മലയാളത്തിൽ അരങ്ങേറ്റം കുറിക്കാൻ തമിഴ് നടൻ 'കതിർ'; നിഗൂഢത നിറച്ച് എംസി ജോസഫ് സംവിധാനം ചെയ്യുന്ന 'മീശ'; ഫസ്റ്റ് ലുക്ക് പോസ്റ്റർ പുറത്ത്

പരിയേരും പെരുമാൾ, വിക്രം വേദ എന്നീ ചിത്രങ്ങളിലൂടെ ജനപ്രീതി നേടിയ തമിഴ് താരമാണ് കതിർ. മലയാളികൾക്കും സുപരിചിതനാണ് താരം. മലയാളത്തിലും അരങ്ങേറ്റം കുറിക്കാൻ ഒരുങ്ങുകയാണ് കതിർ. 'വികൃതി' എന്ന ചിത്രത്തിലൂടെ ശ്രദ്ധേയനായ എംസി ജോസഫ് സംവിധാനം ചെയ്യുന്ന ഏറ്റവും പുതിയ ചിത്രമായ 'മീശ'യിലൂടെയാണ് കതിർ മലയാളത്തിൽ എത്തുക. കഴിഞ്ഞ ദിവസം ചിത്രത്തിന്റെ ഫസ്റ്റ് ലുക്ക് പോസ്റ്റർ അണിയറ പ്രവർത്തകർ പുറത്ത് വിട്ടിരുന്നു. കാട് പശ്ചാത്തലമായി കാണിച്ചിരിക്കുന്ന പോസ്റ്ററാണ് പുറത്ത് വന്നത്.

ഷൈൻ ടോം ചാക്കോ, ഹക്കിം ഷാ, സുധി കോപ്പ, ശ്രീകാന്ത് മുരളി, ജിയോ ബേബി എന്നിവർ ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നു. സുരേഷ് രാജൻ ഛായാഗ്രഹണവും മനോജ് എഡിറ്റിംഗും നിർവഹിക്കുന്ന ചിത്രത്തിനായി സൂരജ് എസ് കുറുപ്പിൻ്റെ സംഗീതം ഒരുക്കുന്നു. യൂണികോൺ മൂവീസിൻ്റെ ബാനറിൽ സജീർ ഗഫൂർ ആണ് നിർമ്മാണം.

അതേസമയം, കതിറിന്റെ എസ്എ ൽ എസ് ഹെൻറി സംവിധാനം ചെയ്യുന്ന 'മാനവൻ' റിലീസിനായി തയ്യാറെടുക്കുകയാണ്. കൂടാതെ പ്രൈം വീഡിയോ സീരീസായ സുഴൽ - ദി വോർട്ടക്‌സിൻ്റെ രണ്ടാം സീസണിലും താരം ഒരു പ്രധാന വേഷത്തിൽ എത്തുന്നുണ്ട്.