മാലിന്യമുക്ത ഗ്രാമപഞ്ചായത്ത് പദ്ധതിയുടെ ഭാഗമായി അപേക്ഷിച്ച എല്ലാവര്‍ക്കും സൗജന്യ ജി ബിന്‍ നല്‍കി മുത്തോലി ഗ്രാമപഞ്ചായത്ത്
പാലാ (മുത്തോലി ): മാലിന്യമുക്ത ഗ്രാമപഞ്ചായത്ത് പദ്ധതിയുടെ ഭാഗമായി ജി ബിന്നുകള്‍ സൗജന്യമായി വിതരണം ചെയ്തു മാതൃകയായി മുത്തോലി ഗ്രാമപഞ്ചായത്ത്. പഞ്ചായത്തിലെ എല്ലാ ഭവനങ്ങളിലും ജൈവമാലിന്യ ശേഖരണത്തിനായി ജി ബിന്നുകള്‍ സ്ഥാപിക്കുക എന്ന ബൃഹത് പദ്ധതിക്കാണ് പഞ്ചായത്ത് രൂപം നല്‍കിയിട്ടുള്ളതെന്ന് ഗ്രാമപഞ്ചായത്ത് പ്രസിഡന്റ് രണ്‍ജിത്ജി മീനാഭവന്‍ അറിയിച്ചു. പദ്ധതി ഉദ്ഘാടനം ഗ്രാമപഞ്ചായത്തില്‍ നിര്‍വഹിച്ചു സംസാരിക്കുകയായിരുന്നു അദ്ദേഹം.
ജൈവമാലിന്യങ്ങള്‍ വീട്ടില്‍ തന്നെ ശേഖരിക്കുന്നതിനാണ് ജി ബിന്നുകള്‍ പഞ്ചായത്ത് നല്‍കുന്നത്.അപേക്ഷിച്ച എല്ലാവര്‍ക്കും ജിബിന്നുകള്‍ വിതരണം ചെയ്യാന്‍ കഴിഞ്ഞതായി മുത്തോലി ഗ്രാമപഞ്ചായത്ത് പ്രസിഡന്റ് രണ്‍ജിത്ജി മീനാഭവന്‍ അറിയിച്ചു. 4500 രൂപ വില വരുന്നതാണ് ഓരോ ബിന്നും.
മാലിന്യമുക്ത പഞ്ചായത്ത് എന്ന ലക്ഷ്യത്തോടെ കഴിഞ്ഞ നാലുവര്‍ഷമായി നടത്തിവരുന്ന പ്രവര്‍ത്തനങ്ങളുടെ ഭാഗമാണ് ബിന്നുകളുടെ വിതരണം. ഈ വര്‍ഷം പകുതിയോടുകൂടി പഞ്ചായത്തിലെ എല്ലാ വീടുകളിലും സൗജന്യമായി ബിന്നുകള്‍ നല്‍കും.
ചടങ്ങില്‍ പഞ്ചായത്ത് മെമ്പര്‍മാരായ ശ്രീജയ എം.ബി, സിജു സി. എസ്, ഇമ്മാനുവല്‍ പണിക്കര്‍,ഫിലോമിന ഫിലിപ്പ്, ആര്യ സെബിന്‍ പഞ്ചായത്ത് സെക്രട്ടറി സിന്ധു ബി മറ്റം,
ജീവനക്കാര്‍ തുടങ്ങിയവര്‍ പങ്കെടുത്തു