വ്യത്യസ്ത ലൂക്കുകളിൽ കമൽ ഹാസൻ; ആകാംഷ നിറച്ച് മണി രത്നത്തിന്റെ 'തഗ് ലൈഫ്'; ടീസർ പുറത്ത്; റിലീസ് തീയതിയും പ്രഖ്യാപിച്ചു

വലിയ പ്രതീക്ഷകളോടെ എത്തുന്ന കമൽ ഹാസൻ ചിത്രമാണ് 'തഗ് ലൈഫ്'. നീണ്ട 37 വർഷങ്ങൾക്കിപ്പുറം കമൽ ഹാസനും മണി രത്നവും ഒന്നിക്കുന്നു എന്നത് തന്നെയാണ് ചിത്രത്തിന്റെ ഏറ്റവും വലിയ പ്രത്യേകത. കമൽ ഹാസന്റെ രാജ്കമൽ ഫിലിംസിനൊപ്പം മണി രത്നത്തിൻറെ മദ്രാസ് ടാക്കീസും ഉദയനിധി സ്റ്റാലിൻറെ റെഡ് ജയൻറ് മൂവീസും ചേർന്നാണ് ചിത്രം നിർമിക്കുന്നത്. ചിത്രത്തിന്റെ പുതിയ അപ്ഡേറ്റുമായി എത്തിയിരിക്കുകയാണ് അണിയറ പ്രവർത്തകർ. 45 സെക്കൻഡ് ദൈർഖ്യമുള്ള ടീസർ ഇപ്പോൾ പുറത്ത് വന്നിരിക്കുകയാണ്. 2025 ജൂൺ 5ന് ചിത്രം തീയറ്ററുകളിൽ എത്തുമെന്നാണ് പ്രഖ്യാപനം.

ചിത്രത്തിൽ 'രംഗരായ ശക്തിവേൽ നായ്ക്കർ' എന്ന കഥാപാത്രത്തെയാണ് കമൽ ഹാസൻ അവതരിപ്പിക്കുന്നത്. ആക്ഷന് പ്രാധാന്യം നൽകി ഒരുക്കുന്ന ചിത്രത്തിൽ രണ്ട് വ്യത്യസ്ത വേഷങ്ങളിൽ കമൽ ഹാസൻ എത്തുന്നു എന്നാണ് ടീസറിൽ നിന്നും മനസ്സിലാക്കാൻ കഴിയുന്നത്. നടൻ ചിമ്പുവും ചിത്രത്തിലെ മറ്റൊരു പ്രധാന കഥാപാത്രത്തെ അവതരിപ്പിക്കുന്നുണ്ട്.

കൂടാതെ ജോജു ജോർജ്, തൃഷ, അഭിരാമി, ഐശ്വര്യാ ലക്ഷ്മി, നാസർ, അശോക് സെൽവൻ, അലി ഫസൽ, പങ്കജ് ത്രിപാഠി, ജിഷു സെൻഗുപ്ത, സാന്യ മൽഹോത്ര, രോഹിത് ഷറഫ്, വൈയാപുരി തുടങ്ങിയ വൻ താരനിര തന്നെ ചിത്രത്തിലുണ്ട്. മണി രത്‌നത്തിനൊപ്പം പതിവ് സഹപ്രവർത്തകരായ സംഗീതസംവിധായകൻ എ.ആർ റഹ്‌മാനും എഡിറ്റർ ശ്രീകർ പ്രസാദും ഈ ചിത്രത്തിലും ഒരുമിക്കുന്നത് ആരാധകരെ ആവേശത്തിലാഴ്ത്തിയിരിക്കുകയാണ്. രവി കെ ചന്ദ്രൻ ആണ് ഛായാഗ്രാഹകൻ.