തിരഞ്ഞെടുപ്പിന് മുമ്പ് യുഡിഎഫ് മുഖ്യമന്ത്രി സ്ഥാനാര്‍ഥിയെ പ്രഖ്യാപിക്കാറില്ലെന്ന പതിവ് അറിയാമെങ്കിലും ഒരുചാട്ടുളിപ്രയോഗം; നിയമസഭ തിരഞ്ഞെടുപ്പില്‍ കോണ്‍ഗ്രസിന് മുഖ്യമന്ത്രി സ്ഥാനാര്‍ഥി വേണമെന്ന് തരൂര്‍; കോണ്‍ഗ്രസിന്റെ മുഖം ആകുമോ എന്ന ചോദ്യത്തിനും മറുപടി

തിരുവനന്തപുരം: വരാനിരിക്കുന്ന നിയമസഭാ തിരഞ്ഞെടുപ്പില്‍ യു.ഡി.എഫിനെ നയിക്കാന്‍ വ്യക്തമായ ഒരു മുഖ്യമന്ത്രി സ്ഥാനാര്‍ത്ഥിയെ (മുഖം) കോണ്‍ഗ്രസ് അവതരിപ്പിക്കേണ്ടത് അത്യാവശ്യമാണെന്ന് ശശി തരൂര്‍ എം.പി. മറ്റു മുന്നണികള്‍ക്കൊക്കെ മുഖ്യമന്ത്രി ആരെന്ന് ചോദിച്ചാല്‍ കാണിക്കാന്‍ ആളുണ്ട്. എല്ലാ സംസ്ഥാനങ്ങളിലും അങ്ങനെയാണ് പാര്‍ട്ടികള്‍ തിരഞ്ഞെടുപ്പിനെ നേരിടുന്നതെന്ന് ശശി തരൂര്‍ പറഞ്ഞു. കോണ്‍ഗ്രസിന്റെ മുഖം ആകുമോയെന്ന ചോദ്യത്തിന്, രാഷ്ട്രീയക്കാരനായി തുടരും എന്നായിരുന്നു ശശി തരൂരിന്റെ മറുപടി.

വീണ്ടും പ്രധാനമന്ത്രി നരേന്ദ്ര മോദിയെ സ്തുതിക്കാനും അദ്ദേഹം മറന്നില്ല. പിഎം ശ്രീ പദ്ധതിയില്‍ കാവിവല്‍ക്കരണം കാണുന്നില്ല. സിലബസില്‍ പ്രശ്‌നമുണ്ടെങ്കില്‍ സംസ്ഥാന സിലബസ് നടപ്പാക്കിയാല്‍ പോരേ എന്ന് ശശി തരൂര്‍ ചോദിച്ചു. മോദി സര്‍ക്കാരിന്റെ വികസന പദ്ധതികളില്‍ മത വിവേചനം കണ്ടിട്ടില്ലെന്നും ശശി തരൂര്‍ പറഞ്ഞു. കേരള സര്‍ക്കാരിനേക്കാള്‍ കൂടുതല്‍ കേന്ദ്രസര്‍ക്കാര്‍ വികസനം നടപ്പാക്കി. മോദി സര്‍ക്കാരിനെക്കുറിച്ച് എപ്പോഴും നെഗറ്റീവ് പറഞ്ഞാല്‍ മതിയോ എന്നും ശശി തരൂര്‍ ചോദിച്ചു.

ശുചിത്വഭാരത പദ്ധതി അടക്കം മോദി സര്‍ക്കാരിന്റെ ചില പരിപാടികള്‍ക്ക് പിന്തുണയുണ്ട്. രാജ്യവും കേരളവും നന്നാകണം എന്നതാണ് എല്ലാവരുടെയും വിശ്വാസം. ആര് ജയിച്ചാലും അവര്‍ എല്ലാവരുടെയും ജനപ്രതിനിധിയാണെന്ന് ശശി തരൂര്‍ അഭിപ്രായപ്പെട്ടു

നിലവില്‍ യു.ഡി.എഫിന് ഒരു മുഖ്യമന്ത്രി സ്ഥാനാര്‍ത്ഥിയെ ഉയര്‍ത്തിക്കാട്ടാന്‍ കഴിയാത്തത് തിരഞ്ഞെടുപ്പ് പോരാട്ടത്തില്‍ ഒരു പോരായ്മയാണെന്ന് തരൂര്‍ ചൂണ്ടിക്കാട്ടുന്നു. തിരഞ്ഞെടുപ്പില്‍ ജനങ്ങളിലേക്ക് ഇറങ്ങിച്ചെല്ലാന്‍ കഴിയുന്ന ഒരു 'മുഖം' കോണ്‍ഗ്രസിന് ആവശ്യമുണ്ട്.

സംസ്ഥാന രാഷ്ട്രീയത്തില്‍ സജീവമാകാന്‍ ശ്രമിക്കുന്ന തരൂര്‍, കോണ്‍ഗ്രസ് സംസ്ഥാന ഘടകത്തിന്റെ നിലവിലെ രീതികളെ ചോദ്യം ചെയ്യുന്ന ഇത്തരം പ്രസ്താവനകള്‍ തുടര്‍ച്ചയായി നടത്തുന്നത് പാര്‍ട്ടിയില്‍ പുതിയ ചര്‍ച്ചകള്‍ക്ക് വഴി തുറന്നിരിക്കുകയാണ്. യു.ഡി.എഫിന്റെ രീതി അനുസരിച്ച് തിരഞ്ഞെടുപ്പിന് മുമ്പ് മുഖ്യമന്ത്രി സ്ഥാനാര്‍ത്ഥിയെ പ്രഖ്യാപിക്കാറില്ല.

സംസ്ഥാനത്ത് കോണ്‍ഗ്രസ് ശക്തമായ തിരിച്ചുവരവിന് ഒരുങ്ങുന്ന ഈ ഘട്ടത്തില്‍, മുഖ്യമന്ത്രി കസേരയില്‍ ആര് ഇരിക്കും എന്നതിനെക്കുറിച്ച് നിലവിലുള്ള നേതാക്കള്‍ക്കിടയിലെ അനൗദ്യോഗിക ചര്‍ച്ചകള്‍ക്ക് തരൂരിന്റെ വാക്കുകള്‍ കൂടുതല്‍ ആക്കം നല്‍കിയിട്ടുണ്ട്.