അന്താരാഷ്ട്ര ചലച്ചിത്ര മേളകളിൽ പ്രശംസ നേടിയ 'വിക്ടോറിയ' തിയേറ്ററുകളിലേക്ക്; ശിവരഞ്ജിനി ഒരുക്കിയ ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്ത്

കൊച്ചി: നിരവധി ദേശീയ-അന്താരാഷ്ട്ര പുരസ്കാരങ്ങൾ കരസ്ഥമാക്കിയ, ശിവരഞ്ജിനി രചനയും സംവിധാനവും നിർവഹിച്ച 'വിക്ടോറിയ' എന്ന മലയാള ചിത്രം ഉടൻ തീയേറ്ററുകളിലെത്തും. ചിത്രത്തിന്റെ ഫസ്റ്റ് ലുക്ക് പോസ്റ്റർ ഇന്ന് പുറത്തിറങ്ങി. കെഎസ്എഫ്ഡിസിയാണ് ചിത്രം നിർമ്മിച്ചിരിക്കുന്നത്.

കൈരളി തീയേറ്ററുകളിൽ നടന്ന ചടങ്ങിലാണ് ചിത്രത്തിന്റെ ഫസ്റ്റ് ലുക്ക് പോസ്റ്റർ പുറത്തിറക്കിയത്. ഐ.എഫ്.എഫ്.കെ 2024-ൽ മികച്ച നവാഗത സംവിധായികയ്ക്കുള്ള ഫിപ്രസി പുരസ്കാരം നേടിയ ചിത്രം, ചൈനയിലെ ഷാങ്ഹായ് ഫെസ്റ്റിവലിലേക്ക് ഇന്ത്യയിൽ നിന്ന് തിരഞ്ഞെടുക്കപ്പെട്ട ഏക ചിത്രമായിരുന്നു. ചിത്രത്തിലെ പ്രധാന കഥാപാത്രത്തെ അവതരിപ്പിച്ച മീനാക്ഷി ജയന് ഗോൾഡൻ ഗ്ലോബറ്റ് ഏഷ്യൻ ടാലന്റ് മത്സര വിഭാഗത്തിൽ മികച്ച നടിക്കുള്ള പുരസ്കാരം നേടിക്കൊടുത്തു.

മുഴുവനായും സ്ത്രീ കഥാപാത്രങ്ങളെ കേന്ദ്രീകരിച്ചുള്ള 'വിക്ടോറിയ', ഒരു ബ്യൂട്ടീപാർലർ ജീവനക്കാരിയായ വിക്ടോറിയയുടെ ജീവിതത്തിലൂടെ സമകാലിക കേരളീയ സ്ത്രീ ജീവിതങ്ങളെ വരച്ചുകാട്ടുന്നു. സംവിധായിക ശിവരഞ്ജിനി തന്നെയാണ് ചിത്രത്തിന്റെ തിരക്കഥയും എഡിറ്റിംഗും നിർവഹിച്ചിരിക്കുന്നത്. മീനാക്ഷി ജയന് പുറമെ ശ്രീഷ്മ ചന്ദ്രൻ, ജോളി ചിറയത്ത്, ദർശന വികാസ്, സ്റ്റീജ മേരി ചിറക്കൽ, ജീന രാജീവ്, രമാ ദേവി എന്നിവരും പ്രധാന വേഷങ്ങളിൽ എത്തുന്നു.

ഫിപ്രസി പുരസ്കാരത്തിനു പുറമെ മുംബൈ വാട്ടർഫ്രന്റ് ഇൻഡീ ഫിലിം ഫെസ്റ്റിവലിൽ മികച്ച ചിത്രം, സംവിധായിക, ഛായാ​ഗ്രഹണം എന്നീ വിഭാഗങ്ങളിൽ മൂന്ന് പുരസ്കാരങ്ങൾ, സിയോളിൽ നടന്ന വനിതാ അന്താരാഷ്ട്രചലച്ചിത്രോത്സവത്തിലെ എക്സലൻസി അവാർഡ്, പതിനാലാമത് മോഹൻ രാഘവൻ അനുസ്മരണ സിനിമാ പുരസ്കാരം, ഇരിങ്ങാലക്കുട ഫിലിം സൊസൈറ്റിയുടെ മികച്ച നവാഗത സംവിധായികയ്ക്കുള്ള പുരസ്കാരം എന്നിവയും 'വിക്ടോറിയ' കരസ്ഥമാക്കിയിട്ടുണ്ട്. കൂടാതെ മലേഷ്യൻ അന്താരാഷ്ട്ര ചലച്ചിത്രോത്സവം, തായ്പോ ഇന്റർനാഷണൽ ഫിലിംഫെസ്റ്റിവൽ, സൗത്ത് ഓസ്ട്രേലിയയിലെ അഡ്ലെയ്ഡ് ഫെസ്റ്റിവൽ, കൽക്കത്ത, ധരംശാല ഫെസ്റ്റിവലുകൾ എന്നിവിടങ്ങളിലും ചിത്രം പ്രദർശിപ്പിച്ചിരുന്നു.

ആനന്ദ് രവി ഛായാ​ഗ്രഹണം നിർവഹിച്ച ചിത്രത്തിന്റെ സം​ഗീതം അഭയദേവ് പ്രഫുൽ ആണ്. ഗാനരചന ബിലു സി നാരായണൻ. വസ്ത്രാലങ്കാരം സതീഷ് കുളമട, മേക്കപ്പ് സന്തോഷ് വെൺപകൽ, പ്രൊഡക്ഷൻ ഡിസൈനർ അബ്ദുൾ ഖാദർ എ.കെ, സിങ്ക് സൗണ്ട് കലേഷ് ലക്ഷ്മണൻ, ശബ്ദരൂപകൽപ്പന രാധാകൃഷ്ണൻ എസ്, സ്മിജിത്ത് കുമാർ പി ബി എന്നിവരാണ് മറ്റ് അണിയറ പ്രവർത്തകർ.