'പാമ്പിന്റെ ബീജം ചേര്‍ത്ത കോക്‌ടെയില്‍; അതാണ് തന്റെ ശബ്ദത്തിന്റെ രഹസ്യം; വോക്കല്‍ കോഡുകള്‍ മികച്ചതാകും'; വെളിപ്പെടുത്തി അമേരിക്കന്‍ ഗായിക ജെസീക്ക സിംപ്‌സണ്‍
പാമ്പിന്റെ ബീജം ചേര്‍ത്ത പാനീയമാണ് തന്റെ ശബ്ദത്തിന്റെ രഹസ്യമെന്ന് വെളിപ്പെടുത്തി അമേരിക്കന്‍ ഗായിക ജെസീക്ക സിംപ്‌സണ്‍. വോക്കല്‍ കോഡുകള്‍ മികച്ചതാക്കാന്‍ സ്‌പേം കോക്ടെയിലുകള്‍ കുടിക്കാറുണ്ട് എന്നാണ് ഗായിക തുറന്നു പറഞ്ഞിരിക്കുന്നത്. ഇന്‍സ്റ്റഗ്രാമില്‍ പങ്കുവച്ച ഒരു വീഡിയോയിലാണ് ജെസീക്ക സംസാരിച്ചത്.
ഇത് കുടിക്കുന്നത് ആളുകള്‍ക്ക് മോശമായി തോന്നിയേക്കാം. തേനിനു തുല്യമാണ് ഈ പാനീയത്തിന്റെ സ്വാദ്. എന്റെ പാട്ട് മികച്ചതാക്കാന്‍ ഇത് ഏറെ സഹായിച്ചിട്ടുണ്ട്. നല്ല ശബ്ദം വേണമെങ്കില്‍ നിങ്ങളും ഈ വിദ്യ പരീക്ഷിക്കൂ. ഈ പാനീയത്തില്‍ പാമ്പിന്‍ ബീജം അടങ്ങിയിരിക്കുന്ന കാര്യം എനിക്ക് ആദ്യം അറിയില്ലായിരുന്നു.
അതിലെ ചേരുവകള്‍ വായിച്ച സുഹൃത്തുക്കളാണ് അക്കാര്യം എന്റെ ശ്രദ്ധയില്‍പ്പെടുത്തിയത്. ഞാന്‍ സ്‌പേം കോക്ടെയിലുകള്‍ കുടിക്കുന്നത് ശരി തന്നെ. എന്നാല്‍ ജീവിതത്തില്‍ ഇന്നുവരെ എനിക്ക് മദ്യത്തോട് ആസക്തി തോന്നിയിട്ടില്ല. മദ്യപിക്കില്ല എന്നത് എനിക്കും കുടുംബത്തിനും വേണ്ടി എടുത്ത ഏറ്റവും മികച്ച തീരുമാനമാണ് എന്നാണ് ജെസീക്ക പറയുന്നത്.
ശബ്ദം മികച്ചതാക്കാന്‍ ഗായകര്‍ ഇത്തരം രീതികള്‍ സ്വീകരിക്കുന്നതില്‍ അതിശയം തോന്നുന്നു എന്നുള്ള കമന്റുകളാണ് ജെസീക്കയുടെ വീഡിയോക്ക് താഴെ എത്തുന്നത്. സ്വീറ്റ് കിസ്സസ് എന്ന ആല്‍ബത്തിലൂടെ ശ്രദ്ധ നേടിയ ഗായികയാണ് ജെസീക്ക സിംപ്‌സണ്‍. സ്വീറ്റ് കിസ്സസ് ജെസീക്കയുടെ ആദ്യ ആല്‍ബമാണ്. ഇതിന്റെ രണ്ട് മില്യനോളം കോപ്പികള്‍ വിറ്റുപോയിരുന്നു.