ജമാഅത്തെ ഇസ്‌ലാമിയുമായി സിപിഎം തെരഞ്ഞെടുപ്പുകളില്‍ സഹകരിച്ചിരുന്നു; സിപിഎമ്മിന്റെ രാഷ്ട്രീയ നിലപാട് തന്നെയാണ് അവര്‍ക്കും അന്നുണ്ടായിരുന്നത്; അക്കാലത്ത് രണ്ടുകൂട്ടര്‍ക്കും ഒരു പൊതുവായ ശത്രുവുണ്ടായിരുന്നു; അതിനെ നേരിടണമെന്നുള്ള താത്പര്യം അവര്‍ക്കും ഞങ്ങള്‍ക്കുമുണ്ടായിരുന്നുവെന്ന് പാലോളി മുഹമ്മദ് കുട്ടി
ജമാഅത്തെ ഇസ്‌ലാമിയുമായി സിപിഎം തെരഞ്ഞെടുപ്പുകളില്‍ സഹകരിച്ചിരുന്നു
മലപ്പുറം: തെരഞ്ഞെടുപ്പുകളില്‍ ജമാഅത്തെ ഇസ്‌ലാമിയുമായി സഹകരിച്ചിരുന്നുവെന്ന് വെളിപ്പെടുത്തി മുതിര്‍ന്ന സിപിഎം നേതാവ് പാലോളി മുഹമ്മദ് കുട്ടി. കോണ്‍ഗ്രസിനെതിരെ ശക്തമായ നിലപാട് സ്വീകരിച്ച സംഘടന ആയതിനാലാണ് സഹകരിച്ചതെന്നാണ് പാലോളി വ്യക്തമാക്കിയത്.
'സി.പി.എം പൊതുരാഷ്ട്രീയ രംഗത്ത് സ്വീകരിക്കുന്ന നിലപാട് തന്നെയാണ് ജമാഅത്തെ ഇസ്ലാമി അന്നുണ്ടായിരുന്നത്. ആ യോജിപ്പിന്റെ അടിസ്ഥാനത്തിലാണ് അവരുമായി സഹകരിച്ചത്. കോണ്‍ഗ്രസിന്റെ അന്നത്തെ നിലപാടിനെതിരെ ശക്തമായ നിലപാട് സ്വീകരിച്ച പാര്‍ട്ടിയാണ് ജമാഅത്തെ ഇസ്ലാമി. സിപിഎമ്മും അതേ ലക്ഷ്യത്തിലാണ് അന്ന് പോരാടിയത്. ആ പ്രശ്‌നത്തോടുള്ള യോജിപ്പിന്റെ അടിസ്ഥാനത്തിലുള്ളതല്ലാതെ ഒരു രാഷ്ട്രീയ സഖ്യത്തിന് വേണ്ടി രണ്ടുകൂട്ടരും തയ്യാറായിട്ടില്ലെന്നും അദ്ദേഹം ചാനല്‍ അഭിമുഖത്തില്‍ വ്യക്തമാക്കി.
അന്ന് അവര്‍ എടുത്ത നിലപാടും ഞങ്ങള്‍ക്ക് കേന്ദ്ര ഗവണ്‍മെന്റിന്റെ നയത്തോടുള്ള നിലപാടും ഒരുപോലെയായിരുന്നു. അവരും എതിര്‍ക്കുന്നു, ഞങ്ങളും എതിര്‍ക്കുന്നുണ്ട്. ആ എതിര്‍പ്പിലുള്ള ഐക്യമാണ് ഉണ്ടായത്' -പാലോളി പറഞ്ഞു. സി.പി.എം ജമാഅത്തെ ഇസ്‌ലാമിയുമായി സഹകരിച്ചു പ്രവര്‍ത്തിച്ചിരുന്നത് മുമ്പും പാലോളി മുഹമ്മദ് കുട്ടി തുറന്നുപറഞ്ഞിരുന്നു. പരസ്പരം മനസ്സിലാക്കിത്തന്നെയാണ് ബന്ധം സ്ഥാപിച്ചിരുന്നതെന്നും മുഖ്യശത്രുവിനെ നേരിടുകയായിരുന്നു ലക്ഷ്യമെന്നും സഭാ ടിവിക്ക് നല്‍കിയ അഭിമുഖത്തില്‍ അന്ന് പാലോളി മുഹമ്മദ് കുട്ടി വെളിപ്പെടുത്തിയിരുന്നു.
