ബെംഗളുരുവിലെ 'പേസാക്രമണം' ഭയന്ന് പൂനെയില്‍ സ്പിന്‍ പിച്ചൊരുക്കിയിട്ടും ഇന്ത്യക്ക് തോല്‍വി; രോഹിതിനെയും സംഘത്തെയും കറക്കി വീഴ്ത്തി ചരിത്രമെഴുതി കിവീസ്; ഇന്ത്യന്‍ മണ്ണില്‍ ആദ്യ ടെസ്റ്റ് പരമ്പര വിജയം സ്വന്തമാക്കി ന്യൂസിലന്‍ഡ്
പൂനെ ടെസ്റ്റില്‍ ഇന്ത്യക്ക് 113 റണ്‍സിന്റെ കനത്ത തോല്‍വി
പുണെ: ബെംഗളുരു ടെസ്റ്റിലേറ്റ കനത്ത തോല്‍വിയുടെ നാണക്കേടിന് പിന്നാലെ പൂനെയില്‍ നടന്ന രണ്ടാം ടെസ്റ്റിലും ന്യൂസീലന്‍ഡിനോട് 113 റണ്‍സിന്റെ തോല്‍വി വഴങ്ങി പരമ്പര കൈവിട്ട് രോഹിത് ശര്‍മയും സംഘവും. രണ്ടാം ഇന്നിങ്സില് കിവീസ് ഉയര്‍ത്തിയ 359 റണ്‍സ് വിജയലക്ഷ്യത്തിലേക്ക് ബാറ്റെടുത്ത ഇന്ത്യ 60.2 ഓവറില്‍ 245 റണ്‍സിന് എല്ലാവരും പുറത്തായി. ഒന്നാം ഇന്നിങ്സില് ഏഴു വിക്കറ്റ് വീഴ്ത്തിയതിനു പിന്നാലെ രണ്ടാം ഇന്നിങ്സിലും ആറു വിക്കറ്റ് നേടിയ മിച്ചല്‍ സാന്റ്നറാണ് ഇന്ത്യയെ കറക്കി വീഴ്ത്തിയത്. താരത്തിന്റെ ടെസ്റ്റ് കരിയറിലെ ആദ്യ 10 വിക്കറ്റ് നേട്ടമാണിത്. സ്‌കോര്‍: ന്യൂസീലന്‍ഡ് - 259/10, 255/10, ഇന്ത്യ - 156/10, 245/10.
ബെംഗളുരുവില്‍ കിവീസിന്റെ പേസ് ആക്രമണത്തെ ഭയന്ന് പൂനെയില്‍ സ്പിന്‍ കെണിയൊരുക്കിയ ഇന്ത്യ, സാന്റ്നറുടെ പന്തുകള്‍ക്കു മുന്നില്‍ കറങ്ങിവീഴുകയായിരുന്നു. അജാസ് പട്ടേല്‍ രണ്ടു വിക്കറ്റ് വീഴ്ത്തി. 1955 - 56 മുതല്‍ ഇന്ത്യയില്‍ ടെസ്റ്റ് പരമ്പര കളിക്കുന്ന ന്യൂസീലന്‍ഡിന്റെ ഇന്ത്യന്‍ മണ്ണിലെ ആദ്യ ടെസ്റ്റ് പരമ്പര വിജയമാണിത്. ഇതുവരെ കളിച്ച 13 ടെസ്റ്റ് പരമ്പരകളില്‍ പത്തിലും ഇന്ത്യയ്ക്കായിരുന്നു ജയം. രണ്ട് പരമ്പരകള്‍ സമനിലയിലായപ്പോള്‍ ഇത്തവണ കിവീസ് ജയം സ്വന്തമാക്കി.
ഇതോടെ മൂന്നു മത്സരങ്ങള്‍ ഉള്‍പ്പെടുന്ന പരമ്പര ന്യൂസീലന്‍ഡ് ഉറപ്പാക്കി. ആദ്യ ടെസ്റ്റിലും കിവീസ് ഇന്ത്യയെ തോല്‍പ്പിച്ചിരുന്നു. പരമ്പരയിലെ മൂന്നാം മത്സരം നവംബര്‍ ഒന്നു മുതല്‍ മുംബൈ വാങ്കഡെ സ്റ്റേഡിയത്തില്‍ നടക്കും. 2012നു ശേഷം നാട്ടില്‍ ഇന്ത്യയുടെ ആദ്യ ടെസ്റ്റ് പരമ്പര തോല്‍വിയാണിത്. സ്വന്തം നാട്ടില്‍ 18 പരമ്പരകളിലായി തുടരുന്നുവന്ന ആധിപത്യമാണ്, ന്യൂസീലന്‍ഡിനെതിരായ പരമ്പര നഷ്ടത്തോടെ ഇന്ത്യയ്ക്ക് കൈമോശം വന്നത്. 4331 ദിവസങ്ങള്‍ സ്വന്തമാക്കിവെച്ച റെക്കോഡ് ഒടുവില്‍ ടീം ഇന്ത്യയ്ക്ക് നഷ്ടമായി. 2012-ല്‍ ഇംഗ്ലണ്ടിനോടായിരുന്നു നാട്ടില്‍ ഇന്ത്യയുടെ അവസാന ടെസ്റ്റ് പരമ്പര തോല്‍വി വഴങ്ങിയത്.
