'കണ്ണിൽ തീയുമായി അവൾ തിരിച്ചെത്തുന്നു..'; മലയാളത്തിന്റെ സ്വന്തം ഭാവനയുടെ 90-ാം ചിത്രം; 'അനോമി' ഉടന് തിയറ്ററുകളിലേക്ക് എത്തും; പ്രതീക്ഷയിൽ ആരാധകർ
മലയാളത്തിന്റെ പ്രിയതാരം ഭാവനയുടെ 90-ാമത് ചിത്രമായ 'അനോമി' ഉടൻ തിയേറ്ററുകളിലെത്തും. 23 വർഷം നീണ്ട സിനിമാ ജീവിതത്തിലെ പുതിയൊരു വഴിത്തിരിവായേക്കാവുന്ന ഈ ചിത്രത്തിൽ, വൈകാരികമായി ആഴമുള്ള ഫോറൻസിക് അനലിസ്റ്റ് 'സാറ' എന്ന കഥാപാത്രത്തെയാണ് ഭാവന അവതരിപ്പിക്കുന്നത്. നവാഗതനായ റിയാസ് മാരാത്ത് തിരക്കഥയെഴുതി സംവിധാനം ചെയ്യുന്ന ഈ കുറ്റാന്വേഷണ ചിത്രത്തിൽ, നടൻ റഹ്മാൻ മറ്റൊരു പ്രധാന കഥാപാത്രമായ ഇൻവെസ്റ്റിഗേഷൻ ഓഫീസറായി എത്തുന്നു.
സാധാരണ കുറ്റാന്വേഷണ സിനിമകളിൽ നിന്ന് വ്യത്യസ്തമായി, പാരലൽ അന്വേഷണ സാധ്യതകളെ ക്രിയാത്മകമായി ഉപയോഗപ്പെടുത്തുന്ന ഒരു ചിത്രമായിരിക്കും 'അനോമി'. 'നമ്മൾ' എന്ന ചിത്രത്തിലൂടെ വെള്ളിത്തിരയിലെത്തി, തെന്നിന്ത്യൻ സിനിമയിൽ തന്റേതായ ഇടം കണ്ടെത്തിയ ഭാവനയുടെ കരിയറിലെ ഒരു സുപ്രധാന നാഴികക്കല്ലായി ഈ ചിത്രം മാറുമെന്നാണ് അണിയറപ്രവർത്തകർ പ്രതീക്ഷിക്കുന്നത്. 'ധ്രുവങ്ങൾ 16' ഉൾപ്പെടെയുള്ള ചിത്രങ്ങളിലെ ശ്രദ്ധേയമായ കുറ്റാന്വേഷണ വേഷങ്ങൾക്ക് ശേഷം, റഹ്മാൻ മലയാളത്തിൽ വീണ്ടും ഒരു കരുത്തുറ്റ ഇൻവെസ്റ്റിഗേഷൻ ഓഫീസറായി എത്തുന്നു എന്നതും ചിത്രത്തിന്റെ പ്രത്യേകതയാണ്.
ബിനു പപ്പു, വിഷ്ണു അഗസ്ത്യ, അർജുൻ ലാൽ, ഷെബിൻ ബെൻസൺ, ദൃശ്യ രഘുനാഥ് എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. ഗുൽഷൻ കുമാർ, ഭൂഷൺ കുമാർ, ടി-സീരീസ് ഫിലിംസ്, പനോരമ സ്റ്റുഡിയോസ് എന്നിവർ ചേർന്ന് അവതരിപ്പിക്കുന്ന 'അനോമി' നിർമ്മിക്കുന്നത് കുമാർ മംഗത് പഥക്, അഭിഷേക് പഥക് എന്നിവരാണ്. കോൺഫിഡൻ്റ് ഗ്രൂപ്പ് ചെയർമാൻ ഡോ. റോയ് സി.ജെ, ബ്ലിറ്റ്സ്ക്രീഗ് ഫിലിംസ്, എ.പി.കെ. സിനിമ എന്നിവരും ഭാവന ഫിലിം പ്രൊഡക്ഷൻസിന്റെ ബാനറിൽ അഭിനേത്രി ഭാവനയും നിർമ്മാണ പങ്കാളികളാണ്.
ദേശീയതലത്തിൽ ശ്രദ്ധിക്കപ്പെട്ട 'അനിമൽ', 'അർജുൻ റെഡ്ഡി' എന്നീ ചിത്രങ്ങൾക്ക് സംഗീതമൊരുക്കിയ ഹർഷവർദ്ധൻ രാമേശ്വർ ആണ് 'അനോമി'യുടെ സംഗീത സംവിധാനം നിർവഹിക്കുന്നത്. സുജിത് സാരംഗ് ഛായാഗ്രഹണവും കിരൺ ദാസ് ചിത്രസംയോജനവും കൈകാര്യം ചെയ്യുന്നു. ആക്ഷൻ സന്തോഷ് (ആക്ഷൻ ഡയറക്റ്റർ), സമീറ സനീഷ് (വസ്ത്രാലങ്കാരം), യെല്ലോടൂത്ത് (പബ്ലിസിറ്റി ഡിസൈൻസ്), സ്നേക്ക് പ്ലാന്റ് എൽ.എൽ.പി (വിഷ്വൽ പ്രൊമോഷൻസ്), അപർണ ഗിരീഷ് (പി.ആർ.ഒ) എന്നിവരാണ് മറ്റ് അണിയറ പ്രവർത്തകർ.