അരുൺ ബോസ് ഒരുക്കുന്ന ഉണ്ണി മുകുന്ദൻ ചിത്രം; നായിക അപർണ ബാലമുരളി; 'മിണ്ടിയും പറഞ്ഞും' തിയറ്ററുകളിലേക്ക്; റിലീസ് ഡിസംബർ 25ന്

കൊച്ചി: അരുൺ ബോസ് സംവിധാനം ചെയ്യുന്ന 'മിണ്ടിയും പറഞ്ഞും' എന്ന ചിത്രം 2025 ഡിസംബർ 25-ന് തിയറ്ററുകളിൽ റിലീസ് ചെയ്യും. ഉണ്ണി മുകുന്ദനെയും അപർണ ബാലമുരളിയെയും പ്രധാന കഥാപാത്രങ്ങളാക്കി ഒരുങ്ങുന്ന ഈ ചിത്രം രണ്ടു വർഷം മുൻപ് സെൻസറിങ് പൂർത്തിയാക്കിയെങ്കിലും ചില കാരണങ്ങളാൽ റിലീസ് വൈകുകയായിരുന്നു.

'ലൂക്ക', 'മാരിവില്ലിൻ ഗോപുരം' എന്നീ ചിത്രങ്ങൾക്കുശേഷം അരുൺ ബോസ് സംവിധാനം ചെയ്യുന്ന ചിത്രമാണിത്. അരുൺ ബോസും മൃദുൽ ജോർജും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. സൂരജ് എസ്‌. കുറുപ്പ് സംഗീതവും മധു അമ്പാട്ട് ഛായാഗ്രഹണവും നിർവഹിച്ചിരിക്കുന്നു. കിരൺ ദാസ് എഡിറ്റിങ്ങും അനീസ് നാടോടി കലാസംവിധാനവും ഗായത്രി കിഷോർ വസ്ത്രാലങ്കാരവും നിർവഹിച്ചിട്ടുണ്ട്.

ജൂഡ് ആന്തണി ജോസഫ്, ജാഫർ ഇടുക്കി, മാല പാർവതി, സഞ്ജു മധു, സോഹൻ സീനുലാൽ, ഗീതി സംഗീത, പ്രശാന്ത് മുരളി, ആതിര സുരേഷ് എന്നിവരും ചിത്രത്തിൽ പ്രധാന കഥാപാത്രങ്ങളായി എത്തുന്നുണ്ട്. ജാഗ്വാർ സ്റ്റുഡിയോസാണ് ചിത്രം തിയറ്ററുകളിലെത്തിക്കുന്നത്. നീണ്ട കാത്തിരിപ്പിനൊടുവിൽ റിലീസിനെത്തുന്ന ഈ ചിത്രം പ്രേക്ഷകരിൽ വലിയ പ്രതീക്ഷയാണ് ഉണർത്തുന്നത്.