'കാര്‍ട്ടല്‍ ഡെ ലോസ് സോളെസ്' എന്ന ക്രിമിനല്‍ ശൃംഖലയെ നയിക്കുകയും സംരക്ഷിക്കുകയും ചെയ്യുന്നത് വെനസ്വേല പ്രസിഡന്റ്; ആ രാജ്യത്തിന്റെ വ്യോമപാത അടച്ചതായി പ്രഖ്യാപിച്ച് അമേരിക്കന്‍ പ്രസിഡന്റ്; കരീബിയന്‍ രാജ്യത്തിനെതിരെ നിലപാട് കടുപ്പിച്ച് ട്രംപ്; സൈനിക വിന്യാസം നല്‍കുന്നത് യുദ്ധ സൂചന
ട്രെനിഡാഡ്: വെനസ്വേലക്കെതിരെ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് നിലപാട് കടുപ്പിക്കുന്നു. കരീബിയന്‍ രാജ്യത്തിന്റെ വ്യോമാതിര്‍ത്തി പൂര്‍ണ്ണമായും അടച്ചതായി പ്രഖ്യാപിച്ച ട്രംപ്, സൈനിക നീക്കങ്ങള്‍ ശക്തമാക്കി. യുദ്ധക്കപ്പലുകളും വിമാനങ്ങളും സൈനിക ഉദ്യോഗസ്ഥരും മേഖലയില്‍ നിലയുറപ്പിച്ചതോടെ, വലിയൊരു സൈനിക നടപടിക്കുള്ള സാധ്യതകള്‍ വര്‍ധിച്ചുവെന്ന ആശങ്ക ശക്തമായി.
ട്രൂത്ത് സോഷ്യല്‍ പ്ലാറ്റ്ഫോമിലൂടെയാണ് ട്രംപിന്റെ ഈ നിര്‍ണായക പ്രഖ്യാപനം വന്നത്. എയര്‍ലൈനുകള്‍, പൈലറ്റുമാര്‍, മയക്കുമരുന്ന് കടത്തുകാര്‍, മനുഷ്യക്കടത്തുകാര്‍ എന്നിവര്‍ വെനസ്വേലന്‍ വ്യോമാതിര്‍ത്തിയില്‍ നിന്ന് പൂര്‍ണ്ണമായും വിട്ടുനില്‍ക്കണമെന്ന് കര്‍ശന നിര്‍ദേശം നല്‍കി. കഴിഞ്ഞ ഏതാനും മാസങ്ങളായി യുദ്ധക്കപ്പലുകളും സൈനിക വിമാനങ്ങളും ഉള്‍പ്പെടെയുള്ള സൈനിക വിന്യാസം വെനസ്വേലന്‍ അതിര്‍ത്തിക്ക് സമീപം തുടരുകയാണ്. തെക്കേ അമേരിക്കന്‍ രാജ്യത്ത് നിന്ന് 500 മൈലുകള്‍ക്കപ്പുറമുള്ള പ്യൂര്‍ട്ടോ റിക്കോയില്‍ സൈനികരെ വിന്യസിച്ചിട്ടുണ്ട്. ട്രംപിന്റെ സൈനിക ഉപദേഷ്ടാവ് ജനറല്‍ ഡാന്‍ കെയ്ന്‍ ഈ മേഖല സന്ദര്‍ശിച്ചത് കാര്യങ്ങള്‍ കൂടുതല്‍ സങ്കീര്‍ണ്ണമാക്കി. തങ്ങളുടെ ഓപ്പറേഷന്‍ ഒരു 'പുതിയ ഘട്ടത്തിലേക്ക്' പ്രവേശിക്കുകയാണെന്ന് യുഎസ് ഉദ്യോഗസ്ഥര്‍ മുന്നറിയിപ്പ് നല്‍കിയിരുന്നു.
വെനസ്വേലന്‍ പ്രസിഡന്റ് നിക്കോളാസ് മഡുറോ 'കാര്‍ട്ടല്‍ ഡെ ലോസ് സോളെസ്' എന്ന ക്രിമിനല്‍ ശൃംഖലയെ നയിക്കുകയും സംരക്ഷിക്കുകയും ചെയ്യുന്നുവെന്ന് ട്രംപ് ഭരണകൂടം ശക്തമായി ആരോപിക്കുന്നു. ഈ നീക്കങ്ങള്‍ക്കെല്ലാം പിന്നില്‍ മഡുറോയെ ഒറ്റപ്പെടുത്താനുള്ള ശ്രമങ്ങളാണെന്ന് വ്യക്തം. ട്രംപിന്റെ പ്രഖ്യാപനത്തിന് തൊട്ടുമുമ്പ്, നിക്കോളാസ് മഡുറോയുമായി ട്രംപ് ചര്‍ച്ച നടത്തിയെന്ന് ന്യൂയോര്‍ക്ക് ടൈംസ് റിപ്പോര്‍ട്ട് ചെയ്തിരുന്നു. സ്റ്റേറ്റ് സെക്രട്ടറി മാര്‍ക്കോ റൂബിയോയും പങ്കെടുത്ത ഈ സംഭാഷണത്തില്‍ ഇരുനേതാക്കളും തമ്മിലുള്ള കൂടിക്കാഴ്ചയ്ക്ക് സാധ്യതയും മുന്നോട്ട് വെച്ചു. എന്നാല്‍, നിലവില്‍ അത്തരമൊരു കൂടിക്കാഴ്ചയ്ക്ക് വ്യക്തമായ പദ്ധതികളൊന്നും തീരുമാനിച്ചിട്ടില്ലെന്നും റിപ്പോര്‍ട്ടുകള്‍ പറയുന്നു.
