പത്തനംതിട്ട: ജില്ലയിൽ സിപിഎം ഭരണം കൈയാളുന്ന മറ്റൊരു സർവീസ് സഹകരണ ബാങ്കിൽ നിന്ന് കൂടി ഞെട്ടിക്കുന്ന തട്ടിപ്പിന്റെ കഥ പുറത്ത്. തട്ടിപ്പ് നടന്ന് ഒന്നര വർഷത്തോട് അടുക്കുമ്പോൾ പൊലീസിൽ പരാതി നൽകുന്നു. ഒന്നര മാസത്തിന് ശേഷം പൊലീസ് അന്വേഷണം തുടങ്ങും. ലോക്കൽ സെക്രട്ടറി തട്ടിയെടുത്തത് 18 ലക്ഷമായിരുന്നു. പാർട്ടിയിൽ ഒരു വിഭാഗം ലോക്കൽ സെക്രട്ടറിക്ക് വേണ്ടി നില കൊള്ളുമ്പോൾ മറുപക്ഷം രഹസ്യമായി യുദ്ധവും ആരംഭിച്ചു.

വ്യാജരേഖയുപയോഗിച്ച് 18 ലക്ഷം തട്ടിയത് സിപിഎം ചിറ്റാൻ മുൻലോക്കൽ സെക്രട്ടറിയും ബാങ്ക് സീനിയർ ക്ലാർക്കുമായ പിബി ബിജുവാണ്. ബാങ്കിന്റെ വയ്യാറ്റുപുഴ ആസ്ഥാന ഓഫീസിലായിരുന്നു ബിജുവിന് ജോലി. 2016 സെപ്റ്റംബർ 28 മുതൽ കഴിഞ്ഞ വർഷം ഫെബ്രുവരി 20 വരെയുള്ള കാലയളവിൽ 18 ലക്ഷം രൂപയുടെ തട്ടിപ്പാണ് നടത്തിയിരിക്കുന്നതെന്ന് കഴിഞ്ഞ ജൂലൈ 15 ന് സെക്രട്ടറി പിടി ജോർജ് കുട്ടി ജില്ലാ പൊലീസ് മേധാവിക്ക് നൽകിയ പരാതിയിൽ പറയുന്നു. ഇതിൽ ഒമ്പത് ലക്ഷം രൂപ തിരികെ അടച്ചിട്ടുണ്ട്. കഴിഞ്ഞ മാർച്ച് മൂന്നിന് ചേർന്ന ഭരണ സമിതി യോഗത്തിന്റെ തീരുമാന പ്രകാരമാണ് ജൂലൈ 15 ന് സെക്രട്ടറി പരാതി നൽകിയത്.

തട്ടിപ്പ് കൈയോടെ പിടിച്ചതിനെ തുടർന്ന് ബിജുവിനെ ജോലിയിൽ നിന്ന് സസ്പെൻഡ് ചെയ്തു. പാർട്ടിയിൽ തരം താഴ്‌ത്തുകയും ചെയ്തു. കഴിഞ്ഞ വർഷം നടന്ന തട്ടിപ്പിന് ഈ വർഷം കമ്മറ്റി കൂടി പരാതി സമർപ്പിക്കുക എന്ന വിചിത്രമായ നടപടി കൂടിയാണ് ബാങ്കിന്റെ ഭാഗത്തു നിന്നുമുണ്ടായിരിക്കുന്നത്. പണം തിരികെ അടയ്ക്കാൻ കൊടുത്ത അവസരങ്ങൾ എല്ലാം ബിജു പാഴാക്കുകയും ഇനി അത് കിട്ടില്ലെന്ന് ബോധ്യമാവുകയും ചെയ്തതോടെയാണ് ഇപ്പോൾ പരാതി നൽകിയത്. അതിന്മേൽ ഒന്നര മാസം കഴിഞ്ഞിട്ടും നടപടിയുമായിട്ടില്ല.

ആസൂത്രിതമായ തട്ടിപ്പാണ് ബിജു ബാങ്കിൽ നടത്തിയിട്ടുള്ളത്. സെക്രട്ടറി സ്ഥലത്തില്ലാത്തപ്പോഴാണ് തട്ടിപ്പ് അരങ്ങേറിയിരുന്നത്. സ്വർണപ്പണയം, വ്യക്തിഗത വായ്പ എന്നിവയിലാണ് തട്ടിപ്പ്. സ്വർണം പണയം വച്ചതായി രേഖയുണ്ടാക്കി പണം മറ്റു പലരുടേയും അക്കൗണ്ടിൽ നിക്ഷേപിച്ച ശേഷം വൗച്ചറിൽ വ്യാജമായി ഇടപാടുകാരുടെ ഒപ്പിട്ടാണ് പണം തട്ടിയെടുത്തത്. പണയത്തിന് വച്ചിരിക്കുന്ന സ്വർണമെന്നത് സങ്കൽപ്പം മാത്രമാണ്. അങ്ങനെ ഒന്ന് ബാങ്ക് ലോക്കറിൽ കാണില്ല. പണയ സ്വർണം തിട്ടപ്പെടുത്താൻ പ്രസിഡന്റും സെക്രട്ടറിയും ഒന്നിച്ച് ചേർന്ന് നടത്തിയ പരിശോധനയിലാണ് ഉരുപ്പടിയില്ലാതെ പണയം വച്ചിരിക്കുന്നതായി ശ്രദ്ധയിൽപ്പെട്ടത്.