കഴിഞ തെരഞ്ഞെടുപ്പില്‍ ജമാഅത്തെ ഇസ്‌ലാമിയുമായുള്ള സഹകരണത്തെ വര്‍ഗീയവാദമായി ചിത്രീകരിച്ച് സി.പി.എം രാഷ്ട്രീയ പ്രചാരണം നടത്തുന്നതിനിടയിലാണ് കേന്ദ്ര കമ്മിറ്റി അംഗമായിരുന്ന മുതിര്‍ന്ന നേതാവ് പാലോളി മുഹമ്മദ്കുട്ടി പഴയ ബന്ധം സ്ഥിരീകരിച്ചത്. നേരത്തെ പല തെരഞ്ഞടുപ്പുകളിലും സി.പി.എം ജമാഅത്തെ ഇസ്‌ലാമിയുമായി യോജിച്ചു പോയിരുന്നതായി അദ്ദേഹം പറഞ്ഞു. 'ഞങ്ങളെ ജമാഅത്ത് മനസ്സിലാക്കാത്തതുകൊണ്ടോ ഞങ്ങള്‍ ജമാഅത്തിനെ മനസ്സിലാക്കാത്തതുകൊണ്ടോ പറ്റിയ അബദ്ധമല്ല അത്. അക്കാലത്ത് രണ്ടുകൂട്ടര്‍ക്കും ഒരു പൊതുവായ ശത്രുവുണ്ടായിരുന്നു. അതിനെ നേരിടണമെന്നുള്ള താത്പര്യം അവര്‍ക്കും ഞങ്ങള്‍ക്കുമുണ്ടായിരുന്നു' -പാലോളി പറഞ്ഞു.
അതേസമയം ജമാഅത്തെ ഇസ്ലാമിയുടെ രാഷ്ട്രീയ രൂപമായ വെല്‍ഫെയര്‍ പാര്‍ട്ടിയുമായി തദ്ദേശ തിരഞ്ഞെടുപ്പില്‍ സംസ്ഥാനത്ത് മുന്നൂറിലധികം വാര്‍ഡുകളില്‍ യുഡിഎഫ് വെല്‍ഫെയര്‍ പാര്‍ട്ടി ധാരണയുണ്ട്. വെല്‍ഫെയര്‍പാര്‍ട്ടി ചിഹ്നമായ ഗ്യാസ് സിലിണ്ടറിലാണ് കൂടുതല്‍ സ്ഥാനാര്‍ത്ഥികളും മത്സരിക്കുന്നത്. പ്രാദേശികമായ എതിര്‍പ്പുള്ള ഇടങ്ങളില്‍ പൊതുസ്വതന്ത്ര സ്ഥാനാര്‍ഥിയായും വെല്‍ഫെയര്‍ പാര്‍ട്ടി നേതാക്കള്‍ ഉള്‍പ്പെടെ മത്സരരംഗത്തുണ്ട്.
കോഴിക്കോട്, കണ്ണൂര്‍, വയനാട്, മലപ്പുറം, എറണാകുളം, കോട്ടയം ജില്ലകളിലാണ് യുഡിഎഫ് -വെല്‍ഫെയര്‍ പാര്‍ട്ടി ധാരണയുള്ളത്. ഇതില്‍ മലപ്പുറം ജില്ലയിലാണ് ഏറ്റവും കൂടുതല്‍ സ്ഥാനാര്‍ത്ഥികളുള്ളത്. മുപ്പതോളം പഞ്ചായത്തുകളില്‍ മുസ്ലിം ലീഗ് സീറ്റുകള്‍ വെല്‍ഫെയര്‍ പാര്‍ട്ടിക്ക് നല്‍കിയാണ് ധാരണയായത്. കോഴിക്കോട് കൊടുവള്ളി നഗരസഭയില്‍ രണ്ടും ചങ്ങരോത്ത് പഞ്ചായത്തില്‍ കോണ്‍ഗ്രസ് ജയിച്ച സീറ്റുള്‍പ്പെടെ രണ്ടും സീറ്റുകളിലാണ് ധാരണ. കൊടിയത്തൂര്‍, തിരുവള്ളൂര്‍, ആയഞ്ചേരി, വേളം തുടങ്ങി പഞ്ചായത്തുകളിലും വെല്‍ഫെയര്‍-യുഡിഎഫ് ധാരണയില്‍ മത്സരിക്കുന്നു.
