ഗണപതിയും സാഗർ സൂര്യയും പ്രധാന വേഷങ്ങളിൽ എത്തുന്ന ഹൊറർ കോമഡി; 'പ്രകമ്പനം' ജനുവരി 30ന് തിയറ്ററുകളിൽ എത്തും

കൊച്ചി: ഗണപതിയും സാഗർ സൂര്യയും പ്രധാന വേഷങ്ങളിൽ എത്തുന്ന ഹൊറർ കോമഡി ചിത്രമായ 'പ്രകമ്പനം' ജനുവരി 30ന് തിയറ്ററുകളിൽ എത്തും. യുവതലമുറയെ ലക്ഷ്യമിട്ട് ഒരുക്കിയിരിക്കുന്ന ഈ മുഴുനീള എന്റർടെയ്‌നർ, നവരസ ഫിലിംസും കാർത്തിക് സുബ്ബരാജിന്റെ പ്രൊഡക്ഷൻ കമ്പനിയായ സ്റ്റോൺ ബെഞ്ച് സ്റ്റുഡിയോയും ചേർന്നാണ് അവതരിപ്പിക്കുന്നത്. ഹാസ്യവും ഹൊററും ചേർന്ന വ്യത്യസ്തമായൊരു സിനിമാനുഭവമാണ് ചിത്രം പ്രേക്ഷകർക്ക് സമ്മാനിക്കുകയെന്ന് അണിയറപ്രവർത്തകർ അറിയിച്ചു.

‘നദികളിൽ സുന്ദരി’ എന്ന ചിത്രത്തിനു ശേഷം വിജേഷ് പാണത്തൂർ സംവിധാനം ചെയ്യുന്ന ചിത്രം കൂടിയാണിത്. ശ്രീജിത്ത് കെ.എസ്, കാർത്തികേയൻ എസ്, സുധീഷ് എൻ എന്നിവരാണ് നിർമ്മാണം. വിവേക് വിശ്വം ഐ.എം, പി. മോൻസി, റിജോഷ്, ദിലോർ, ബ്ലെസ്സി എന്നിവർ കോ-പ്രൊഡ്യൂസേഴ്സാണ്. അഭിജിത്ത് സുരേഷാണ് എക്സിക്യൂട്ടീവ് പ്രൊഡ്യൂസർ.

ചിത്രത്തിന്റെ കഥ ഒരുക്കിയിരിക്കുന്നത് വിജേഷ് പാണത്തൂർ തന്നെയാണ്. നവാഗതനായ ശ്രീഹരി വടക്കൻ തിരക്കഥയും സംഭാഷണവും ഒരുക്കിയിരിക്കുന്നു. കൊച്ചിയിലെ ഒരു മെൻസ് ഹോസ്റ്റലും കണ്ണൂരും പശ്ചാത്തലമാകുന്ന ‘പ്രകമ്പനം’, ഹോസ്റ്റൽ ജീവിതവും അതിന്റെ രസങ്ങളുമാണ് പ്രധാനമായും ചർച്ച ചെയ്യുന്നത്. ശീതൾ ജോസഫാണ് ചിത്രത്തിലെ നായിക.

അമീൻ, കലാഭവൻ നവാസ്, രാജേഷ് മാധവൻ, മല്ലിക സുകുമാരൻ, അസീസ് നെടുമങ്ങാട്, പി.പി കുഞ്ഞികൃഷ്ണൻ, ഗായത്രി സതീഷ്, ലാൽ ജോസ്, പ്രശാന്ത് അലക്സാണ്ടർ, സനീഷ് പല്ലി, കുടശ്ശനാട് കനകം എന്നിവരടങ്ങുന്ന വലിയ താരനിരയും ചിത്രത്തിലുണ്ട്. ‘പണി’ എന്ന ചിത്രത്തിലെ വില്ലൻ കഥാപാത്രത്തിലൂടെ ശ്രദ്ധേയനായ സാഗർ സൂര്യയും സ്വതസിദ്ധമായ ഹാസ്യശൈലിയുള്ള ഗണപതിയും ഒന്നിക്കുമ്പോൾ ചിത്രത്തോടുള്ള പ്രതീക്ഷകൾ വർദ്ധിക്കുകയാണ്.

ബിബിൻ അശോക് സംഗീതവും ശങ്കർ ശർമ്മ പശ്ചാത്തല സംഗീതവും വിനായക് ശശികുമാർ വരികളും രചിച്ചിരിക്കുന്നു. ആൽബി ആന്റണി ഛായാഗ്രഹണവും സൂരജ് ഇ.എസ് എഡിറ്റിംഗും നിർവഹിച്ചിരിക്കുന്നു. സുഭാഷ് കരുൺ ആർട്ട് ഡയറക്ടറും അംബ്രൂ വർഗീസ് ചീഫ് അസോസിയേറ്റ് ഡയറക്ടറുമാണ്. നന്ദു പൊതുവാളാണ് പ്രൊഡക്ഷൻ കൺട്രോളർ. അനന്ദനാരായൺ ലൈൻ പ്രൊഡ്യൂസറും ശശി പൊതുവാൾ, കമലാക്ഷൻ എന്നിവർ പ്രൊഡക്ഷൻ മാനേജർമാരുമാണ്. കിഷൻ മോഹൻ (സപ്ത) സൗണ്ട് ഡിസൈനും എം. ആർ. രാജകൃഷ്ണൻ ഫൈനൽ മിക്സും രമേഷ് സി. പി ഡി. ഐയും കൈകാര്യം ചെയ്തിരിക്കുന്നു.