'വൺ ഫോർ ലവ്, വൺ ഓൺ എ മിഷൻ'; പാൻ ഇന്ത്യൻ ആക്ഷൻ ത്രില്ലറുമായി എസ് ജെ സൂര്യ; 'കില്ലർ' ഫസ്റ്റ് ലുക്ക് പുറത്ത്

ചെന്നൈ: എസ് ജെ സൂര്യ നായകനായെത്തുന്ന പാൻ ഇന്ത്യൻ ആക്ഷൻ ത്രില്ലർ ചിത്രത്തിന്റെ ഫസ്റ്റ് ലുക്ക് പുറത്ത്. 'കില്ലർ' എന്ന് പേരിട്ടിരിക്കുന്ന ചിത്രത്തിന്റെ കഥയും തിരക്കഥയും സംഭാഷണവും നിർവഹിക്കുന്നത് എസ് ജെ സൂര്യയാണ്. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനും എസ് ജെ സൂര്യയുടെ നിർമാണ കമ്പനിയായ എയ്ഞ്ചൽ സ്റ്റുഡിയോസും ചേർന്നാണ് ചിത്രം നിർമ്മിക്കുന്നത്. 'വൺ ഫോർ ലവ്, വൺ ഓൺ എ മിഷൻ' എന്ന ടാഗ് ലൈനോടെയാണ് ഫസ്റ്റ് ലുക്ക് പുറത്ത് വിട്ടിരിക്കുന്നത്. താരത്തിന്റെ പിറന്നാൾ ദിവസമാണ് പോസ്റ്റർ പുറത്ത് വിട്ടിരിക്കുന്നത്.

രണ്ട് പോസ്റ്ററുകളാണ് പുറത്തിറങ്ങിയത്. ഒന്നിൽ കൈയിൽ തോക്കുമായി സ്റ്റൈലിഷ് ലുക്കിൽ നിൽക്കുന്ന എസ് ജെ സൂര്യയും, മറ്റൊന്നിൽ പ്രീതി അസ്രാണിയെ തോളിൽ ചുമന്ന് മറുകൈയിൽ തോക്കുമായി നിൽക്കുന്ന എസ് ജെ സൂര്യയുമാണുള്ളത്. പ്രീതി അസ്രാനി ആണ് ചിത്രത്തിലെ നായിക. ഓസ്കാർ ജേതാവായ എ ആർ റഹ്മാൻ ആണ് ചിത്രത്തിന് സംഗീതമൊരുക്കുന്നത്. ആദ്യമായാണ് ഗോകുലം മൂവീസ് നിർമ്മിക്കുന്ന ചിത്രത്തിൽ എ ആർ റഹ്മാൻ സംഗീത സംവിധായകനായി എത്തുന്നത്.

വാലി, ഖുഷി,ന്യു തുടങ്ങിയ സൂപ്പർ ഹിറ്റ് ചിത്രങ്ങളുടെ സംവിധായകൻ കൂടിയാണ് എസ് ജെ സൂര്യ. 2015ൽ പുറത്തിറങ്ങിയ 'ഇസൈ' ആണ് അവസാനമായി സംവിധാനം ചെയ്ത ചിത്രം. വമ്പൻ താരനിരയെ അണിനിരത്തിയാണ് അദ്ദേഹം 'കില്ലർ' ഒരുക്കുന്നത്. ബിഗ് ബഡ്ജറ്റിൽ നിർമിക്കുന്ന ചിത്രം 5 ഭാഷകളിൽ റിലീസ് ചെയ്യും. കോ പ്രൊഡ്യൂസെഴ്‌സ് : ബൈജു ഗോപാലൻ, വി സി പ്രവീൺ, എക്സിക്യൂട്ടീവ് പ്രൊഡ്യൂസർ: കൃഷ്ണമൂർത്തി.