ചാമ്പ്യന്‍സ് ട്രോഫി; സെമി ഫൈനലിന് മുന്‍പ് ഓസ്‌ട്രേലിയ്ക്ക് കനത്ത തിരിച്ചടി; പരിക്ക് കാരണം ഓപ്പണര്‍ പുറത്ത്; സെമി കളിക്കില്ലെന്ന് റിപ്പോര്‍ട്ട്
ലാഹോര്‍: ഇപ്പോള്‍ നടക്കുന്ന ചാമ്പ്യന്‍സ് ട്രോഫിയില്‍ അഫ്ഗാനിസ്ഥാനെതിരെ നടന്ന മത്സരം മഴ മൂലം ഉപേക്ഷിച്ചതോടെ ഓസ്ട്രേലിയ സെമി ഫൈനലിലേക്ക് പ്രവേശിച്ചു. ഇതോടെ സെമി ഫൈനല്‍ ടിക്കറ്റ് ലഭിച്ചിരിക്കുന്നത് ഇന്ത്യ, ന്യുസിലാന്‍ഡ്, ഓസ്ട്രേലിയ എന്നി ടീമുകള്‍ക്കാണ്. ഇന്ന് നടക്കുന്ന മത്സരത്തില്‍ സൗത്ത് ആഫ്രിക്കയെ ഇംഗ്ലണ്ട് നല്ല മാര്‍ജിനില്‍ പരാജയപെടുത്തിയാല്‍ അഫ്ഗാനിസ്ഥാന് സെമി ഫൈനലിലേക്ക് പ്രവേശനം ലഭിക്കും.
സെമി ഫൈനലിന് മുന്‍പ് ഓസ്ട്രേലിയക്ക് കിട്ടിയത് വമ്പന്‍ പണിയാണ്. ഓപ്പണിങ് ബാറ്റ്സ്മാനും, സ്പിന്‍ ബോളറുമായ മാത്യു ഷോര്‍ട്ട് പരിക്കിനെ തുടര്‍ന്ന് സെമി ഫൈനല്‍ കളിക്കില്ലെന്നാണ് റിപ്പോര്‍ട്ടുകള്‍. അഫ്ഗാനിസ്ഥാനെതിരെ നടന്ന മത്സരത്തില്‍ റണ്‍സ് ഓടിയെടുക്കുന്നതിനിടയില്‍ അദ്ദേഹത്തിന് ബുദ്ധിമുട്ട് അനുഭവപ്പെട്ടിരുന്നു.
മത്സരത്തില്‍ 15 പന്തില്‍ 20 റണ്‍സ് നേടി അദ്ദേഹം ഇന്നിങ്സ് അവസാനിപ്പിച്ചു. പരിക്കില്‍ നിന്ന് മുക്തി നേടാന്‍ താരത്തിന് കുറച്ചധികം സമയം എടുക്കേണ്ടി വരും എന്നാണ് ക്യാപ്റ്റന്‍ സ്റ്റീവ് സ്മിത്ത് പറയുന്നത്. ഷോര്‍ട്ടിന്റെ അഭാവത്തില്‍ ജെയ്ക് ഫ്രെയ്‌സര്‍ മക്ഗര്‍ഗ് കളിക്കാനാണ് സാധ്യത.
