'നിതിന് രാജിന്റെ മരണം അത്യന്തം വേദനയുളവാക്കുന്നത്; മാപ്പര്ഹിക്കാത്ത കുറ്റം; ഉത്തരവാദികളെ വെറുതെ വിടില്ല'; അംബേദ്കര് ജയന്തിയില് ജാതീയ വിവേചനങ്ങള്ക്കെതിരെ മുഖ്യമന്ത്രി; ക്യാമ്പസുകളില് 'രോഹിത് വെമുല ആക്റ്റ്' വേണമെന്നും ആവശ്യം
നിതിന് രാജിന്റെ മരണം അത്യന്തം വേദനയുളവാക്കുന്നത്
തിരുവനന്തപുരം: രാജ്യത്ത് വര്ധിച്ചുവരുന്ന ജാതീയ വിവേചനങ്ങള്ക്കെതിരെയും ക്യാമ്പസുകളിലെ പാര്ശ്വവല്ക്കരണത്തിനെതിരെയും ശക്തമായ താക്കീതുമായി മുഖ്യമന്ത്രി പിണറായി വിജയന്. ഭരണഘടനാ ശില്പി ഡോ. ബി.ആര്. അംബേദ്കറുടെ ജന്മദിനത്തില് പുറപ്പെടുവിച്ച സന്ദേശത്തില്, കണ്ണൂര് അഞ്ചരക്കണ്ടി ഡെന്റല് കോളേജ് വിദ്യാര്ത്ഥി നിതിന് രാജിന്റെ ആത്മഹത്യയെ പരാമര്ശിച്ചാണ് മുഖ്യമന്ത്രി നിലപാട് വ്യക്തമാക്കിയത്. പുരോഗമന കേരളത്തിന് ഇത്തരം വാര്ത്തകള് ഒട്ടും ഭൂഷണമല്ലെന്ന് അദ്ദേഹം ഓര്മ്മിപ്പിച്ചു.
നിതിന് രാജിന്റെ മരണം: കേരളത്തിന് തീരാക്കളങ്കം
അഞ്ചരക്കണ്ടി സ്വകാര്യ മെഡിക്കല് കോളേജിലെ ഒന്നാം വര്ഷ ബി.ഡി.എസ് വിദ്യാര്ത്ഥിയായിരുന്ന നിതിന് രാജിനെ മരണത്തിലേക്ക് തള്ളിവിട്ട സാഹചര്യം കേരളത്തെ നടുക്കുന്നതാണെന്ന് മുഖ്യമന്ത്രി പറഞ്ഞു. മിടുക്കനായ ഒരു വിദ്യാര്ത്ഥിയുടെ ജീവന് നഷ്ടപ്പെട്ടത് ജാതീയത കാരണമാണെങ്കില് അതിന് ഉത്തരവാദികളായവര് മാപ്പര്ഹിക്കുന്നില്ലെന്ന് മുഖ്യമന്ത്രി വ്യക്തമാക്കി.
കേരളം ആര്ജിച്ച സാമൂഹിക മൂല്യങ്ങള് കൈമോശം വരുന്നുണ്ടോ എന്ന് സ്വയം പരിശോധിക്കേണ്ട സമയമാണിതെന്ന് അദ്ദേഹം ഓര്മ്മിപ്പിച്ചു. നിതിന് രാജിന്റെ കുടുംബത്തിനൊപ്പം കേരളമാകെ അണിനിരക്കണമെന്നും അദ്ദേഹം ആഹ്വാനം ചെയ്തു.
രോഹിത് വെമുല ആക്റ്റും കേന്ദ്ര നയങ്ങളും
ക്യാമ്പസുകളിലെ വിവേചനം അവസാനിപ്പിക്കാന് നിയമനിര്മ്മാണം വേണമെന്ന ദീര്ഘകാല ആവശ്യത്തെ കേന്ദ്ര സര്ക്കാര് അവഗണിക്കുകയാണെന്ന് മുഖ്യമന്ത്രി കുറ്റപ്പെടുത്തി. രോഹിത് വെമുല ആക്റ്റിന് പകരമായി കൊണ്ടുവന്ന യു.ജി.സി മാര്ഗനിര്ദ്ദേശങ്ങള് സുപ്രീം കോടതി മരവിപ്പിച്ചത് ചൂണ്ടിക്കാട്ടിയ അദ്ദേഹം, വിദ്യാര്ത്ഥികള്ക്ക് സുരക്ഷിതമായ അന്തരീക്ഷം ഒരുക്കുന്നതില് കേന്ദ്ര സര്ക്കാര് പരാജയപ്പെട്ടുവെന്ന് ആരോപിച്ചു.
