ദേശീയ പാതയില്‍ ബൈക്ക് നിയന്ത്രണം വിട്ട് ഡിവൈഡറില്‍ ഇടിച്ച് മറിഞ്ഞു; ലോറിയുടെ അടിയിലേക്ക് തെറിച്ചു വീണ യുവാവിന് ദാരുണാന്ത്യം
ദേശീയ പാതയില്‍ ബൈക്ക് നിയന്ത്രണം വിട്ട് ഡിവൈഡറില്‍ ഇടിച്ച് മറിഞ്ഞു; യുവാവിന് ദാരുണാന്ത്യം
By : സ്വന്തം ലേഖകൻ
Update: 2025-01-11 00:07 GMT
കണ്ണൂര്‍: കണ്മൂരില്‍ ദേശീയ പാതയില്‍ ബൈക്ക് നിയന്ത്രണം വിട്ട് ഡിവൈഡറില്‍ ഇടിച്ച് മറിഞ്ഞു യുവാവ് ദാരുണമായി മരിച്ചു. തളാപ്പ് മക്കാനിക്ക് സമീപം ദേശീയ പാതയില്‍ ഇന്നലെ അര്‍ദ്ധരാത്രിയോടെയാണ് അപകടം. പറശിനിക്കടവ് നണിച്ചേരി സ്വദേശി രാഹുല്‍ കല്ലൂരി (40) ആണ് മരിച്ചത്. രാഹുല്‍ കണ്ണൂര്‍ ടൗണ്‍ ഭാഗത്ത് നിന്ന് പറശിനിക്കടവ് ഭാഗത്തേക്ക് പോകുന്നതിനിടെ റോഡിലെ ഡിവൈഡറില്‍ ഇടിച്ചാണ് അപകടം ഉണ്ടായത്.
രാത്രി 12 മണിയോടെയായിരുന്നു സംഭവം. ഇടിയുടെ ആഘാതത്തില്‍ സമീപത്തു കൂടി കടന്നു പോവുകയായിരുന്നു ലോറിയുടെ അടിയിലേക്ക് യുവാവ് തെറിച്ചു വീണു. വയറിനും തലയ്ക്കും സാരമായി പരുക്കേറ്റ രാഹുല്‍ സംഭവസ്ഥലത്ത് വച്ച് തന്നെ മരിച്ചു. മൃതദേഹം എകെജി ആശുപത്രി മോര്‍ച്ചറിയിലേക്ക് മാറ്റി. കണ്ണൂര്‍ ടൗണ്‍ പൊലീസ് സ്ഥലത്തെത്തി തുടര്‍ നടപടികള്‍ സ്വീകരിച്ചു.