ഈ നിര്‍ണായക ഘട്ടത്തില്‍, ട്രംപിന്റെ ഭരണപരമായ തീരുമാനങ്ങള്‍ എത്രത്തോളം വിജയകരമാകുമെന്നത് ലോകം ഉറ്റുനോക്കുകയാണ്. മഡുറോ ഭരണകൂടത്തിനെതിരായ കടുത്ത ആരോപണങ്ങള്‍ നിലനില്‍ക്കുമ്പോഴും, സൈനിക നടപടിയിലേക്ക് നീങ്ങുന്നത് മേഖലയില്‍ അപ്രതീക്ഷിത സംഘര്‍ഷങ്ങള്‍ക്ക് വഴിയൊരുക്കുമോ എന്ന ആശങ്ക അന്താരാഷ്ട്ര സമൂഹത്തില്‍ ശക്തമാണ്. ലഹരികടത്ത് ആരോപിച്ച് വെനസ്വേലയ്‌ക്കെതിരെ സൈനികനടപടിയുണ്ടാകുമെന്ന ഭീഷണിക്കു പിന്നാലെയാണു വ്യോമമേഖല അടച്ചതായി കണക്കാക്കാന്‍ രാജ്യാന്തര വിമാനക്കമ്പനികളോട് ട്രംപ് ആവശ്യപ്പെട്ടത്. സാധാരണനിലയില്‍ അതതു രാജ്യം തന്നെയാണു വ്യോമമേഖല അടച്ചതായി പ്രഖ്യാപിക്കുക.
വെനിസ്വേലന്‍ വ്യോമാതിര്‍ത്തി ഒഴിവാക്കാന്‍ വിമാനക്കമ്പനികള്‍, പൈലറ്റുമാര്‍ എന്നിവര്‍ക്കാണ് ട്രംപ് നിര്‍ദേശം നല്‍കിയത്. ''ദയവായി വെനിസ്വേലയ്ക്കു മുകളിലുള്ളതും ചുറ്റുമുള്ളതുമായ വ്യോമാതിര്‍ത്തി പൂര്‍ണ്ണമായും അടച്ചിടുന്നത് പരിഗണിക്കുക'' ട്രംപ് സമൂഹമാധ്യമമായ ട്രൂത്ത് സോഷ്യലില്‍ എഴുതി. വെനസ്വേലന്‍ പ്രസിഡന്റ് നിക്കോളാസ് മഡുറോയെ അധികാരത്തില്‍ നിന്ന് പുറത്താക്കാനുള്ള ശ്രമങ്ങള്‍ ട്രംപ് ഭരണകൂടം ശക്തമാക്കുന്നതിനിടെയാണ് വ്യോമപാത അടച്ചുകൊണ്ടുള്ള പുതിയ പ്രഖ്യാപനം. ട്രംപിന്റെ നിര്‍ദ്ദേശത്തെ വെനസ്വേലയുടെ വിദേശകാര്യ മന്ത്രി അപലപിച്ചു. നീക്കം കൊളോണിയലിസ്റ്റ് ഭീഷണിയാണെന്നും വെനസ്വേലയിലെ ജനങ്ങള്‍ക്കെതിരായ അതിരുകടന്നതും നിയമവിരുദ്ധവുമായ ആക്രമണത്തെ നീതീകരിക്കാനാവില്ലെന്നും അദ്ദേഹം വിശേഷിപ്പിച്ചു.
വെനസ്വേലയ്ക്കു മുകളിലൂടെ പറക്കുന്നത് അപകടകരമാണെന്നു കഴിഞ്ഞയാഴ്ച അമേരിക്കന്‍ വിമാനക്കമ്പനികള്‍ക്കു ട്രംപ് ഭരണകൂടം മുന്നറിയിപ്പു നല്‍കിയിരുന്നു. ഇതെത്തുടര്‍ന്ന് സര്‍വീസ് നിര്‍ത്തിയ 6 പ്രമുഖ അമേരിക്കന്‍ വിമാനക്കമ്പനികളുടെ അംഗീകാരം വെനസ്വേല പിന്‍വലിക്കുകയും ചെയ്തു. വെനസ്വേല സര്‍ക്കാരിന്റെ പിന്തുണയോടെയാണ് യുഎസിലേക്ക് ലഹരികടത്ത് എന്നാണ് ട്രംപിന്റെ ആരോപണം. ഇത് വെനസ്വേല നിഷേധിച്ചിരുന്നു. 2019 മുതല്‍ വെനിസ്വേലയിലേക്കുള്ള യുഎസ് കാര്‍ഗോ വിമാനങ്ങളുടെ സഞ്ചാരം നിര്‍ത്തിവച്ചിട്ടുണ്ട്.
