ട്രംപുമായുള്ള ഉച്ചകോടിക്ക് തൊട്ടുമുമ്പ് വരെ പരമാവധി നേട്ടം കൊയ്യാന്‍ ഉറച്ച് പുടിന്; അലാസ്‌കയിലേക്ക് റഷ്യന്‍ പ്രസിഡന്റ് പറക്കുന്നതിന് മോടി കൂട്ടാന്‍ യുക്രെയിനില്‍ മിന്നലാക്രമണം; രണ്ടുനാള്‍ കൊണ്ട് 10 കിലോമീറ്ററിലേറെ ഭൂപ്രദേശം പിടിച്ചെടുത്തു; റഷ്യന്‍ പടയാളികളെ തുരത്താന്‍ സകല അടവും പയറ്റി യുക്രെയിന്‍ സേനയും
യുക്രെയ്‌നില്‍ റഷ്യയുടെ മിന്നലാക്രമണം
കീവ്: യുഎസ് പ്രസിഡന്റ് ഡൊണാള്‍ഡ് ട്രംപും റഷ്യന്‍ പ്രസിഡന്റ് വ്‌ലാഡിമിര്‍ പുടിനും തമ്മിലുള്ള അലാസ്‌കയിലെ നിര്‍ണായക ഉച്ചകോടിക്ക് ദിവസങ്ങള്‍ മാത്രം ശേഷിക്കെ, യുക്രെയ്ന്‍ യുദ്ധമുന്നണിയില്‍ നിര്‍ണായക മുന്നേറ്റം നടത്തി റഷ്യന്‍ സൈന്യം. കിഴക്കന്‍ മേഖലയില്‍ മിന്നലാക്രമണം നടത്തിയ റഷ്യ, രണ്ടുദിവസം കൊണ്ട് 10 കിലോമീറ്ററിലേറെ (ആറ് മൈല്‍) ഭൂപ്രദേശം പിടിച്ചെടുത്തതായാണ് റിപ്പോര്‍ട്ട്.
ഡ്‌നിപ്രോ നദിക്ക് പടിഞ്ഞാറ് സ്ഥിതി ചെയ്യുന്ന പോക്രോവ് പട്ടണം ലക്ഷ്യമാക്കി ഏകദേശം 1,10,000 റഷ്യന്‍ സൈനികര്‍ മുന്നേറുകയാണെന്ന് യുക്രെയ്ന്‍ സൈന്യം വിലയിരുത്തുന്നു. ഇത് വ്‌ലാഡിമിര്‍ പുടിന് യുദ്ധത്തില്‍ വലിയ നേട്ടമായേക്കാവുന്ന ഒരു മുന്നേറ്റമായാണ് കണക്കാക്കപ്പെടുന്നത്.
അംഗസംഖ്യ കൂടുതലുള്ള ശത്രുസൈന്യത്തിനെതിരെ കനത്ത ചെറുത്തുനില്‍പ്പിലാണ് തങ്ങളെന്ന് യുക്രെയ്ന്‍ സായുധ സേന മേധാവി ടലിഗ്രാമില്‍ അറിയിച്ചു. 'വളരെ ദുര്‍ഘടമായ സാഹചര്യമാണെങ്കിലും, പ്രതിരോധ സേന ശത്രുസംഘങ്ങളെ കണ്ടെത്തി നശിപ്പിക്കാന്‍ ആവശ്യമായ എല്ലാ നടപടികളും സ്വീകരിക്കുന്നുണ്ട്,' പ്രസ്താവനയില്‍ പറയുന്നു. റഷ്യന്‍ മുന്നേറ്റം തടയുന്നതിനായി പ്രത്യേക സേനാ യൂണിറ്റുകളെ ഈ മേഖലയിലേക്ക് അയച്ചതായും കീവ് വ്യക്തമാക്കി.
വെള്ളിയാഴ്ച അലാസ്‌കയില്‍ വെച്ചാണ് ട്രംപും പുടിനും തമ്മിലുള്ള കൂടിക്കാഴ്ച നടക്കുന്നത്. മൂന്ന് വര്‍ഷമായി തുടരുന്ന യുദ്ധം അവസാനിപ്പിക്കുന്നത് സംബന്ധിച്ച ചര്‍ച്ചകള്‍ക്കായാണ് ഈ ഉച്ചകോടി. 2021-ന് ശേഷം ഒരു യുഎസ്, റഷ്യന്‍ പ്രസിഡന്റുമാര്‍ തമ്മില്‍ നടക്കുന്ന ആദ്യ കൂടിക്കാഴ്ചയാണിത്. ഉച്ചകോടിക്ക് മുന്‍പ് പരമാവധി ഭൂപ്രദേശം കൈവശപ്പെടുത്തി ചര്‍ച്ചകളില്‍ മേല്‍ക്കൈ നേടാനാണ് പുടിന് ശ്രമിക്കുന്നതെന്ന വിലയിരുത്തലുകള്‍ക്ക് ശക്തി പകരുന്നതാണ് ഈ സൈനിക നീക്കം.
യുക്രെയ്ന്‍ സൈന്യവുമായി അടുത്ത ബന്ധമുള്ള 'ഡീപ്സ്റ്റേറ്റ്' എന്ന നിരീക്ഷണ സംഘം പുറത്തുവിട്ട ഭൂപടമാണ് റഷ്യന്‍ മുന്നേറ്റത്തിന്റെ വ്യാപ്തി വ്യക്തമാക്കുന്നത്.
റഷ്യന്‍ സൈന്യത്തിന്റെ ഈ മുന്നേറ്റം, അലാസ്‌കയില്‍ നടക്കാനിരിക്കുന്ന ഉന്നതതല ചര്‍ച്ചകളുടെ പ്രാധാന്യം വര്‍ദ്ധിപ്പിക്കുകയും യുദ്ധത്തിന്റെ ഗതിയെ നിര്‍ണായകമായി സ്വാധീനിക്കുകയും ചെയ്‌തേക്കാം.
