'നിയമ വ്യവസ്ഥയെ വെല്ലുവിളിച്ച ആള്‍ക്കെതിരെ കേസെടുത്തത് ഒരു മാസം കൊണ്ട്, തനിക്കെതിരെ മൂന്ന് ദിവസത്തിനുള്ളില്‍'; മന്ത്രി സജി ചെറിയാനെയും പരാമര്‍ശിച്ച് ജി. സുധാകരന്‍; തനിക്കെതിരെ കേസെടുക്കുന്നതില്‍ ശരിയായ ആലോചനയല്ല നടന്നതെന്ന് വിമര്‍ശനം
മന്ത്രി സജി ചെറിയാനെയും പരാമര്‍ശിച്ച് ജി. സുധാകരന്‍
ആലപ്പുഴ: 1989ലെ ലോക്‌സഭ തെരഞ്ഞെടുപ്പില്‍ സി.പി.എം സ്ഥാനാര്‍ഥിക്കുവേണ്ടി തപാല്‍ വോട്ടുകള്‍ പൊട്ടിച്ച് തിരുത്തിയെന്ന വിവാദ പ്രസംഗത്തില്‍ കേസെടുത്ത പശ്ചാത്തലത്തില്‍ പ്രതികരണവുമായി മുതിര്‍ന്ന നേതാവും മുന്‍ മന്ത്രിയുമായ ജി സുധാകരന്‍. മന്ത്രി സജി ചെറിയാന്‍ ഭരണഘടനക്കെതിരെ വിമര്‍ശനം നടത്തിയ സമയത്ത് പൊലീസ് കേസെടുത്ത നടപടിക്രമങ്ങള്‍ ചൂണ്ടിക്കാട്ടിയായിരുന്നു സുധാകരന്റെ പുതിയ വിമര്‍ശനം.
രാജ്യത്തിന്റെ നിയമവ്യവസ്ഥയെ മുഴുവന്‍ വെല്ലുവിളിച്ച ആള്‍ക്കെതിരെ ഒരു മാസം എടുത്താണ് എഫ്.ഐ.ആര്‍ റജിസ്റ്റര്‍ ചെയ്തതെന്ന് സുധാകരന്‍ ചൂണ്ടിക്കാട്ടി. തനിക്കെതിരെ മൂന്ന് ദിവസത്തിനുള്ളില്‍ ജാമ്യമില്ല വകുപ്പ് ചുമത്തിയെന്നും അദ്ദേഹം പറഞ്ഞു. താന്‍ നടത്തിയ പ്രസംഗത്തെ ന്യായീകരിച്ചു കൊണ്ടും അദ്ദേഹം സംസാരിച്ചു. നെഗറ്റീവ് പറഞ്ഞ് പോസിറ്റീവ് ആക്കുന്ന പ്രസംഗ തന്ത്രമാണ് താന്‍ ഉപയോഗിച്ചത്. തനിക്കെതിരെ കേസെടുക്കുന്നതില്‍ ശരിയായ ആലോചനയല്ല നടന്നതെന്നും സുധാകരന്‍ ചൂണ്ടിക്കാട്ടി. കേസെടുത്ത പൊലീസ് ആണ് പുലിവാല്‍ പിടിച്ചത്. താന്‍ ഒരു മുന്‍കൂര്‍ ജാമ്യത്തിനും പോകുന്നില്ല. പൊലീസ് അറസ്റ്റ് ചെയ്യട്ടെ എന്നും ജയിലില്‍ പോകാന്‍ തയാറാണെന്നും സുധാകരന്‍ കൂട്ടിച്ചേര്‍ത്തു.
അതേസമയം, വിവാദ പ്രസംഗത്തില്‍ ജി. സുധാകരന്റെ മൊഴി പൊലീസ് തല്‍ക്കാലം എടുക്കില്ല. കഴിഞ്ഞ ദിവസം ജാമ്യമില്ല വകുപ്പ് പ്രകാരം കേസെടുത്തെങ്കിലും രേഖാമൂലമുള്ള തെളിവുകള്‍ ശേഖരിച്ച ശേഷം മൊഴിയെടുത്താല്‍ മതിയെന്നാണ് പൊലീസ് നിലപാട്. ഇതിന് മുന്നോടിയായി ആലപ്പുഴ കലക്ടറേറ്റില്‍ പ്രവര്‍ത്തിക്കുന്ന തെരഞ്ഞെടുപ്പ് വിഭാഗത്തോട് തെളിവുകള്‍ സമര്‍പ്പിക്കാന്‍ ആലപ്പുഴ സൗത്ത് പൊലീസ് ആവശ്യപ്പെട്ടു.
36 വര്‍ഷം മുമ്പുള്ള സംഭവമായതിനാല്‍ തെളിവുകള്‍ ശേഖരിച്ച് മാത്രമേ പൊലീസിന് നടപടിയിലേക്ക് കടക്കാന്‍ സാധിക്കൂ. ജനപ്രാതിനിധ്യനിയമത്തിലെ വോട്ടിങ് രഹസ്യാത്മകത ലംഘനം, ബൂത്ത് പിടിക്കല്‍, വ്യാജരേഖ ചമക്കല്‍ തുടങ്ങി മൂന്ന് മുതല്‍ ഏഴു വര്‍ഷം വരെ തടവും പിഴയും കിട്ടാവുന്ന കുറ്റങ്ങള്‍ ചുമത്തിയാണ് സുധാകരനെതിരെ കേസെടുത്തിരിക്കുന്നത്.
എന്‍.ജി.ഒ യൂനിയന്‍ സംസ്ഥാനസമ്മേളനത്തിന്റെ ഭാഗമായി ഈ മാസം 14ന് ആലപ്പുഴയില്‍ നടന്ന മുന്‍കാല നേതാക്കളുടെ സമ്മേളന വേദിയിലാണ് ജി.സുധാകരന്‍ വിവാദപ്രസംഗം നടത്തിയത്. തുടര്‍ന്ന് കേസെടുക്കാന്‍ മുഖ്യതെരഞ്ഞെടുപ്പ് ഓഫിസര്‍ നിര്‍ദേശിക്കുകയായിരുന്നു. പിന്നാലെ അമ്പലപ്പുഴ തഹസില്‍ദാര്‍ സുധാകരന്റെ വീട്ടിലെത്തി മൊഴിയെടുത്തു. ജില്ല കലക്ടര്‍ കത്ത് നല്‍കിയതിന് പിന്നാലെ നിയമോപദേശം തേടിയാണ് പൊലീസ് കേസെടുത്തത്.
കടക്കരപ്പള്ളിയല്‍ സി.പി.ഐ നടത്തിയ പരിപാടിയിലും അമ്പലപ്പുഴ തഹസില്‍ദാര്‍ക്ക് നല്‍കിയ മൊഴിയിലും അല്‍പം ഭാവന കലര്‍ത്തി പറഞ്ഞതാണെന്നും അത്തരമൊരുസംഭവം നടന്നിട്ടില്ലെന്നും വ്യക്തമാക്കി വിവാദപരാമര്‍ശം സുധാകരന്‍ തിരുത്തിയിരുന്നു. എന്നാല്‍, പ്രസംഗത്തിന്റെ വിഡിയോ ഇപ്പോഴും തെളിവാണ്.
