ബിജെപി അധ്യക്ഷന്‍ രാജീവ് ചന്ദ്രശേഖര്‍ മുനമ്പത്ത്; ആര്‍പ്പുവിളികളോടെ വരവേറ്റ് സമരക്കാര്‍; മുനമ്പത്തെ അനുകൂല സഹായത്തിന് പിന്തുണച്ച് 50 പേര്‍ ബിജെപിയില്‍ ചേര്‍ന്നു; തദ്ദേശ തിരഞ്ഞെടുപ്പിലെ സ്ഥാനാര്‍ഥി നിര്‍ണയവും സമരസമതി നിശ്ചയിക്കും; മുനമ്പത്ത് നിലയുറപ്പിച്ചു ബിജെപി
ബിജെപി അധ്യക്ഷന്‍ രാജീവ് ചന്ദ്രശേഖര്‍ മുനമ്പത്ത്;
കൊച്ചി: മുനമ്പം സമരത്തിനൊപ്പം നിലയുറപ്പിച്ച് ബിജെപി. വഖഫ് ഭേദഗതി ബില്‍ പാസായ സാഹചര്യത്തില്‍ ബിജെപി പ്രദേശത്ത് കൂടുതല്‍ നീക്കങ്ങള്‍ സജീവമാക്കി. ഇന്ന് മുനമ്പത്തെ ജനങ്ങള്‍ക്ക് ഐക്യദാര്‍ഢ്യവുമായി എത്തിയ ബിജെപി സംസ്ഥാന അദ്ധ്യക്ഷന് രാജീവ് ചന്ദ്രശേഖര്‍ സമരപന്തലില്‍ എത്തി. രാജീവിന് വലിയ സ്വീകരണമാണ് സമരകേന്ദ്രത്തില്‍ ലഭിച്ചത്. ബിജെപി അദ്ധ്യക്ഷനെ ആര്‍പ്പുവിളികളോടെ മുനമ്പം ജനത വരവേറ്റു. ലോക്സഭയിലും രാജ്യസഭയിലും വഖ്ഫ് ഭേദഗതി ബില്‍ പാസായതിന്റെ പശ്ചാത്തലത്തിലാണ് ബിജെപി അദ്ധ്യക്ഷന് മുനമ്പത്തെ ജനങ്ങള്‍ സ്വീകരണമൊരുക്കിയത്.
രാജീവ് ചന്ദ്രശേഖറിനൊപ്പം മറ്റ് എന്‍ഡിഎ നേതാക്കളും മുനമ്പത്തെത്തി. സമരം നടത്തുന്ന ജനങ്ങള്‍ക്ക് ഐക്യദാര്‍ഢ്യം പ്രഖ്യാപിച്ച് ബിജെപി നേതാക്കളായ ഷോണ്‍ ജോര്‍ജ്, പികെ കൃഷ്ണദാസ്, ബിഡിജെഎസ് നേതാവ് തുഷാര്‍ വെള്ളാപ്പള്ളി തുടങ്ങി നിരവധി നേതാക്കളും രാജീവ് ചന്ദ്രശേഖറിനൊപ്പം അണിനിരന്നു. ബിജെപിയില്‍ അംഗത്വമെടുക്കാന്‍ താത്പര്യം പ്രകടിപ്പിച്ച മുനമ്പത്തെ 50 പേര്‍ക്ക് സംസ്ഥാന അദ്ധ്യക്ഷന് നേരിട്ട് അംഗത്വം വിതരണം ചെയ്തു. പാര്‍ട്ടിയില്‍ ചേര്‍ന്ന ഓരോരുത്തരെയും ഷോളണിയിച്ച് രാജീവ് ചന്ദ്രശേഖര്‍ സ്വീകരിച്ചു.
തദ്ദേശ തിരഞ്ഞെടുപ്പില്‍ അടക്കം ബിജെപി മുനമ്പത്ത് ശക്തമായി നിലയുറപ്പിക്കും. തദ്ദേശ തിരഞ്ഞെടുപ്പിലെ സ്ഥാനാര്‍ഥി നിര്‍ണയം അടക്കം സമരമതിയുമായി ആലോചിച്ചാകും തീരുമാനം. അതേസമയം വഖഫ് ഭേദഗതി ബില്‍ പാര്‍ലമെന്റില്‍ പാസായതോടെ മുനമ്പത്തെ പ്രശ്‌നങ്ങള്‍ക്ക് പരിഹാരമാകുമെന്ന ബിജെപി അവകാശവാദത്തില്‍ പ്രതീക്ഷയര്‍പ്പിച്ച് സമരസമിതി. ബില്ലിന് മുന്‍കാല പ്രാബല്യമില്ലെന്ന കേന്ദ്രമന്ത്രിയുടെ പ്രഖ്യാപനം ആയുധമാക്കി യുഡിഎഫും സിപിഎമ്മും ബിജെപി വാദം തള്ളി. ബില്ലിനെ അനുകൂലിക്കണമെന്ന ആവശ്യം എം.പിമാര്‍ അംഗീകരിക്കാത്തതില്‍ വേദനയെന്ന് കെ.സി.ബിസിയും പ്രതികരിച്ചു.
വഖഫ് ബില്‍ രാജ്യസഭയും കടന്നതോടെ മുനമ്പത്ത് ഭൂസംരക്ഷണസമിതിയുടെ നേതൃത്വത്തില്‍ അഹ്ലാദം ശക്തമാണ്. പ്രധാനമന്ത്രി നരേന്ദ്രമോദിക്കും കേന്ദ്രമന്ത്രി സുരേഷ് ഗോപിക്കും അനുകൂലമായി സമരക്കാര്‍ മുദ്രാവാക്യം വിളിച്ചു. ലോക്സഭയിലും രാജ്യസഭയിലും വഖഫ് ബില്ലിനെ അനുകൂലിച്ചവരുടെയും എതിര്‍ത്തവരുടെയും പേരുകള്‍ സമര പന്തലില്‍ കെട്ടിതൂക്കിയിട്ടുണ്ട്. സുരേഷ് ഗോപിയുടെ ചിത്രത്തിന് താഴ് 'താങ്ക്യൂയു സര്‍' എന്നും രേഖപ്പെടുത്തിയിട്ടുണ്ട്.
