അതിവേഗ സെഞ്ച്വറിയുമായി തൃശൂരിന് ഉജ്ജ്വല വിജയമൊരുക്കി വിഷ്ണു വിനോദ്
ലീഗില്‍ ഈ സീസണില്‍ ഇത് വരെ കണ്ട ഏറ്റവും മികച്ച ഇന്നിങ്‌സ്. ഒരു പരിധി വരെ ആഭ്യന്തര ട്വന്റി 20 ലീഗുകളിലെ ഏറ്റവും മികച്ച പ്രകടനങ്ങളിലൊന്ന്. ആലപ്പി മുന്നില്‍ വച്ച ലക്ഷ്യത്തിലേക്ക് ഏറെക്കുറെ ഒറ്റയ്ക്ക് ബാറ്റ് വീശുകയായിരുന്നു വിഷ്ണു വിനോദ്.ലീഗില്‍ ഇത് വരെ അര്‍ദ്ധ സെഞ്ച്വറി പൂര്‍ത്തിയാക്കാന്‍ കഴിയാതിരുന്ന വിഷ്ണു നൂറിന്റെ തിളക്കവുമായി മാന്‍ ഓഫ് ദി മാച്ച് പുരസ്‌കാരവും സ്വന്തമാക്കി. 139 റണ്‍സാണ് വിഷ്ണു നേടിയത്.
182 റണ്‍സെന്ന വലിയ ലക്ഷ്യം മുന്നില്‍ക്കണ്ടാണ് തൃശൂര്‍ ബാറ്റിങ് നിരയില്‍ ചെറിയൊരു മാറ്റം വരുത്തിയത്. ആദ്യമായി വിഷ്ണു വിനോദ് ഓപ്പണിങ് സ്ഥാനത്തേക്ക്. തുടക്കം മുതല്‍ ആ ലക്ഷ്യബോധത്തോടെ തന്നെ വിഷ്ണു വിനോദ് ബാറ്റ് വീശി. ആദ്യ ഓവറില്‍ സ്വന്തം അക്കൌണ്ട് തുറന്നത് തന്നെ ബൌണ്ടറിയിലൂടെയായിരുന്നു.ആ ഓവറില്‍ തന്നെ വീണ്ടുമൊരു സിക്‌സ്. ഇന്നിങ്‌സില്‍ ഉടനീളം ഇതേ വേഗത്തിലായിരുന്നു വിഷണു തുടര്‍ന്നും ബാറ്റ് വീശിയത്. മറുവശത്തുണ്ടായിരുന്ന ഇമ്രാന്‍ അഹമ്മദിന് ഒരു ഘട്ടം വരെ വെറും കാഴ്ചക്കാരന്റെ റോള്‍ മാത്രമായിരുന്നു. അക്ഷയ് ചന്ദ്രന്‍ എറിഞ്ഞ നാലാം ഓവറില്‍ വിഷ്ണു മൂന്ന് സിക്‌സ് നേടി. തൃശൂരിന്റെ സ്‌കോര്‍ 50 കടക്കുമ്പോള്‍ അതില്‍ 48 റണ്‍സും വിഷ്ണുവിന്റെ ബാറ്റില്‍ നിന്നായിരുന്നു. വെറും 33 പന്തിലാണ് വിഷ്ണു സെഞ്ച്വറി തികച്ചത്.
തുടര്‍ന്നും ബൌളര്‍മാര്‍ വിഷ്ണുവിന്റെ ബാറ്റിന്റെ ചൂടറിഞ്ഞു. വിശ്വേശ്വര്‍ സുരേഷ് എറിഞ്ഞ 11ആം ഓവറില്‍ വീണ്ടും മൂന്ന് സിക്‌സ്. അക്ഷയ് ചന്ദ്രന്‍ എറിഞ്ഞ അടുത്ത ഓവറില്‍ രണ്ട് സിക്‌സും ഒരു ഫോറും. വിജയത്തിന് രണ്ട് റണ്‍സ് അകലെ പുറത്തായെങ്കിലും ഐതിഹാസികമായൊരു ഇന്നിങ്‌സിനായിരുന്നു ഗ്രീന്‍ഫീല്‍ഡ് സ്റ്റേഡിയം സാക്ഷ്യം വഹിച്ചത്. 182 റസെന്ന വലിയ ലക്ഷ്യം ടൈറ്റന്‍സ് മറി കടന്നത് 44 പന്ത് ബാക്കി നില്‌ക്കെയാണ്. 45 പന്തില്‍ അഞ്ച് ഫോറും 17 സിക്‌സും അടങ്ങുന്നതായിരുന്നു വിഷ്ണു വിനോദിന്റെ ഇന്നിങ്‌സ്.
കഴിഞ്ഞൊരു പതിറ്റാണ്ടായി ആഭ്യന്തര ക്രിക്കറ്റില്‍ കേരള ബാറ്റിങ്ങിന്റെ കരുത്താണ് വിഷ്ണു വിനോദ്. 2014-15 സീസണില്‍ സയ്യിദ് മുഷ്താഖ് അലി ടൂര്‍ണ്ണമെന്റിലൂടെ കേരളത്തിനായി അരങ്ങേറിയ വിഷ്ണു പിന്നീട് എല്ലാ ഫോര്‍മാറ്റിലും കേരള ടീമിലെ സ്ഥിര സാന്നിധ്യമായി. ഐപിഎല്ലില്‍ ബാംഗ്ലൂര്‍, ഡല്‍ഹി, ഹൈദരാബാദ് തുടങ്ങിയ ടീമുകളിലിടം നേടിയെങ്കിലും മൂന്ന് മല്‌സരം മാത്രമാണ് കളിക്കാനായത്. കേരള ക്രിക്കറ്റ് ലീഗിലെ പ്രകടനം വിഷ്ണുവിന് ഐപിഎല്ലില്‍ വീണ്ടും അവസരങ്ങളൊരുക്കുമെന്ന് പ്രതീക്ഷിക്കാം.