ബലൂൺ വീർപ്പിക്കുന്നതിനിടെ വൻ ശബ്ദത്തിൽ പൊട്ടിത്തെറി; പൊട്ടിയ ബലൂൺ കഷണങ്ങൾ ശ്വാസനാളത്തിൽ കുരുങ്ങി അപകടം; മുംബൈയിൽ എട്ട് വയസുകാരിക്ക് ദാരുണാന്ത്യം

മുംബൈ: ബലൂൺ വീർപ്പിക്കുന്നതിനിടെ വൻ ശബ്ദത്തിൽ പൊട്ടിത്തെറിച്ച് എട്ട് വയസുകാരിക്ക് ദാരുണാന്ത്യം. പൊട്ടിയ ബലൂൺ കഷണങ്ങൾ ശ്വാസനാളത്തിൽ കുരുങ്ങിയാണ് കുട്ടി മരിച്ചത്.മഹാരാഷ്ട്രയിലെ ധൂലിലുള്ള യശ്വന്ത് നഗറിലാണ് ദാരുണ സംഭവം നടന്നത്. എട്ട് വയസുകാരിയായ ഡിംപിൾ വാങ്കെഡെ ആണ് മരിച്ചത്. സ്വന്തം വീട്ടുമുറ്റത്ത് കളിച്ചുകൊണ്ടിരിക്കവെയായിരുന്നു അപകടം നടന്നത് .

കുട്ടി ബലൂൺ വീർപ്പിക്കാൻ ശ്രമിക്കവെ ബലൂൺ പൊട്ടുകയായിരുന്നു. പൊട്ടിയ കഷണങ്ങൾ കുട്ടിയുടെ ശ്വാസനാളത്തിൽ കുരുങ്ങി ശ്വാസം തടസം അനുഭവപ്പെട്ടു. കുട്ടിക്ക് ശ്വാസമെടുക്കാൻ കഴിയുന്നില്ലെന്ന് മനസിലാക്കിയ വീട്ടിലുണ്ടായിരുന്നവർ ഉടൻ തന്നെ കുട്ടിയെ അടുത്തുള്ള സ്വകാര്യ ആശുപത്രിയിൽ എത്തിച്ചു. പക്ഷെ പരിശോധിച്ച ഡോക്ടർ, കുട്ടി നേരത്തെ തന്നെ മരിച്ചതായി സ്ഥിരീകരിക്കുകയും ചെയ്തു. പോലീസെത്തി മേൽനടപടികൾ സ്വീകരിച്ചു.