'ഇരയുടെ ഫോട്ടോ പബ്ലിക് ആക്കുന്നതില്‍ വിഷമമുണ്ട്, രമയാണ് അറുപത് തികഞ്ഞ ഇര'; വടകര എംഎല്‍എയെ അപമാനിച്ച് ഡിവൈഎഫ്ഐ നേതാവ്; കടുത്ത വിമര്‍ശനവുമായി സോഷ്യല്‍ മീഡിയ; 'അതെ ഇര ആയിരുന്നു, സിപിഎം 51 വെട്ട് വെട്ടി കൊന്ന ടിപിയുടെ ഭാര്യ'യെന്ന് കമന്റുകള്‍
'ഇരയുടെ ഫോട്ടോ പബ്ലിക് ആക്കുന്നതില്‍ വിഷമമുണ്ട്, രമയാണ് അറുപത് തികഞ്ഞ ഇര
തിരുവനന്തപുരം: കാലങ്ങളായി സിപിഎമ്മിന്റെ കണ്ണിലെ കരടാണ് കെ കെ രമ. ടി പി ചന്ദ്രശേഖരനെ 51 വെട്ടു വെട്ടി കൊലപ്പെടുത്തിയ ശേഷം രമയോടായിരുന്നു സഖാക്കളുടെ കലിപ്പു മുഴുവന്‍. ഇതിനായി പലവിധത്തിലാണ് ഇവര്‍ സൈബറിടത്തില്‍ അവരെ അധിക്ഷേപം കൊണ്ട് ചൊരിഞ്ഞത്. സിപിഎമ്മിന്റെ കടുത്ത സൈബര്‍ ആക്രണങ്ങള്‍ക്ക് പലതവണ ഇരയായിട്ടുണ് രമ. ഇപ്പോഴിതാ അവരെ വീണ്ടും അവഹേളിക്കാനുള്ള ശ്രമമാണ് സൈബറിടത്തില്‍ സഖാക്കള്‍ നടത്തുന്നത്.
കെ കെ രമ എം എല്‍ എയെ അധിക്ഷേപിച്ച് ഡി വൈ എഫ് ഐ നേതാവ് സിനി ജോയ് ഫേസ്ബുക്കില്‍ പോസ്റ്റിട്ടു. ഡി വൈ എഫ് ഐ കീഴ്കല്ലയം യൂണിറ്റ് സെക്രട്ടറിയും വട്ടപ്പാറ ലോക്കല്‍ കമ്മിറ്റി മെമ്പറുമാണ് സിനി. രാഹുലിനൊപ്പമിരിക്കുന്ന രമയുടെ ചിത്രം പങ്കുവച്ചുകൊണ്ടാണ് അധിക്ഷേപകരമായ പരാര്‍മശം നടത്തിയത്.'ഇരയുടെ ഫോട്ടോ പബ്ലിക് ആക്കുന്നതില്‍ വിഷമമുണ്ട്. എങ്കിലും ഇരക്കൊപ്പം നിന്നല്ലേ പറ്റൂ. രമയാണ് ആ അറുപത് തികഞ്ഞ ആ ഒരു ഇര'- എന്നാണ് സിനി ജോയ് ഫേസ്ബുക്കില്‍ കുറിച്ചത്.
എന്നാല്‍ പോസ്റ്റിന് താഴെ നിരവധി പേരാണ് സിനിക്കെതിരെ രൂക്ഷ വിമര്‍ശനവുമായി എത്തിയിരിക്കുന്നത്. 'കഥ എന്തുമാകട്ടെ...പോസ്റ്റ് ചെയ്തത് ഒരു സ്ത്രീ ആയതില്‍ ലജ്ജിക്കുന്നു', 'അതെ ഇര ആയിരുന്നു, നിന്റെ പ്രസ്ഥാനം അമ്പതൊന്ന് വെട്ട് വെട്ടി കൊന്ന ടിപിയുടെ ഭാര്യ, 'ശരി ആണ് രമ ഇര ആണ്. സിപിഎമ്മിന്റെ നെറികെട്ട രാഷ്ട്രീയം ചോദ്യം ചെയ്ത ഒഞ്ചിയത്തെ സഖാവ് ടിപിയുടെ ഭാര്യ....ടിപിയെ 51 വെട്ടു വെട്ടി കൊന്നത് കോണ്‍ഗ്രസ് അല്ല, ബിജെപി അല്ല, കമ്മ്യൂണിസ്റ്റ് നേതാക്കള്‍ തന്നെ.
ടിപി ചെയ്ത തെറ്റ് കമ്മ്യൂണിസം സാധാരണക്കാരില്‍ നിന്നും മാറി പോയപ്പോള്‍ അതിനെ ചോദ്യം ചെയ്ത് യഥാര്‍ത്ഥ കമ്മ്യൂണിസ്റ്റുകാരേ ഒരുമിപ്പിക്കാന്‍ നോക്കിയത്. അതിന്റെ ഫലമോ ഒരു മകന് അച്ഛനെ നഷ്ടമായി, ഒരു ഭാര്യക്ക് ഭര്‍ത്താവിനെ നഷ്ടമായി. രമ ഒരു ഇര തന്നെ ...കമ്മ്യൂണിസ്റ്റ് കാപാലികരുടെ ക്രൂരതയില്‍ ഇര ആക്കപ്പെട്ട ഒരു കമ്മ്യൂണിസ്റ്റ് ഇര'- എന്നിങ്ങനെ പോകുന്നു കമന്റുകള്‍.
വിമര്‍ശനം കടുത്തതോടെ ഇവര്‍ പോസ്റ്റ് പിന്‍വലിച്ചു. അവസരം കിട്ടിയാല്‍ രമയെ അധിക്ഷേപിക്കുക എന്നത് പതിവാക്കുകയാണ് സഖാക്കളെന്നാണ് ഉയരുന്ന വിമര്‍ശനം. രാഹുലിനെതിരെ ലൈംഗികാരോപണങ്ങളും പീഡന പരാതിയും ഉയര്‍ന്നതിന്റെ പശ്ചാത്തലത്തിലാണ് പരിഹാസ ചുവയോടെ ഡിവൈഎഫ്ഐ നേതാവ് പോസ്റ്റ് പങ്കുവച്ചത്. രാഹുല്‍ മാങ്കൂട്ടത്തിലിന് എതിരെ ജാമ്യമില്ലാ വകുപ്പ് പ്രകാരം പൊലീസ് കേസെടുത്തിരിക്കുന്നത്. ലൈംഗികപീഡനം, ഗര്‍ഭഛിദ്രത്തിനു പ്രേരണ, വധഭീഷണി തുടങ്ങിയ ആരോപണങ്ങളുന്നയിച്ച് യുവതി പരാതി നല്‍കിയതിനെ തുടര്‍ന്നാണ് കേസ്.
