ഗസ്സയിലെ സയണിസ്റ്റ് പിന്മാറ്റം, ഫലസ്തീന്‍ വിജയാഹ്ലാദ സംഗമം സംഘടിപ്പിച്ച് സോളിഡാരിറ്റി
കോഴിക്കോട്: 15 മാസം നീണ്ട് നിന്ന വംശഹത്യക്ക് ശേഷം ഗസ്സയില്‍ നിന്നും സയണിസ്റ്റ് ഇസ്‌റായേല്‍ സേന പിന്മാറിയതിന്റെ വിജയാഹ്ലാദ ദിനം സംഘടിപ്പിച്ച് സോളിഡാരിറ്റി. കോഴിക്കോട് ബീച്ചിനടുത്തുള്ള ആസ്പിന്‍ കോര്‍ട്ടിയാര്‍ഡ്‌സില്‍ പ്രത്യേകം സജ്ജമാക്കിയ തൂഫാനുല്‍ അഖ്‌സ സ്വകയറിലാണ് ലൈവ് ഗ്രാഫിറ്റി, റാപ്പ് സോങ്, ഫലസ്തീന്‍ വിജയ ഗാനങ്ങള്‍ തുടങ്ങിയ വ്യത്യസ്ത കലാപരിപാടികളിലൂടെ ഫലസ്തീന്‍ ജനതയുടെ അതീജീവനത്തോട് ഐക്യദാര്‍ഢ്യപ്പെട്ട് കൊണ്ട് വിജയാഹ്ലാദ സംഗമം നടന്നത്.
അമേരിക്കയുടെ നേതൃത്വത്തില്‍ സയണിസ്റ്റുകള്‍ നടത്തിയ വംശഹത്യ ആരാണ് യഥാര്‍ത്ഥ തീവ്രവാദത്തിന്റെ വക്താക്കള്‍ എന്ന് ലോകത്തിന് മുന്നില്‍ കാണിച്ച് കൊടുത്തെന്നും സ്വതന്ത്ര ഫലസ്തീനിനായി ഗസ്സയിലെ പോരാളികള്‍ നടത്തിയ അതിജീവനം ലോകത്ത് അടിച്ചമര്‍ത്തപ്പെടുന്ന മുഴുവന്‍ ജനതക്കുമുള്ള ഊര്‍ജ്ജമാണെന്നും സംഗമം ഉദ്ഘാടനം ചെയ്ത സോളിഡാരിറ്റി സംസ്ഥാന പ്രസിഡന്റ് തൗഫീക് മമ്പാട് അഭിപ്രായപ്പെട്ടു.
കേരളത്തിലെ ഏറ്റവും വലിയ ലിറ്ററേച്ചര്‍ ഫെസ്റ്റെന്ന് അവകാശപ്പെടുന്ന കെ.എല്‍.എഫില്‍ വര്‍ത്തമാന കാലം സാക്ഷ്യം വഹിച്ച ഏറ്റവും വലിയ വംശഹത്യയായ ഗസ്സയിലെ സയണിസ്റ്റ് കൂട്ടക്കൊലയെയോ ഫലസ്തീനെയോ പരാമാര്‍ശിക്കുന്ന ഒരു സെഷനും ഇല്ലാ എന്ന കൊടിയ അനീതിയെ വിമര്‍ശന വിധേയമാക്കിക്കൊണ്ട് കൂടിയാണ് ഫെസ്റ്റിവലിന്റെ അതേ സന്ദര്‍ഭത്തില്‍ തന്നെ കോഴിക്കോട് ബീച്ചില്‍ ഇത്തരം ഒരു ഫലസ്തീന്‍ ഐക്യദാര്‍ഢ്യപ്പരിപാടിക്ക് സോളിഡാരിറ്റി നേതൃത്വം നല്‍കിയതെന്നും അദ്ദേഹം കൂട്ടിച്ചേര്‍ച്ചു. അന്താരാഷ്ട്ര തലത്തില്‍ പ്രശസ്തനായ പ്രമുഖ കാലിഗ്രഫി ആര്‍ട്ടിസ്റ്റ് കരീംഗ്രഫി ലൈവ് ഗ്രാഫിറ്റി പ്രദര്‍ശനത്തിന് നേതൃത്വം നല്‍കി.
ഹന്‍ദല ബീറ്റ്‌സ് എന്ന തലക്കെട്ടില്‍ അരങ്ങേറിയ റാപ്പ് സോങ് അവതരണവും, ഡോ.സിദ്‌റത്തുല്‍ മുന്‍തഹ നേതൃത്വം നല്‍കിയ ഫലസ്തീന്‍ ഐക്യദാര്‍ഢ്യ സോങ്‌സ് ആലാപനവും സംഗമത്തെ ശ്രദ്ധേയമാക്കി. സോളിഡാരിറ്റി സംസ്ഥാന ജനറല്‍ സെക്രട്ടറി ടി.ഇസ്മായീല്‍ വിജയാഹ്ലാദ സംഗമത്തില്‍ സമാപന സന്ദേശം കൈമാറി.സോളിഡാരിറ്റി ജില്ലാ പ്രസിഡന്റ് അഫീഫ് ഹമീദ് സ്വാഗതം പറഞ്ഞു. സോളിഡാരിറ്റി സംസ്ഥാന സെക്രട്ടറി റഷാദ് വി.പി, സോളിഡാരിറ്റി സംസ്ഥാന കൗണ്‍സില്‍ അംഗങ്ങളായി സജീര്‍ എടച്ചേരി, റഹ്മാന്‍ ഇരിക്കൂര്‍, അസ്‌ലഹ് കക്കോടി എന്നിവര്‍ പരിപാടിക്ക് നേതൃത്വം നല്‍കി