കാൽ വഴുതി സ്റ്റീൽ കമ്പിയിലേക്ക് വീണു; രണ്ട് കാലിലും ആഴത്തിൽ മുറിവ്; ആക്ഷൻ രംഗം ചിത്രീകരിക്കുന്നതിനിടെ എസ് ജെ സൂര്യയ്ക്ക് പരിക്ക്

ചെന്നൈ: 'കില്ലർ' എന്ന ചിത്രത്തിന്റെ ഷൂട്ടിങ്ങിനിടെ നടനും സംവിധായകനുമായ എസ് ജെ സൂര്യയ്ക്ക് പരിക്ക്. ചെന്നൈയിലെ പാലവാക്കത്ത് വെച്ച് ചിത്രത്തിന്റെ മൂന്നാമത്തെ ഷെഡ്യൂളിൽ ആക്ഷൻ രംഗങ്ങൾ ചിത്രീകരിക്കുന്നതിനിടെയാണ് അപകടം സംഭവിച്ചത്. ഉടൻ തന്നെ അദ്ദേഹത്തെ സമീപത്തെ ആശുപത്രിയിൽ പ്രവേശിപ്പിച്ചു.

മുകളിൽ നിന്ന് റോപ്പിലൂടെ താഴേക്കിറങ്ങുമ്പോൾ കാൽ തെന്നി ഒരു സ്റ്റീൽ കമ്പിയിലേക്ക് വീഴുകയായിരുന്നു എന്നാണ് വിവരം. എസ് ജെ സൂര്യയുടെ രണ്ട് കാലുകളിലും വിവിധ ഭാഗങ്ങളിൽ പരിക്കേറ്റു. ആഴത്തിലുള്ള മുറിവുകൾ തുന്നിച്ചേർത്തതായി ഡോക്ടർമാർ സ്ഥിരീകരിച്ചു. നിലവിൽ അദ്ദേഹത്തിന്റെ ആരോഗ്യനില തൃപ്തികരമാണെങ്കിലും, കുറഞ്ഞത് 15 ദിവസമെങ്കിലും പൂർണ്ണ വിശ്രമം ആവശ്യമാണെന്ന് ഡോക്ടർമാർ നിർദ്ദേശിച്ചിട്ടുണ്ട്.

നടൻ പരിക്കിൽ നിന്ന് പൂർണ്ണമായും സുഖം പ്രാപിക്കുന്നത് വരെ "കില്ലർ" ചിത്രത്തിന്റെ ഷൂട്ടിംഗ് നിർത്തിവെക്കാൻ നിർമ്മാതാക്കൾ തീരുമാനിച്ചു. എസ് ജെ സൂര്യ തന്നെയാണ് "കില്ലർ" സംവിധാനം ചെയ്യുന്നതും തിരക്കഥയൊരുക്കിയിരിക്കുന്നതും. പ്രീതി അസ്രാണി നായികയായെത്തുന്ന ഈ ചിത്രത്തിന് എആർ റഹ്മാനാണ് സംഗീതം നൽകിയിരിക്കുന്നത്. തമിഴ്, തെലുങ്ക്, മലയാളം, കന്നഡ, ഹിന്ദി ഭാഷകളിലായാണ് ചിത്രം പുറത്തിറങ്ങാൻ ഒരുങ്ങുന്നത്.