വയനാട്ടിലെ വൈങ്ങിലപ്പള്ളിയില്‍ ജമാഅത്തെ ഇസ്ലാമി നേതാവ് മത്സര രംഗത്തുണ്ട്. എറണാകുളം ആലങ്കോട് ബ്ലോക്കിലും കോട്ടയം ഈരാറ്റുപേട്ട പഞ്ചായത്തിലും പരസ്യധാരണയുണ്ട്. ഭൂരിപക്ഷം വാര്‍ഡുകളിലും വെല്‍ഫെയര്‍ പാര്‍ട്ടി സ്ഥാനാര്‍ഥികള്‍ ഗ്യാസ് സിലിണ്ടര്‍ ചിഹ്നത്തില്‍ത്തന്നെയാണ് മത്സരിക്കുന്നതെങ്കിലും കോണ്‍ഗ്രസ് സ്വാധീനമുള്ള വാര്‍ഡുകളില്‍നിന്ന് ചിലയിടങ്ങളില്‍ എതിര്‍പ്പുയര്‍ന്നതോടെ ഇത് മറികടക്കാന്‍ പേരും ചിഹ്നവും ഉപേക്ഷിച്ചു. പകരം യു.ഡി.എഫ് പിന്തുണയോടെ മത്സരിക്കുന്ന സ്വതന്ത്ര സ്ഥാനാര്‍ത്ഥിയെയാണ് രംഗത്തിറക്കുന്നത്.
വടകര നഗരസഭയിലെ പതിനെട്ടാം വാര്‍ഡില്‍ മത്സര രംഗത്തുള്ളത് വെല്‍ഫെയര്‍ പാര്‍ട്ടിയുടെ വനിതാ സംഘടനയായ വുമണ്‍ ജസ്റ്റിസ് മൂവ്മെന്റ് സംസ്ഥാന വൈസ് പ്രസിഡന്റ് ഫൗസിയ ആരിഫ് ആണ്. യുഡിഎഫ് ആര്‍എംപി ഐ സ്വതന്ത്ര സ്ഥാനാര്‍ത്ഥിയായി മൊബൈല്‍ഫോണ്‍ ചിഹ്നത്തിലാണ് മത്സരം. യുഡിഎഫുമായി ധാരണയിലെത്താന്‍ കഴിയാതെ തനിച്ച് മത്സരിക്കുന്ന ഇടങ്ങളുമുണ്ട്. കഴിഞ്ഞ തവണ യു.ഡി.എഫ് സഖ്യമായി മത്സരിച്ച് മൂന്ന് വാര്‍ഡുകള്‍ വെല്‍ഫെയര്‍ പാര്‍ട്ടി ജയിച്ച മുക്കം നഗരസഭയില്‍ ഇത്തവണ ധാരണയില്ല.
മലപ്പുറം ജില്ലയില്‍ ലീഗ് സിറ്റിങ് സീറ്റുകള്‍ പലതും വെല്‍ഫെയര്‍ പാര്‍ട്ടിക്ക് നല്‍കിയതിനെതിരെ പാര്‍ട്ടി പ്രവര്‍ത്തകരില്‍നിന്നുതന്നെ ശക്തമായ എതിര്‍പ്പുയര്‍ന്നിരുന്നു. പുറമെ ഇരുവിഭാഗം സമസ്ത നേതാക്കളും ജമാഅത്തെ ഇസ്ലാമിയുടെ മതരാഷ്ട്രവാദ ആശയം ചൂണ്ടിക്കാട്ടി വെല്‍ഫെയര്‍ പാര്‍ട്ടി ബന്ധത്തിനെതിരെ ശക്തമായി രംഗത്തുണ്ട്. എന്നാല്‍, പ്രാദേശിക നീക്കുപോക്കുകളാണ് വെല്‍ഫെയര്‍ പാര്‍ട്ടിയുമായി ഉള്ളതെന്നാണ് മുസ്ലിം ലീഗ് നേതാക്കളുടെ വിശദീകരണം.
മുഖ്യധാരയില്‍ ചര്‍ച്ചയാക്കാതെ ഇടതുപക്ഷവുമായി കൈകൊടുത്ത പഴയ തിരഞ്ഞെടുപ്പ് ശൈലിയല്ല പുതിയ കാലത്ത് വെല്‍ഫെയര്‍ പാര്‍ട്ടിയുടെത്. യുഡിഎഫ് ബന്ധം പരസ്യമായി പ്രഖ്യാപിച്ച് മുന്നണി രാഷ്ട്രീയത്തിന്റെ ഭാഗമാവുകയാണ് ജമാഅത്തെ ഇസ്ലാമി. വിമര്‍ശനങ്ങള്‍ തല്‍ക്കാലം അവഗണിക്കാനാണ് യുഡിഎഫ് നേതൃത്വത്തിന്റെ തീരുമാനം. സിപിഎം ഉള്‍പ്പടെയുള്ള പാര്‍ട്ടികള്‍ വെല്‍ഫെയര്‍പാര്‍ട്ടി-യുഡിഎഫ് ബന്ധത്തിനെതിരെ ശക്തമായി രംഗത്തുണ്ട്.