സെക്രട്ടറി അത്യാവശ്യകാര്യങ്ങൾക്ക് പുറത്തു പോകേണ്ടി വരുമ്പോൾ ബാങ്കിലെ കാര്യങ്ങൾ നോക്കി നടത്തിയിരുന്നത് ബിജുവായിരുന്നു. കളവായ കാര്യങ്ങൾ എഴുതി ചേർത്തും കൃത്രിമ രേഖകൾ സൃഷ്ടിച്ചും വിവിധ അംഗങ്ങളുടെ പേരിൽ അവർ അറിയാതെ ലോൺ പാസാക്കിയതായി കാണിച്ചും അംഗങ്ങളുടെ അക്കൗണ്ടുകൾ വഴി പണം പിൻവലിച്ചുമായിരുന്നു തട്ടിപ്പ്. കഴിഞ്ഞ വർഷം ജനുവരി 11 ന് നടത്തിയ സംയുക്ത പരിശോധനയിലാണ് സ്വർണ പണയ തട്ടിപ്പുകൾ ശ്രദ്ധയിൽപ്പെട്ടത്. അംഗങ്ങൾ അറിയാതെ അവരുടെ പേരിൽ 16 സ്വർണ പണയ വായ്പകളാണ് ബിജു എടുത്തത്. പരിശോധന നടന്ന ദിവസവും അതിന്റെ തലേന്നുമായി ബിജു 14 പണയങ്ങൾ പണം അടച്ച് ക്ലോസ് ചെയ്തതായി രേഖയുണ്ടാക്കി. ക്യാഷ് കൗണ്ടറിൽ ഇതിന്റെ പണം ഇല്ലാതെ വരും എന്ന് മനസിലാക്കിയ ബിജു മറ്റൊരു തട്ടിപ്പാണ് അതിനായി നടത്തിയത്. നേരത്തേ അഡ്വാൻസ് ചെയ്ത സ്ഥാപനങ്ങൾക്കും വ്യക്തികൾക്കും അന്നേ ദിവസം പണം തിരികെ നൽകിയെന്ന് രേഖയുണ്ടാക്കി. ഈയിനത്തിൽ 7,70,784 രൂപയാണ് ബിജു തട്ടിയെടുത്തത്.

ഇതിന് മുൻപ് 2018 ഡിസംബർ അഞ്ചിന് മീൻകുഴി മാമ്പറ്റ പൊന്നമ്മ എന്നയാളുടെ പേരിൽ ഒമ്പതു ലക്ഷം വായ്പ അനുവദിച്ചതായി കമ്പ്യൂട്ടറിൽ രേഖപ്പെടുത്തി. അതിന് ശേഷം അവരുടെ സേവിങ്സ് അക്കൗണ്ട് വഴി വ്യാജചെക്കും വൗച്ചറും ഉപയോഗിച്ച് അഞ്ച് തവണയായി 8,80, 998 രൂപ പിൻവലിച്ചു. പൊന്നമ്മയ്ക്ക് നിയമപ്രകാരം ലോൺ നൽകണമെങ്കിൽ ഓഹരി തുക ഇനത്തിൽ 18,000 രൂപയും റിസ്‌ക് ഫണ്ടായി 525 രൂപയും അടയ്ക്കേണ്ടിയിരുന്നു. വായ്പയിൽ നിന്ന് തന്നെ ഇതിനുള്ള തുകയും ബിജു കണ്ടെത്തി. പൊന്നമ്മ ഈ വിവരം അറിഞ്ഞിട്ടേയില്ലെന്ന് പിന്നീട് മനസിലായി. ഇങ്ങനെ അപഹരിച്ച പണം 2018 ഡിസംബർ അഞ്ചു മുതൽ 12 വരെ വച്ച 13 സ്വർണ പണയ വായ്പകൾ എടുക്കാനാണ് ഉപയോഗിച്ചത്. ഈ പണയവും അംഗങ്ങൾ അറിയാതെ വച്ചിരുന്നതാണ്. ഗാർഹിക അന്വേഷണത്തിനൊടുവിൽ ബിജു കുറ്റം സമ്മതിച്ച് ഒമ്പതു ലക്ഷം തിരിച്ചടച്ചു.

സഹകരണ വകുപ്പ് സീനിയർ ഓഡിറ്റർ വിദ്യാ ജി. നായർ നടത്തി ഓഡിറ്റിൽ തട്ടിപ്പ് കണ്ടെത്തിയിരുന്നു. ഇത് ബാങ്കിന്റെ നഷ്ടമായി ഈടാക്കുന്നതിന് ഓഡിറ്റിൽ ശിപാർശ ചെയ്തിരുന്നു. ഈ റിപ്പോർട്ടിന്റെ അടിസ്ഥാനത്തിലാണ് പൊലീസിൽ സെക്രട്ടറി പരാതി നൽകിയത്.

വയ്യാറ്റുപുഴ സർവീസ് സഹകരണ ബാങ്ക്

ശ്രീലാല്‍ വാസുദേവന്‍

    ശ്രീലാല്‍ വാസുദേവന്‍ മറുനാടന്‍ മലയാളി പത്തനംതിട്ട ന്യൂസ് കോണ്‍ട്രിബ്യൂട്ടര്‍