'ടീം മോശമായി കളിച്ചാൽ ഉടനെ പരിശീലകനെ കുറ്റം പറയും'; സ്പ്ലിറ്റ്-കോച്ചിങ് രീതി ഇപ്പോള് ആവശ്യമില്ല; ഇന്ത്യൻ ടീം പരിശീലകൻ ഗൗതം ഗംഭീറിനെ പിന്തുണച്ച് ഹർഭജൻ സിങ്
മുംബൈ: ഇന്ത്യൻ ക്രിക്കറ്റ് ടീം പരിശീലകൻ ഗൗതം ഗംഭീറിനെതിരെ ഉയരുന്ന വിമർശനങ്ങൾക്ക് മറുപടിയുമായി മുൻ ഇന്ത്യൻ താരം ഹർഭജൻ സിങ്. ടീമിന് നിലവിൽ സ്പ്ലിറ്റ്-കോച്ചിങ് രീതി ആവശ്യമില്ലെന്നും, ഇന്ത്യൻ ക്രിക്കറ്റിനെ പിന്തുണയ്ക്കുന്നവർ ക്ഷമയോടെ കാത്തിരിക്കണമെന്നും ഹർഭജൻ സിങ് ആവശ്യപ്പെട്ടു. ടെസ്റ്റ് ക്രിക്കറ്റിൽ ടീമിന്റെ പ്രകടനം മോശമായതിനെത്തുടർന്നാണ് ഗംഭീറിനെ പരിശീലകസ്ഥാനത്തുനിന്ന് മാറ്റണമെന്നും, വ്യത്യസ്ത ഫോർമാറ്റുകൾക്ക് വ്യത്യസ്ത പരിശീലകർ വേണമെന്നുമുള്ള ആവശ്യം ശക്തമായത്.
ഗംഭീറിന്റെ പരിശീലനത്തിൽ ടെസ്റ്റ് ടീം മോശം പ്രകടനം കാഴ്ചവെക്കുമ്പോഴും, വൈറ്റ്-ബോൾ ഫോർമാറ്റുകളിൽ, പ്രത്യേകിച്ച് ടി20ഐ ക്രിക്കറ്റിൽ ടീം മികച്ച പ്രകടനമാണ് നടത്തുന്നത്. 2024 ലെ ടി20 ലോകകപ്പിന് ശേഷം ഗംഭീർ ചുമതലയേറ്റതുമുതൽ ഇന്ത്യ ഒരു ടി20ഐ പരമ്പര പോലും തോറ്റിട്ടില്ല എന്നത് ഇതിന് തെളിവാണ്.
"ഇന്ത്യയിൽ, ടീം നന്നായി കളിച്ചാൽ എല്ലാവരും നിശബ്ദരായിരിക്കും, പക്ഷേ ടീം മോശമായി കളിച്ചാൽ ഉടൻ തന്നെ പരിശീലകനെതിരെ തിരിയും," ഹർഭജൻ സിങ് പറഞ്ഞു. "ഗൗതം ഗംഭീർ ഇന്ത്യയ്ക്കുവേണ്ടി വളരെ നന്നായി പ്രയത്നിച്ചു. എല്ലാവരും ക്ഷമയോടെ കാത്തിരിക്കണം. ഒരു വൈറ്റ്-ബോൾ പരിശീലകനും ഒരു റെഡ്-ബോൾ പരിശീലകനും എന്ന നയം ഇപ്പോൾ സ്വീകരിക്കേണ്ടതില്ല. എന്നാൽ കാലക്രമേണ, ആവശ്യമെങ്കിൽ, തീർച്ചയായും അത് നടപ്പിലാക്കണം. അതിൽ തെറ്റൊന്നുമില്ല," ഹർഭജൻ കൂട്ടിച്ചേർത്തു.
ഫെബ്രുവരി 7 മുതൽ മാർച്ച് 9 വരെ നടക്കുന്ന ടി20 ലോകകപ്പിൽ കിരീട ഫേവറിറ്റുകളിൽ ഒന്നാണ് ഇന്ത്യ. യുഎസ്എ, നമീബിയ, നെതർലാൻഡ്സ്, പാകിസ്ഥാൻ എന്നീ ടീമുകൾക്കൊപ്പം ഗ്രൂപ്പ് എയിലാണ് ഇന്ത്യ ഉൾപ്പെട്ടിരിക്കുന്നത്. ലോകകപ്പിന് മുമ്പായി ന്യൂസിലൻഡിനെതിരെ എട്ട് വൈറ്റ്-ബോൾ മത്സരങ്ങളിലും ഇന്ത്യ കളിക്കുന്നുണ്ട്.
