രസകരമായ ജീവിത നേർക്കാഴ്ചയുമായി പ്രേക്ഷകരെ ചിരിപ്പിക്കാൻ ലുക്മാൻ; 'കുണ്ടന്നൂരിലെ കുത്സിതലഹള' പ്രദർശനത്തിനെത്തുന്നു
ലുക്മാൻ അവറാനെ കേന്ദ്ര കഥാപാത്രമാക്കി അക്ഷയ് അശോക് തിരക്കഥയെഴുതി സംവിധാനം ചെയ്യുന്ന 'കുണ്ടന്നൂരിലെ കുത്സിതലഹള' എന്ന ചിത്രം റിലീസിനൊരുങ്ങുന്നു. കേഡര്‍ സിനി ക്രിയേഷൻസിന്റെ ബാനറിൽ അജി പി ജോസ് ആണ് ചിത്രത്തിന്റെ നിർമാണം. വീണ നായർ, ആശ മഠത്തിൽ എന്നിവർ മറ്റ് പ്രധാന കഥാപാത്രങ്ങളെ അവതരിപ്പിക്കുന്നു.
നേരത്തെ, ട്രെയ്‌ലർ പുറത്തുവന്നത് മുതൽ ചിത്രം ഏറെ ചർച്ചാ വിഷയമായിരുന്നു. കഴിഞ്ഞ ഡിസംബറിൽ റിലീസായ ചിത്രത്തിന്റെ ട്രെയ്‌ലർ യൂട്യൂബിൽ ഒരു മില്ല്യൺ കാഴ്ചക്കാർ കടന്നിരുന്നു.
കുണ്ടന്നൂർ എന്ന ഗ്രാമത്തിലെ സാധാരണക്കാരായ മനുഷ്യരുടെ രസകരമായ കഥയാണ് ചിത്രം പറയുന്നത്. ട്രെയ്‌ലറിൽ തൊഴിലുറപ്പ് സ്ത്രീകൾ തമ്മിലുള്ള ആക്ഷൻ രംഗങ്ങൾ സമൂഹ മാധ്യമങ്ങളിൽ വലിയ സ്വീകാര്യത നേടി. റോബിൻ ടോം ആണ് ചിത്രത്തിന്റെ ആക്ഷൻ കൊറിയോഗ്രഫർ.
ജെയിൻ ജോർജ്, സുനീഷ് സാമി, പ്രദീപ് ബാലൻ, ദാസേട്ടൻ കോഴിക്കോട്, സെൽവരാജ്, ബേബി, മേരി, അനുരദ് പവിത്രൻ, അധിൻ ഉള്ളൂർ, സുമിത്ര, ആദിത്യൻ എന്നിവർക്കൊപ്പം നിരവധി പുതുമുഖങ്ങളും ഈ ചിത്രത്തിൽ അഭിനയിക്കുന്നു. ഫജു എ വി ചിത്രത്തിന്റെ ഛായാഗ്രഹണം നിർവ്വഹിച്ചിരിക്കുന്നത്. മെൽവിൻ മൈക്കിളിന്റെ സംഗീത്തിന് അക്ഷയ് അശോക്, ജിബിൻ കൃഷ്ണ, മുരുകൻ മന്ദിരം എന്നിവരാണ് വരികൾ എഴുതിയത്.