വയോധികയെ കൊമ്പിൽ കുത്തിയെറിഞ്ഞ് തെരുവ് പശു; നടുവിനും തലയ്ക്കും പരിക്ക്; നില അതീവ ഗുരുതരം; ഭയപ്പെടുത്തുന്ന ദൃശ്യങ്ങൾ പുറത്ത്; സംഭവം മധുരയിൽ

ചെന്നൈ: തമിഴ്‌നാട്ടിൽ 70കാരിയെ പശു കൊമ്പിൽ കുത്തിയെറിഞ്ഞു. തമിഴ്‌നാട്ടിലെ മധുരയിലാണ് സംഭവം നടന്നത്. ജോലി കഴിഞ്ഞ് മടങ്ങുന്നതിനിടെ ചെല്ലമ്മാളിനെ പിന്നിലൂടെ വന്ന പശു കൊമ്പിൽ കുത്തിയെറിയുകയായിരുന്നു. ഞെട്ടിപ്പിക്കുന്ന സിസിടിവി ദൃശ്യങ്ങൾ പുറത്തുവന്നിട്ടുണ്ട്. കടകൾക്കിടയിലൂടെ നടന്നു പോകുന്ന ചെല്ലമ്മാളിനെ പിന്നിലൂടെ വന്ന പശു ആക്രമിക്കുന്നതാണ് ദൃശ്യങ്ങളിൽ.

ഇവർ ഉയർന്നു പൊങ്ങി താഴേക്ക് വീഴുന്നുണ്ട്. അപ്പോൾ തന്നെ അബോധാവസ്ഥയിലാകുകയും ചെയ്തു. ചെല്ലമ്മാളുടെ തലയ്ക്കും നടുവിനും ​വളരെ ഗുരുതരമായി പരിക്ക് പറ്റിയിട്ടുണ്ട്. മധുര സർക്കാർ ആശുപത്രിയിൽ ഇവരെ പ്രവേശിപ്പിച്ചു.

അതേസമയം, തമിഴ്നാട്ടിൽ അലഞ്ഞു തിരിഞ്ഞു നടക്കുന്ന പശുക്കൾ ആക്രമിക്കുന്ന സംഭവം വളരെ രൂക്ഷമാകുന്നുണ്ട്. അടുത്തിടെയാണ് 85കാരനെ ചെന്നൈയിൽ പശു ആക്രമിച്ച് കൊലപ്പെടുത്തിയത്. ആറാം ക്ലാസിൽ പഠിക്കുന്ന കുട്ടിയെ ഇതുപോലെ തന്നെ കൊമ്പിൽ കുത്തിയെറിയുന്ന സംഭവവും ഉണ്ടായിട്ടുണ്ട്.