1 ഷോട്ട്, 2 സ്റ്റോറീസ്, 24 ഹവേഴ്‌സ്! എല്ലാം തുടങ്ങിയത് ഇവിടെ നിന്ന് : എല്‍സിയു ഷോര്‍ട്ട് ഫിലിം വരുന്നു, പ്രഖ്യാപനവുമായി ലോകേഷ്
ലോകേഷ് സിനിമാറ്റിക് യൂണിവേഴ്സിന് (എല്‍സിയു) വലിയൊരു ആരാധകനിര തന്നെയുണ്ട്. ലോകേഷ് സിനിമകളുടെ ഓരോ അപ്‌ഡേറ്റിനും വലിയ സ്വീകാര്യതയും സോഷ്യല്‍ മീഡിയയില്‍ നിന്ന് ലഭിക്കാറുണ്ട്. യൂണിവേഴ്സിന്റെ തുടക്കം വെളിപ്പെടുത്തുന്ന ഒരു ഹ്രസ്വ ചിത്രം ഒരുങ്ങുന്നു എന്ന വാര്‍ത്തകള്‍ മാസങ്ങള്‍ക്ക് മുന്‍പ് പുറത്തുവന്നിരുന്നു. ഇപ്പോള്‍ എല്‍സിയുവിന്റെ ആരംഭം വ്യക്തമാക്കുന്ന ആ ഹ്രസ്വ ചിത്രത്തിന്റെ ഔദ്യോഗിക പ്രഖ്യാപനം നടത്തിയിരിക്കുകയാണ് ലോകേഷ്.
ചാപ്റ്റര്‍ സീറോ എന്നാണ് ഈ ഹ്രസ്വ ചിത്രത്തിന് പേര് നല്‍കിയിരിക്കുന്നത്. വൃത്താകൃതിയില്‍ വച്ചിരിക്കുന്ന തോക്കുകള്‍ക്കും വെടിയുണ്ടകള്‍ക്കും നടുവിലായി ഒരു ഷോട്ട്, 2 കഥകള്‍, 24 മണിക്കൂര്‍ എന്ന് കുറിച്ചിരിക്കുന്ന ഫസ്റ്റ് ലുക്ക് പോസ്റ്ററാണിപ്പോള്‍ പുറത്തുവന്നിരിക്കുന്നത്. ലോകേഷ് തന്നെയാണ് 10 മിനിറ്റ് ദൈര്‍ഘ്യം വരുന്ന ഈ ഹ്രസ്വ ചിത്രത്തിന്റെ തിരക്കഥയും സംവിധാനവും നിര്‍വഹിക്കുന്നത്. വിക്രം, ദില്ലി, റോളക്‌സ്, അമര്‍, സന്താനം, ലിയോ തുടങ്ങിയ എല്‍സിയുവിലെ പ്രധാന കഥാപാത്രങ്ങളെല്ലാം ഇതില്‍ ഭാഗമാകുമെന്ന റിപ്പോര്‍ട്ടുകളുണ്ട്. നടന്‍ നരേനായിരുന്നു എല്‍സിയു ഹ്രസ്വ ചിത്രം ഒരുങ്ങുന്നതായി ആദ്യം അറിയിച്ചത്.
ഒരു സിനിമയുടെ പ്രമോഷന്റെ ഭാഗമായുള്ള വാര്‍ത്താ സമ്മേളനത്തിലായിരുന്നു നടന്‍ ഈ ഷോര്‍ട്ട് ഫിലിമിനെക്കുറിച്ച് പറഞ്ഞത്. 2019 ല്‍ പുറത്തിറങ്ങിയ കൈതി എന്ന സിനിമയിലൂടെയാണ് ലോകേഷ് കനകരാജ് യൂണിവേഴ്സിന് തുടക്കമിട്ടത്. പിന്നീട് വിക്രം, ലിയോ എന്നീ സിനിമകളും എല്‍സിയുവിന്റെ ഭാഗമായി പുറത്തിറങ്ങി. കൈതി 2 , റോളക്സിന്റെ സിനിമ, വിക്രം 3 തുടങ്ങിയ സിനിമകളും ഈ യൂണിവേഴ്സിന്റെ ഭാഗമായി ഒരുങ്ങുന്നുണ്ട്.