'കൂലി'യുടെ റിലീസ് ദിവസം ജീവനക്കാർക്ക് അവധിയും സൗജന്യ ടിക്കറ്റുകളും; ഞെട്ടിക്കുന്ന ഓഫറുകളുമായി സ്വകാര്യ സ്ഥാപനം
ചെന്നൈ: സൂപ്പർതാരം രജനീകാന്തിന്റെ ഏറ്റവും പുതിയ ചിത്രം 'കൂലി'യുടെ റിലീസ് പ്രമാണിച്ച് ജീവനക്കാർക്ക് അവധിയും സൗജന്യ സിനിമാ ടിക്കറ്റുകളും നൽകി തമിഴ്‌നാട്ടിലെ ഒരു സ്വകാര്യ സ്ഥാപനം. മധുര ആസ്ഥാനമായി പ്രവർത്തിക്കുന്ന 'യുനോ അക്വാ കെയർ' ആണ് വ്യാഴാഴ്ചത്തെ റിലീസ് ദിനം ആഘോഷമാക്കാൻ ജീവനക്കാർക്ക് ഈ ആനുകൂല്യം പ്രഖ്യാപിച്ചത്.
ദക്ഷിണേന്ത്യയിൽ നിരവധി ശാഖകളുള്ള കമ്പനി, ചെന്നൈ, ബെംഗളൂരു, തിരുച്ചിറപ്പള്ളി, തിരുനെൽവേലി, ചെങ്കൽപ്പെട്ട് എന്നിവിടങ്ങളിലെ ഓഫീസുകളിലേക്ക് ഇത് സംബന്ധിച്ച ഔദ്യോഗിക സർക്കുലർ അയച്ചു. സിനിമയുടെ റിലീസ് ദിവസം ജീവനക്കാർക്ക് അവധി നൽകുന്നതിനൊപ്പം, അനാഥാലയങ്ങളിലും വൃദ്ധസദനങ്ങളിലും ഭക്ഷണവും സംഭാവനകളും വിതരണം ചെയ്യുമെന്നും കമ്പനി വ്യക്തമാക്കി.
കൂടാതെ പൊതുജനങ്ങൾക്ക് മധുരം നൽകുമെന്നും കമ്പനി അറിയിച്ചിട്ടുണ്ട്. ലോകേഷ് കനകരാജ് സംവിധാനം ചെയ്യുന്ന ചിത്ര മാണ് 'കൂലി'. ജീവനക്കാർക്കുള്ള കമ്പനിയുടെ ഈ അറിയിപ്പ് ഇതിനകം സാമൂഹിക മാധ്യമങ്ങളിൽ വ്യാപകമായി പ്രചരിച്ചിട്ടുണ്ട്.