പ്രശസ്ത ചലച്ചിത്ര-നാടക നടന്‍ ടി.പി. കുഞ്ഞിക്കണ്ണന്‍ അന്തരിച്ചു; 'ന്നാ താന്‍ കേസ് കൊട്' എന്ന ചിത്രത്തിലെ മന്ത്രി പ്രേമന്റെ വേഷം ശ്രദ്ധേനേടി
കാസര്‍കോട്: പ്രശസ്ത ചലച്ചിത്ര-നാടക നടന്‍ ടി.പി. കുഞ്ഞിക്കണ്ണന്‍(85) അന്തരിച്ചു. കാസര്‍കോട് ചെറുവത്തൂര്‍ സ്വദേശിയാണ്. ശനിയാഴ്ച പുലര്‍ച്ചെയായിരുന്നു മരണം. ഹൃദയാഘാതം മൂലം കോഴിക്കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും അദ്ദേഹം മരണപ്പെടുകയായിരുന്നു. കുഞ്ചാക്കോ ബോബന്‍ നായകനായ 'ന്നാ താന്‍ കേസ് കൊട്' എന്ന ചിത്രത്തിലെ മന്ത്രി പ്രേമന്റെ വേഷം ശ്രദ്ധേയമായിരുന്നു.
പൊതുമരാമത്ത് വകുപ്പില്‍ എഞ്ചിനിയര്‍ ആയിരുന്ന കുഞ്ഞിക്കണ്ണന്‍ വര്‍ഷങ്ങളുടെ നാടകാഭിനയത്തിലൂടെയും സിനിമാനടനവൈഭവത്തിലൂടെയും അഭിനയപ്രതിഭ തെളിയിച്ച താരം കണ്ണൂര്‍ സംഘചേതനയുടെ അംഗമായിരുന്നു. ഏറെ വൈകിയാണ് ചലച്ചിത്ര മേഖലയിലേയ്ക്ക് എത്താന്‍ പറ്റിയതെങ്കിലും ആ ചെറിയ കാലയളവിലും വ്യത്യസ്തമായ കഥാപാത്രങ്ങളിലൂടെ അദ്ദേഹത്തിന് ജനങ്ങളുടെ ഇഷ്ടം നേടാനായി. ഭാര്യ ജാനകി. മക്കള്‍: ശ്രീജയ, ശ്രീകല, ശ്രീപ്രിയ.