എംപിമാരെ തിരിച്ചറിയുന്ന രീതിയിലാണ് സമരപന്തലില്‍ പേരുകള്‍ രേഖപ്പെടുത്തിയിരിക്കുന്നത്. സമരപന്തല്‍ സന്ദര്‍ശിക്കുന്ന ബിജെപി നേതാക്കള്‍ക്ക് വലിയ വരവേല്‍പ്പ് നല്‍കാനാണ് സമരസമിതിയുടെ തീരുമാനം. സമരത്തിന്റെ 174-ാം ദിവസമാണ്. 14 മണിക്കൂര്‍ നീണ്ട ചര്‍ച്ചകള്‍ക്കൊടുവിലാണ് ബില്‍ രാജ്യസഭയും കടന്നത്.വോട്ടെടുപ്പില്‍ 128 പേര്‍ ബില്ലിനെ അനുകൂലിച്ചപ്പോള്‍ 95 പേര്‍ എതിര്‍ത്തു. ലോക്‌സഭയ്ക്ക് പുറമെ രാജ്യസഭയും ബില്‍ പാസാക്കിയതോടെ ബില്‍ രാഷ്ട്രപതിയുടെ അംഗീകാരത്തിനായി അയക്കും.
രാഷ്ട്രപതി ഒപ്പിടുന്നതോടെ ബില്‍ നിയമമാകും. ഇത്രയേറെ വിശദമായ ചര്‍ച്ചകള്‍ നടന്ന മറ്റൊരു ബില്ലുമില്ലെന്ന് ബില്‍ അവതരിപ്പിച്ച് ന്യൂനപക്ഷകാര്യമന്ത്രി കിരണ്‍ റിജിജു പറഞ്ഞു. മുനമ്പം വിഷയം ഉള്‍പ്പെടെ ബില്ലില്‍ ചര്‍ച്ചയായിരുന്നു. കേന്ദ്രമന്ത്രി കിരണ്‍ റിജിജുവിന്റെ വാക്കുകളെ വിശ്വാസത്തിലെടുത്തായിരുന്നു സമരസമിതി പ്രതികരിച്ചിരിക്കുന്നത്.
മുനമ്പം പ്രശ്‌നത്തിനുള്ള ശാശ്വത പരിഹാരമാണ് ബില്ലെന്ന വാദം മന്ത്രി പി. രാജീവ് തള്ളി. ന്യൂനപക്ഷങ്ങളെ വഞ്ചിക്കാനുള്ള ശ്രമമെന്നും ഉടന്‍ യാഥാര്‍ഥ്യം ബോധ്യപ്പെടുമെന്നും മന്ത്രി. പത്ത് മിനിറ്റുകൊണ്ട് മുനമ്പത്തെ വിഷയം സംസ്ഥാന സര്‍ക്കാരിന് പരിഹരിക്കാമെന്ന് ആവര്‍ത്തിച്ച പ്രതിപക്ഷ നേതാവ് വി.ഡി. സതീശന്‍ സംഘപരിവാര്‍ അജണ്ടയ്ക്ക് സിപിഎം കുടപിടിക്കുന്നുവെന്നും കുറ്റപ്പെടുത്തി.
മുനമ്പം ജനതയെ കുടിയൊഴിപ്പിക്കരുതെന്ന നിലപാട് മുസ്ലിം ലീഗും ആവര്‍ത്തിച്ചു. പാണക്കാട് സാദിഖലി ഷിഹാബ് തങ്ങള്‍, ബില്ലിനെ എതിര്‍ത്ത ജനപ്രതിനിധികളുടെ നിലപാടില്‍ വേദനയുണ്ടെങ്കിലും പ്രതിഷേധമില്ലെന്ന് കെസിബിസി വ്യക്തമാക്കി. മുനമ്പത്തെ ജനങ്ങളുടെ പ്രശ്‌നങ്ങള്‍ പരിഹരിക്കാനുള്ളതാണ് വഖഫ് ബില്ലെന്നും അതിലൊരു സംശയവും വേണ്ടെന്നും ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍ പ്രതികരിച്ചിരുന്നു.
ബില്ല് പാസായ ഉടനെ മുനമ്പത്തെ ജനങ്ങളുടെ അവകാശം വീണ്ടെടുക്കും. ഈയൊരു സമയത്ത് മുനമ്പത്ത് ജനങ്ങളുടെ കൂടെ നിന്ന് അവരുടെ പ്രശ്‌നങ്ങള്‍ പരിഹരിക്കുകയല്ലേ കോണ്‍?ഗ്രസും സിപിഎമ്മും ചെയ്യേണ്ടിയിരുന്നത്. മുനമ്പത്തെ ജനങ്ങള്‍ക്ക് ശരിക്കുമൊരു പ്രശ്‌നം ഉണ്ടാവുമ്പോള്‍ ആരാണ് അവരുടെ കൂടെ നില്‍ക്കുന്നതെന്നും ആരാണ് പാര്‍ലമെന്റില്‍ നുണ പറയുന്നതെന്നും ജനങ്ങള്‍ക്ക് മനസിലായിട്ടുണ്ട്. ഇന്ത്യമുന്നണിയുടെ പ്രീണന രാഷ്ട്രീയം ബുധനാഴ്ച വെളിച്ചത്തായി.
