'ഇരയും കുറ്റവാളിയും ഇതിഹാസവും'; ശക്തമായ സ്ത്രീ കഥാപാത്രവുമായി അനുഷ്ക ഷെട്ടി; 'ഘാട്ടി'യുടെ ഫസ്റ്റ് ഗ്ലിംപ്സ് വീഡിയോ പുറത്ത്
തെന്നിന്ത്യൻ പ്രേക്ഷകരുടെ പ്രിയ താരമാണ് അനുഷ്ക ഷെട്ടി. തെലുങ്കിൽ വീണ്ടുമൊരു തിരിച്ചു വരവിനൊരുങ്ങുകയാണ് താരമിപ്പോൾ. അനുഷ്‍കയുടെ ആരാധകർക്ക് ആവേശം നൽകുന്ന വാർത്തയാണ് താരത്തിന്റെ പിറന്നാൾ ദിനത്തിൽ പുറത്ത് വന്നത്. 'ഘാട്ടി' എന്ന വരാനിരിക്കുന്ന ചിത്രത്തിന്റെ ഫസ്റ്റ് ലുക്ക് വീഡിയോ ആണ് ഇപ്പോൾ സമൂഹ മാധ്യമങ്ങളിൽ ശ്രദ്ധ നേടുകയാണ്.
കൃഷ് സംവിധാനം ചെയ്യുന്ന ചിത്രം യുവി ക്രിയേഷൻസിന്റെ ബാനറിൽ രാജീവ് റെഡ്ഡിയും സായ് ബാബുവും ചേർന്നാണ് നിർമ്മിക്കുന്നത്. ബ്ലോക്ക്ബസ്റ്റർ ഹിറ്റായ 'വേദം' എന്ന ചിത്രത്തിന് ശേഷം അനുഷ്കയും കൃഷും ഒന്നിക്കുന്ന ചിത്രം കൂടിയാണിത്.
45 സെക്കൻഡ് ദൈർഘ്യമുള്ള വീഡിയോ ആണ് പുറത്ത് വന്നത്. 'ഇരയും കുറ്റവാളിയും ഇതിഹാസവുമായ ഒരു സ്ത്രീയുടെ കഥ' എന്ന ടാഗ് ലൈനാണ് വീഡിയോയ്ക്ക് അണിയറ പ്രവർത്തകർ നൽകിയിരിക്കുന്നത്. ശക്തമായ കഥാപാത്രവുമായാണ് താരം എത്തുന്നത്.
ബിഗ് ബഡ്‌ജറ്റിൽ ഒരുങ്ങുന്ന ചിത്രം തെലുങ്ക്, തമിഴ്, കന്നഡ, മലയാളം, ഹിന്ദി ഭാഷകളിലാണ് പുറത്തിറങ്ങുന്നത്. മനോജ് റെഡ്ഡി കടസാനി ഛായാഗ്രഹണം നിർവഹിക്കുന്ന ചിത്രത്തിന്റെ എഡിറ്റർ ചാണക്യ റെഡ്ഡി തുരുപ്പു ആണ്. നാഗവെല്ലി വിദ്യാ സാഗർ സംഗീത സംവിധായകൻ.