ടെസ്റ്റ് കരിയറിലാദ്യമായി 13 വിക്കറ്റ് നേട്ടം കൈവരിച്ച സ്പിന്നര്‍ മിച്ചല്‍ സാന്റ്നറാണ് ന്യൂസീലന്‍ഡിന് ഐതിഹാസിക വിജയം സമ്മാനിച്ചത്. ഒന്നാം ഇന്നിങ്സില് ഏഴു വിക്കറ്റെടുത്ത സാന്റ്‌നര്‍, രണ്ടാം ഇന്നിങ്സില് 29 ഓവറില്‍ 104 റണ്‍സ് വഴങ്ങി ആറു വിക്കറ്റ് വീഴ്ത്തി. അജാസ് പട്ടേല്‍ രണ്ടും ഗ്ലെന്‍ ഫിലിപ്സ് ഒരു വിക്കറ്റും നേടി.
അര്‍ധ സെഞ്ചുറി നേടി അല്‍പമെങ്കിലും പൊരുതിയ യശസ്വി ജയ്സ്വാളാണ് ഇന്ത്യന്‍ നിരയിലെ ടോപ് സ്‌കോറര്‍. ഏകദിന ശൈലിയില്‍ ബാറ്റുവീശിയ ജയ്സ്വാള്‍ 65 പന്തില്‍ ഒമ്പതു ഫോറും മൂന്നു സിക്സുമടക്കം 77 റണ്‍സെടുത്ത് പുറത്തായി. ക്യാപ്റ്റന്‍ രോഹിത് ശര്‍മ (8) ഒരിക്കല്‍ കൂടി നിരാശപ്പെടുത്തി. വിരാട് കോലി (17), ശുഭ്മാന്‍ ഗില്‍ (23), സര്‍ഫറാസ് ഖാന്‍ (9) എന്നിവരും സാന്റ്നറിനു മുന്നില്‍ തന്നെ വീണു. ഋഷഭ് പന്ത് (0) റണ്ണൗട്ടായി. 84 പന്തില്‍ 42 റണ്‍സെടുത്ത രവീന്ദ്ര ജഡേജയുടെ പോരാട്ടവും അവസാനിച്ചതോടെ ഇന്ത്യയുടെ പതനം പൂര്‍ത്തിയായി. ക്യാപ്റ്റന്‍ കൂടിയായ ഓപ്പണര്‍ രോഹിത് ശര്‍മ (16 പന്തില്‍ എട്ട്), ഋഷഭ് പന്ത് (0), സര്‍ഫറാസ് ഖാന്‍ (15 പന്തില്‍ 9) എന്നിവര്‍ പൂര്‍ണമായും നിരാശപ്പെടുത്തി.
നേരത്തേ 103 റണ്‍സിന്റെ ഒന്നാം ഇന്നിങ്സ് ലീഡുമായി വീണ്ടും ബാറ്റിങ് ആരംഭിച്ച ന്യൂസീലന്‍ഡ്, രണ്ടാം ഇന്നിങ്സില് 255 റണ്‍സിന് ഓള്‍ഔട്ടായിരുന്നു. അഞ്ചിന് 198 റണ്‍സെന്ന നിലയില്‍ മൂന്നാം ദിനം ബാറ്റിങ് ആരംഭിച്ച കിവീസിന് 57 റണ്‍സ് ചേര്‍ക്കുന്നതിനിടെ ശേഷിച്ച അഞ്ചു വിക്കറ്റുകളും നഷ്ടമായി. 86 റണ്‍സെടുത്ത ക്യാപ്റ്റന്‍ ടോം ലാഥമായിരുന്നു രണ്ടാം ഇന്നിങ്സില് കിവീസിന്റെ ടോപ് സ്‌കോറര്‍. ടോം ബ്ലന്‍ഡെല്‍ (41), ഗ്ലെന്‍ ഫിലിപ്സ് (48) എന്നിവരും കറങ്ങിത്തിരിയുന്ന പിച്ചില്‍ മികച്ച പ്രകടനം നടത്തി.
