കണ്ടിട്ട് തന്നെ ഛർദ്ദിക്കാൻ തോന്നുന്നു; ഇങ്ങനെ ചിന്തിക്കാൻ എങ്ങനെ തോന്നുന്നു; ഇയാൾക്ക് വേറെ പണിയില്ലേ..! കാറിന്റെ പിൻസീറ്റിലിരുന്ന് ഒരാളെ എങ്ങനെയാണ് റേപ്പ് ചെയ്യാൻ സാധിക്കുക എന്ന് ചോദിച്ച ആ സംവിധായകൻ; ഇതോടെ തിരികൊളുത്തിയ വിവാദവും; അഖിലിനെതിരെ തുറന്നടിച്ച് റിയാസ് സലിം
നടി ആക്രമിക്കപ്പെട്ട കേസിൽ അതിജീവിതയുടെ മൊഴിയെ ചോദ്യം ചെയ്യുകയും നടൻ ദിലീപിനെ പിന്തുണച്ച് നിരന്തരം രംഗത്തെത്തുകയും ചെയ്യുന്ന സംവിധായകനും ബിഗ് ബോസ് മുൻ വിജയിയുമായ അഖിൽ മാരാറിനെതിരെ രൂക്ഷവിമർശനവുമായി ഇൻഫ്ളുവൻസറും ബിഗ് ബോസ് മുൻ മൽസരാർത്ഥിയുമായ റിയാസ് സലിം രംഗത്ത്.
റേപ്പ് കൾച്ചറിന്റെ ഏറ്റവും അറപ്പുളവാക്കുന്നതും ഛർദ്ദിക്കാൻ തോന്നുന്നതുമായ മനുഷ്യരൂപമാണ് അഖിൽ മാരാറെന്ന് റിയാസ് തന്റെ ഇൻസ്റ്റഗ്രാം പോസ്റ്റിലൂടെ കുറ്റപ്പെടുത്തി. മനഃപൂർവം സംശയം സൃഷ്ടിച്ച് അതിജീവിതയെ കള്ളിയാക്കാൻ ശ്രമിക്കുകയാണ് മാരാറെന്നും റിയാസ് സലിം ആരോപിച്ചു.
നടി ആക്രമിക്കപ്പെട്ട കേസിൽ വിധി വന്നതിനു പിന്നാലെയാണ് അഖിൽ മാരാർ ദിലീപിന് പിന്തുണയുമായി രംഗത്തെത്തിയത്. ഇതിനിടെ, അതിജീവിതയുടെ മൊഴിയെ ചോദ്യം ചെയ്ത് അഖിൽ മാരാർ നടത്തിയ ചില പരാമർശങ്ങൾ വലിയ വിവാദങ്ങൾക്ക് വഴിവെച്ചിരുന്നു.
അഖിൽ മാരാർ ഉന്നയിച്ച ചില ചോദ്യങ്ങളെ റിയാസ് സലിം തന്റെ പോസ്റ്റിൽ ഉദാഹരണമായി ചൂണ്ടിക്കാട്ടി. കാറിന്റെ പിൻസീറ്റിൽ ഒരു 'ഡെമോ റേപ്പ്' ചെയ്ത് അങ്ങനെയൊരു സ്ഥലത്ത് എങ്ങനെയാണ് ബലാത്സംഗം സാധ്യമാവുക എന്ന് കണ്ടെത്താൻ ശ്രമിക്കുക, 2017-ൽ ഇറങ്ങിയ ഒരു മൊബൈൽ ഫോണിന്റെ ലൈറ്റ് കണ്ടീഷൻ പരിശോധിച്ച് ആ വെളിച്ചത്തിൽ എങ്ങനെയാണ് ബലാത്സംഗം പകർത്താൻ സാധിക്കുക, അതിജീവിത പ്രതിരോധിക്കുകയും കാർ ഡ്രൈവറെ ആക്രമിക്കുകയും ചെയ്തിരുന്നുവെങ്കിൽ വാഹനം നിയന്ത്രണം വിട്ട് ഇടിക്കുമായിരുന്നു എന്ന വാദങ്ങൾ റിയാസ് സലിം എടുത്ത് കാട്ടി. ഈ ചോദ്യങ്ങൾ ജിജ്ഞാസയുടെ പുറത്ത് ചോദിക്കുന്നതല്ലെന്നും, മനഃപൂർവം സംശയം സൃഷ്ടിച്ച് അതിജീവിതയെ കള്ളിയാക്കാൻ നോക്കുകയാണെന്നും റിയാസ് ശക്തമായി വിമർശിച്ചു.
'സ്ത്രീയുടെ വേദനയെ അയാൾ സയൻസ് ഫിക്ഷനാക്കുകയാണ്', റിയാസ് സലിം ഇൻസ്റ്റഗ്രാം പോസ്റ്റിൽ കുറിച്ചു. സ്ത്രീവിരുദ്ധരായ പുരുഷന്മാർ പരസ്പരം സംരക്ഷിക്കാനുള്ള കഴിവുള്ളവരാണെന്നും, അവർ ഒരിക്കലും സ്ത്രീകളെ സംരക്ഷിക്കില്ലെന്നും റിയാസ് വാദിച്ചു.
അഖിൽ മാരാരുടെ രോഷം മുഴുവനും കുറ്റാരോപിതന് വേണ്ടിയാണെന്നും അദ്ദേഹത്തിന് സഹതാപം പുരുഷന്മാരോട് മാത്രമാണെന്നും റിയാസ് ചൂണ്ടിക്കാട്ടി. ഇത് ഒരു റേപ്പിസ്റ്റിന്റെ മനോഭാവമാണെന്നും, റേപ്പ് സംസ്കാരത്തിന്റെ ഭാഗമാവാൻ കുറ്റം ചെയ്യണമെന്നില്ല, അതുപോലെ ചിന്തിച്ചാൽ മാത്രം മതിയെന്നും റിയാസ് സലിം തന്റെ പോസ്റ്റിൽ പറയുന്നു.