മസൈജു കുറുപ്പിന്റെ 150-ാം ചിത്രത്തിൽ വൻ സർപ്രൈസ്; ഭരതനാട്യത്തിന് പിന്നാലെ ഇനി 'മോഹിനിയാട്ടം'; ഫസ്റ്റ് ലുക്ക് പോസ്റ്റർ പുറത്ത്

കൊച്ചി: മലയാള സിനിമയിൽ ഇതുവരെ കാണാത്ത വേറിട്ട പ്രൊമോഷൻ തന്ത്രങ്ങളുമായി സൈജു കുറുപ്പിന്റെ പുതിയ ചിത്രം "ഭരതനാട്യം 2: മോഹിനിയാട്ടം" എത്തുന്നു. തോമസ് തിരുവല്ല ഫിലിംസും സൈജു കുറുപ്പ് എന്റർടൈൻമെന്റ്‌സും ചേർന്ന് നിർമ്മിക്കുന്ന ചിത്രത്തിന്റെ ഫസ്റ്റ് ലുക്ക് അനൗൺസ്‌മെന്റാണ് ആരാധകരെ അമ്പരപ്പിച്ചിരിക്കുന്നത്. സാധാരണ ഗതിയിൽ സൂപ്പർ താരങ്ങൾ പോസ്റ്ററുകൾ പുറത്തിറക്കുമ്പോൾ, ഇവിടെ മലയാളത്തിലെ കരുത്തുറ്റ വില്ലൻ കഥാപാത്രങ്ങളാണ് ചിത്രം പരിചയപ്പെടുത്തുന്നത്.

വില്ലന്മാർ തുടങ്ങിയ മോഹിനിയാട്ടം:

കളം കാവലിലെ സ്റ്റാൻലി ദാസ്, കമ്മാര സംഭവത്തിലെ കമ്മാരൻ നമ്പ്യാർ, മാർക്കോ എന്നീ 'ഐക്കോണിക്' കഥാപാത്രങ്ങളിലൂടെയാണ് ചിത്രത്തിന്റെ ഫസ്റ്റ് ലുക്ക് പുറത്തുവന്നത്. എന്തുകൊണ്ടാണ് ഈ വില്ലൻ കഥാപാത്രങ്ങൾ സൈജു കുറുപ്പിന്റെ ചിത്രത്തിന് കൈകോർക്കുന്നത് എന്ന ആകാംക്ഷയിലാണ് സിനിമാ ലോകം. ഒരു സ്ലോ പോയിസൺ പോലെ പ്രേക്ഷകരിലേക്ക് നിഗൂഢത പടർത്താൻ ഈ നീക്കത്തിലൂടെ അണിയറ പ്രവർത്തകർക്ക് സാധിച്ചിട്ടുണ്ട്.

സൈജു കുറുപ്പിന്റെ മൈൽസ്റ്റോൺ ചിത്രം:

സൈജു കുറുപ്പിന്റെ കരിയറിലെ 150-ാം ചിത്രം എന്ന പ്രത്യേകതയും മോഹിനിയാട്ടത്തിനുണ്ട്. കൃഷ്ണദാസ് മുരളി സംവിധാനം ചെയ്യുന്ന ചിത്രം ഡാർക്ക് ഹ്യൂമർ (ഇരുണ്ട ഹാസ്യം) ശൈലിയിലാണ് ഒരുങ്ങുന്നത്. ലിനി മറിയം ഡേവിഡ്, അനുപമ ബി. നമ്പ്യാർ എന്നിവരാണ് നിർമ്മാതാക്കൾ. വിഷ്ണു ആർ. പ്രദീപ്, കൃഷ്ണദാസ് മുരളി എന്നിവർ ചേർന്ന് തിരക്കഥയൊരുക്കുന്നു. ബബ്ലു അജുവാണ് ഛായാഗ്രഹണം. ഇലക്ട്രോണിക് കിളിയുടേതാണ് സംഗീതം.