അഭ്യൂവങ്ങള്‍ക്കും പൂര്‍ണ്ണ വിരമമായി.
ഒരു സര്‍ക്കാരിന്റെ അടിവേര് അറുക്കുന്ന തര്‍ക്കം ലളിതമായി പരിഹരിച്ച ആശ്വാസത്തിലാണ് കെസി. പ്രതിസന്ധികളില്‍ കോണ്‍ഗ്രസിന്റെ മൃതസജ്ഞീവിനി കൂടി ആവുകയാണ് കര്‍ണ്ണാടകയിലെ പ്രശ്ന പരിഹാരം. പ്രാതല്‍ നയതന്ത്രം ഫലം കണ്ടില്ലെങ്കില്‍ കോണ്‍ഗ്രസിന് അധികാരം പോലും നഷ്ടമാകുമായിരുന്നു. കര്‍ണ്ണാടകയില്‍ മുഖ്യമന്ത്രിയും ഉപമുഖ്യമന്ത്രിയും തമ്മില്‍ യുദ്ധം നടക്കുന്നുയെന്ന മാധ്യമ വാര്‍ത്തകള്‍ സത്യമതല്ല. അവരിരുവരും നല്ല സൗഹൃദത്തിലാണ്. രാവിലെ സിദ്ധരാമയ്യയും ഡി.കെ ശിവകുമാറും പരസ്പരം കാണുകയും ഒരുമിച്ച് പ്രാതല്‍ കഴിക്കുകയും ചെയ്തു.ഇതൊന്നും മാധ്യമങ്ങള്‍ കണ്ടില്ലെ? എന്തെങ്കിലും ആവശ്യമായ നടപടിയെടുക്കണമെങ്കില്‍ അതാത് സമയത്ത് കോണ്‍ഗ്രസ് ഹൈക്കമാന്‍ഡ് എടുക്കുമെന്നും മാധ്യമങ്ങളെ അറിയിക്കുകയും ചെയ്തു.