ജാതീയ വേര്തിരിവുകള്ക്കെതിരെ ജീവിതം മുഴുവന് പോരാടിയ അംബേദ്കറുടെ ആശയങ്ങള് സമത്വത്തിലധിഷ്ഠിതമായ ഒരു സമൂഹം സൃഷ്ടിക്കാന് കരുത്തുപകരട്ടെ എന്ന് അദ്ദേഹം ആശംസിച്ചു.
മുഖ്യമന്ത്രിയുടെ ഫേസ്ബുക്ക് പോസ്റ്റിന്റെ പൂര്ണരൂപം:
ഇന്ന് ഭരണഘടനയുടെ ശില്പിയായ ഡോ. ബി.ആര്. അംബേദ്കറുടെ ജന്മദിനം. ജാതീയമായ വേര്തിരിവുകള് ഇല്ലാത്ത സമൂഹം സൃഷ്ടിക്കാനായി ജീവിതം മുഴുവന് സമര്പ്പിച്ച മഹാനാണ് അംബേദ്കര്. ജാതിവ്യവസ്ഥക്കെതിരെ അദ്ദേഹം നടത്തിയ നിര്ഭയമായ പോരാട്ടങ്ങളും സാമൂഹിക നീതിക്കായുള്ള ഉറച്ച ഇടപെടലുകളും എക്കാലവും രാജ്യത്തിന് വഴികാട്ടുന്നവയാണ്.
ഉന്നത വിദ്യാഭ്യാസ സ്ഥാപനങ്ങളിലുള്പ്പെടെ കടുത്ത ജാതീയത തലപൊക്കുന്ന ആശങ്ക ജനിപ്പിക്കുന്ന വാര്ത്തകള്ക്ക് നടുവിലാണ് നാമിന്നുള്ളത്. ഒരു സമൂഹമെന്ന നിലയില് കേരളം ആര്ജിച്ച മൂല്യങ്ങള് കൈമോശം വന്നോ എന്നു പരിശോധിക്കേണ്ട ഘട്ടമാണിത്. കണ്ണൂര് അഞ്ചരക്കണ്ടി സ്വകാര്യ മെഡിക്കല് കോളേജിലെ ഒന്നാംവര്ഷ ബിഡിഎസ് വിദ്യാര്ത്ഥി ജീവനൊടുക്കിയ സംഭവം അത്യന്തം വേദനയുളവാക്കുന്നതാണ്.
പുരോഗമന കേരളത്തിന് ഒരു തരത്തിലും അംഗീകരിക്കാന് കഴിയാത്ത വാര്ത്തകളാണ് തിരുവനന്തപുരം ഉഴമലക്കല് സ്വദേശി നിതിന്രാജിന്റെ മരണത്തെ തുടര്ന്ന് പുറത്തു വരുന്നത്. മിടുക്കനായ വിദ്യാര്ത്ഥിയെ മരണത്തിലേക്ക് തള്ളിവിട്ടത് ആരായാലും മാപ്പര്ഹിക്കാത്ത കുറ്റമാണ് അത്. കേരളമാകെ നിതിന് രാജിന്റെ കുടുംബത്തിനൊപ്പമാണ്.
ക്യാമ്പസ്സുകളിലെ ജാതീയ വിവേചനങ്ങള് നിയമംമൂലം അവസാനിപ്പിക്കാന് രോഹിത് വെമുല ആക്റ്റ് നടപ്പിലാക്കണമെന്ന ദീര്ഘകാല ആവശ്യം പരിഗണിക്കാന് കേന്ദ്രസര്ക്കാര് ഇനിയും തയ്യാറായിട്ടില്ല. പകരം കൊണ്ടുവന്ന യുജിസി മാര്ഗ നിര്ദ്ദേശങ്ങള് സുപ്രീം കോടതി മരവിപ്പിച്ചിരിക്കുകയുമാണ്. ജാതിവിവേചനമുള്പ്പെടെയുള്ള വിഭജനവും വിദ്വേഷവും വളര്ത്തുന്ന പ്രവണതകള്ക്കെതിരെ നാം ഒരുമിച്ച് നിലകൊള്ളേണ്ട സമയം കൂടിയാണിത്. സമത്വത്തിലും സാമൂഹ്യ നീതിയിലുമധിഷ്ഠിതമായ ഒരു സമൂഹസൃഷ്ടിക്കായി അംബേദ്കറിന്റെ ആശയങ്ങളും ഓര്മ്മകളും നമുക്ക് ശക്തി പകരട്ടെ.
എല്ലാവര്ക്കും അംബേദ്കര് ജയന്തി ആശംസകള്
