ജീവിച്ചിരിക്കുമ്പോൾ ഉമ്മച്ചിക്ക് തണലായിരുന്നു വാപ്പിച്ചി; ഇപ്പൊ ഉമ്മച്ചി നട്ട ആ മൈലാഞ്ചിച്ചെടികൾ വാപ്പിച്ചിക്ക് തണലാവുന്നു; എല്ലാം പടച്ചവന്റെ തീരുമാനം പോലെ...!!; വിടവാങ്ങിയ പ്രിയ കലാകാരൻ നവാസിന്റെ മക്കളുടെ ഹൃദയം നുറുങ്ങുന്ന കുറിപ്പ്

അന്തരിച്ച പ്രമുഖ നടൻ കലാഭവൻ നവാസിന്റെ വേർപാടിനു ശേഷം അവരുടെ മക്കൾ പങ്കുവെച്ച വൈകാരികമായ ഫേസ്ബുക്ക് കുറിപ്പ് ഹൃദയം തൊടുന്നു. ജീവിച്ചിരുന്നപ്പോൾ ഭാര്യക്ക് തണലായിരുന്ന നവാസ്, വിടവാങ്ങിയ ശേഷവും സ്നേഹത്തിന്റെ ഓർമ്മകളായി നിലനിൽക്കുന്നതിനെക്കുറിച്ചാണ് മക്കൾ ഹൃദ്യമായി കുറിച്ചിരിക്കുന്നത്. നവാസിന്റെ ഖബറിടത്തിൽ ഭാര്യ നട്ട മൈലാഞ്ചി ചെടികൾ തണലാകുന്ന കാഴ്ചയാണ് അവരെ ഈ ഓർമ്മകൾ പങ്കുവെക്കാൻ പ്രേരിപ്പിച്ചത്.

കഴിഞ്ഞ ജൂലൈ 30ന് രാത്രി 11 മണിക്ക് നവാസ് ഭാര്യ രഹ്നക്ക് വേണ്ടി അവസാനമായി പാടി അയച്ചുകൊടുത്ത ഗാനത്തിന്റെ വീഡിയോയും ഇതിനോടൊപ്പം മക്കൾ പങ്കുവെച്ചിട്ടുണ്ട്. "ഇത് വാപ്പിച്ചി (നവാസ്) ഉമ്മച്ചിക്ക് ( രഹ്ന) അവസാനമായി അയച്ചു കൊടുത്ത പാട്ട്," എന്ന അടിക്കുറിപ്പോടെയാണ് ഈ ഗാനം ഉൾപ്പെടുത്തിയിരിക്കുന്നത്.

കുറിപ്പിൽ പറയുന്നത് ഇങ്ങനെ: "വാപ്പിച്ചി പോകുന്നതിന് ഒരു മാസം മുൻപ് ഉമ്മച്ചി മൈലാഞ്ചി ചെടി മുറിച്ച കമ്പുകൾ ഒരു ചെടിച്ചട്ടിയിൽ നട്ടിരുന്നു. അത് കണ്ട വാപ്പിച്ചി, ഉമ്മച്ചിയോട് പറഞ്ഞു, 'നീ ഇത് വേരുപിടിക്കുമ്പോൾത്തന്നെ നടരുത്, നല്ല സ്ഥലം നോക്കി വച്ചാൽ മതി' എന്ന്. വാപ്പിച്ചി പോയിക്കഴിഞ്ഞു, വാപ്പിച്ചിയുടെ ഖബറിൽ നട്ട പൂച്ചെടി പിടിച്ചു. എന്നാൽ കുത്തിയ മൈലാഞ്ചിക്കമ്പ് ഉണങ്ങിത്തുടങ്ങിയെന്ന് ഞങ്ങൾ ഉമ്മച്ചിയോട് പറഞ്ഞു. അപ്പോഴാണ് വാപ്പിച്ചി സ്ഥലം പറയാമെന്നു പറഞ്ഞ, ഉമ്മച്ചി നട്ട മൈലാഞ്ചിക്കമ്പുകൾ ഓർമ്മ വരുന്നത്."

തുടർന്ന്, ഓഗസ്റ്റ് 8ന് നവാസിന്റെ ഖബറിടത്തിൽ നടുന്നതിനായി ഉമ്മച്ചിയുടെ സഹോദരിയുടെ ഭർത്താവിന്റെ കൈവശം ആ മൈലാഞ്ചിത്തൈകൾ കൊടുത്തയച്ചു. അത് നന്നായി വേരുപിടിക്കുകയും ചെടി വളരുകയും ചെയ്തു.

"ജീവിച്ചിരിക്കുമ്പോൾ ഉമ്മച്ചിക്ക് തണലായിരുന്നു വാപ്പിച്ചി. ആ വാപ്പിച്ചിയുടെ ഖബറിന് ഉമ്മച്ചി നട്ട മൈലാഞ്ചിച്ചെടികൾ തണലാവുന്നു. എന്തൊരു മനസ്സായിരിക്കും അല്ലെ, വാപ്പിച്ചിയുടേയും ഉമ്മച്ചിയുടേയും. പടച്ചവൻ എല്ലാം നേരത്തെ തന്നെ തീരുമാനിച്ചിരുന്നു," എന്നാണ് മക്കൾ വികാരഭരിതരായി കുറിച്ചത്.

കലാഭവൻ നവാസിന്റെയും ഭാര്യ രഹ്നയുടെയും സ്നേഹബന്ധം എത്രത്തോളം ആഴത്തിലുള്ളതായിരുന്നു എന്ന് അവരുടെ മക്കളുടെ ഈ വാക്കുകൾ വ്യക്തമാക്കുന്നു. ജീവിതയാത്രയിൽ പരസ്പരം താങ്ങും തണലുമായിരുന്ന ഇരുവരും, വേർപാടിന് ശേഷവും സ്നേഹത്തിന്റെ ഓർമ്മകളാൽ ചുറ്റിക്കിടക്കുകയാണ്. ഈ കുറിപ്പ് നിരവധി പേർക്ക് വൈകാരികമായ അനുഭവങ്ങളാണ് സമ്മാനിച്ചത്.