എഐ സാങ്കേതിക വിദ്യ ഉപയോഗിക്കാനാരംഭിച്ച് ഇന്‍സ്റ്റാഗ്രാം; നടപടി ജനനതീയ്യതി മാറ്റി കുട്ടികള്‍ ഇന്‍സ്റ്റാഗ്രാമില്‍ എത്തുന്നതുകൊണ്ട്; ഇന്‍സ്റ്റായെ കബളിപ്പിക്കുന്ന കുട്ടികളെ ഇനി എഐ പിടികൂടും
സോഷ്യല്‍ മീഡിയ സുരക്ഷക്ക് കൂടുതല്‍ ഊന്നല്‍ നല്‍കി ഇന്‍സ്റ്റഗ്രാം പുതിയ എഐ സാങ്കേതികവിദ്യ ആവിഷ്‌കരിച്ച് പ്രായപരിധി നിയന്ത്രണം ശക്തമാക്കുകയാണ്. പ്ലാറ്റ്‌ഫോമിലെ ഉപഭോക്താവിന്റെ പ്രായം കൃത്യമായി തിരിച്ചറിയാനാണ് ഈ തികച്ചും നവീനമായ യന്ത്രബുദ്ധി സംവിധാനം ഉപയോഗിക്കുന്നത്. പ്രായം അടിസ്ഥാനമാക്കി 16 വയസിന് താഴെയുള്ളവരുടെ അക്കൗണ്ടുകള്‍ സ്വയമായി 'ടീന്‍ അക്കൗണ്ട്' ആയി മാറ്റിയേക്കും.
തിങ്കളാഴ്ചയാണ് ഈ സാങ്കേതികവിദ്യയുടെ പരീക്ഷണം യുഎസില്‍ ആരംഭിച്ചതായി ഇന്‍സ്റ്റഗ്രാം ഔദ്യോഗികമായി പ്രഖ്യാപിച്ചത്. പ്രൊഫൈല്‍ വിവരങ്ങള്‍, അക്കൗണ്ട് സൃഷ്ടിക്കപ്പെട്ട തീയതി, ഉപയോക്താവിന്റെ ഇടപെടലുകള്‍, അനുസരിക്കുന്ന അക്കൗണ്ടുകള്‍ തുടങ്ങിയ വിവരങ്ങള്‍ ആഴത്തില്‍ വിശകലനം ചെയ്ത് എഐ ഉപയോക്താവിന്റെ പ്രായം കണക്കാക്കും.
സോഷ്യല്‍ മീഡിയ പ്ലാറ്റ്ഫോമുകളില്‍ അധികാരികളുടെ നിയന്ത്രണങ്ങളും പരിശോധനകളും ശക്തമായ സാഹചര്യത്തിലാണ് ഇന്‍സ്റ്റഗ്രാം പ്രായനിയന്ത്രണം കര്‍ശനമായി നടപ്പാക്കാന്‍ ശ്രമിക്കുന്നത്. പ്രായത്തിന് അനുയോജ്യമല്ലാത്ത ഇന്‍സ്റ്റഗ്രാം ഉള്ളടക്കങ്ങള്‍ കൗമാരക്കാരായ ഉപഭോക്താക്കളിലേക്ക് എത്തുന്നുവെന്നും അത് അവരുടെ മാനസികാരോഗ്യത്തെ ബാധിക്കുന്നുവെന്നുമുള്ള കണ്ടെത്തലില്‍ യു.എസില്‍ കര്‍ശന നിയമങ്ങള്‍ കൊണ്ടുവന്നിട്ടുണ്ട്.
പ്രായം 18 വയസിന് മുകളിലാണെന്ന വ്യാജ ജനനതീയ്യതി നല്‍കിയിട്ടുള്ളവരുടെ പേരിലുള്ള അക്കൗണ്ടുകളും പരിശോധിക്കാനും ഈ സംവിധാനത്തിലൂടെ സാധിക്കും. ഇതോടെ കൗമാരപ്രായത്തിലെ കുട്ടികളെ മനസ്സികമായി ബാധിക്കാവുന്ന ഉള്ളടക്കങ്ങളില്‍ നിന്ന് സംരക്ഷിക്കാനുള്ള ഇന്‍സ്റ്റഗ്രാമിന്റെ ശ്രമങ്ങള്‍ കൂടുതല്‍ ശക്തമാകും.
കഴിഞ്ഞ വര്‍ഷമാണ് ഇന്‍സ്റ്റഗ്രാം 'ടീന്‍ അക്കൗണ്ട്' എന്ന പ്രത്യേക വിഭാഗം അവതരിപ്പിച്ചത്. പ്രായപരിധി കൃത്യമായി പാലിക്കുന്നതിനും രക്ഷിതാക്കള്‍ക്ക് നിയന്ത്രണം പ്രയോഗിക്കാവുന്ന സംവിധാനങ്ങള്‍ നല്‍കുന്നതിനുമായാണ് ഈ നീക്കം. പുതിയ സംവിധാനം അന്താരാഷ്ട്രതലത്തിലേക്കും ഉടന്‍ വ്യാപിപ്പിക്കുമെന്ന് പ്രതീക്ഷിക്കുന്നു.
