ശിവകാർത്തികേയന്റെ ജന്മദിനത്തിൽ 'സിയോൻ' സർപ്രൈസ്; ബോക്സ്ഓഫീസ് വിറപ്പിക്കാൻ 'വിരുമാണ്ടി'യുടെ അവതാരപ്പിറവി; കമൽഹാസൻ നിർമ്മിക്കുന്ന 'സിയോൻ' ടീസർ പുറത്ത്
ചെന്നൈ: കമൽഹാസന്റെ രാജ് കമൽ ഫിലിംസ് ഇന്റർനാഷണൽ നിർമ്മിച്ച് ശിവകാർത്തികേയൻ നായകനാകുന്ന ആക്ഷൻ എന്റർടെയ്നർ ചിത്രം 'സിയോൻ'ന്റെ ഔദ്യോഗിക ടീസർ പുറത്തിറങ്ങി. ശിവകാർത്തികേയന്റെ ജന്മദിനത്തോടനുബന്ധിച്ചാണ് തമിഴിൽ മുരുകൻ എന്നർത്ഥം വരുന്ന 'സിയോൻ' എന്ന ചിത്രത്തിന്റെ ടീസർ അണിയറപ്രവർത്തകർ പുറത്തുവിട്ടത്. ടീസറിൽ 'വിരുമാണ്ടി' എന്ന കരുത്തനായ ദൈവ അവതാരമായാണ് ശിവകാർത്തികേയൻ എത്തുന്നത്.
ശിവകുമാർ മുരുകേശൻ സംവിധാനം ചെയ്യുന്ന ഈ ചിത്രം ഗ്രാമീണ പശ്ചാത്തലത്തിലുള്ള ഉത്സവവും അതിനിടയിൽ നടക്കുന്ന സംഘർഷങ്ങളുമാണ് വിഷയമാക്കുന്നത്. കരുമാത്തൂർ വിരുമാണ്ടി ക്ഷേത്രത്തിലെ മാസി കളരി ഉത്സവത്തിനിടെയുണ്ടായ പ്രശ്നങ്ങളെക്കുറിച്ച് ഇൻസ്പെക്ടർ അരുൾദോസ് അന്വേഷിക്കുന്നിടത്താണ് ടീസർ ആരംഭിക്കുന്നത്. 'ദൈവം കുടിയിരിക്കുന്നവൻ' എന്ന് ശിവകാർത്തികേയന്റെ കഥാപാത്രത്തെ ഒരാൾ വിശേഷിപ്പിക്കുന്നുണ്ട്. മയിൽപ്പീലികളാൽ ചുറ്റപ്പെട്ട് വാളേന്തി നിൽക്കുന്ന താരത്തിന്റെ ഫസ്റ്റ് ലുക്ക് പോസ്റ്റർ നേരത്തെ ഏറെ ശ്രദ്ധ നേടിയിരുന്നു.
ഒരു പൊലീസ് സ്റ്റേഷനിൽ ശിവകാർത്തികേയന്റെ പാദങ്ങളിൽ ഒരു സ്ത്രീ വെള്ളമൊഴിക്കുന്നതും ഇൻസ്പെക്ടർ കൈകൂപ്പി ബഹുമാനിക്കുന്നതും ടീസറിലെ ശ്രദ്ധേയ രംഗങ്ങളാണ്. ഇത് 'വിരുമാണ്ടി പ്രഭുവാണ്' എന്ന് ഇൻസ്പെക്ടർ പറയുന്നതും കേൾക്കാം. പട്ടാളത്തിൽ സേവനമനുഷ്ഠിച്ചിരുന്ന ഒരാൾ പ്രാദേശിക സംഘർഷങ്ങളുടെ കേന്ദ്രബിന്ദുവായി മാറുന്നത് എങ്ങനെ എന്നതിന്റെ സൂചനകളും ടീസർ നൽകുന്നുണ്ട്. 2004-ൽ പുറത്തിറങ്ങിയ കമൽഹാസന്റെ പ്രശസ്തമായ 'വിരുമാണ്ടി' എന്ന ചിത്രവുമായുള്ള ഒരു പ്രതീകാത്മക ബന്ധവും ഈ ടീസർ മുന്നോട്ട് വെക്കുന്നുണ്ട്.
ആർ. മഹേന്ദ്രനോടൊപ്പം കമൽഹാസന്റെ രാജ് കമൽ ഫിലിംസ് ഇന്റർനാഷണൽ നിർമ്മിക്കുന്ന ഈ ചിത്രത്തിന് സന്തോഷ് നാരായണനാണ് സംഗീതം ഒരുക്കിയിരിക്കുന്നത്. വിവേക് വിജയകുമാറാണ് ഛായാഗ്രഹണം. 'അമരൻ' എന്ന ചിത്രത്തിന് ശേഷം ശിവകാർത്തികേയനും കമൽഹാസനും വീണ്ടും ഒന്നിക്കുന്ന ചിത്രമെന്ന നിലയിൽ 'സിയോൻ' ഏറെ പ്രതീക്ഷയോടെയാണ് പ്രേക്ഷകർ കാത്തിരിക്കുന്നത്. 2026 ഒക്ടോബർ 26ന് ചിത്രം ലോകമെമ്പാടുമുള്ള തിയറ്ററുകളിൽ റിലീസ് ചെയ്യുമെന്നാണ് അണിയറപ്രവർത്തകർ അറിയിച്ചിരിക്കുന്നത്.