അമിതവേ​ഗതയിലെത്തിയ കാർ കളിച്ചുകൊണ്ടിരുന്ന കുട്ടിയുടെ ഇടയിലേക്ക് പാഞ്ഞുകയറി; നാലു വയസ്സുകാരന് ദാരുണാന്ത്യം; സംഭവം മുംബൈയിൽ

മുംബൈ: വഡാലയിൽ അമിതവേ​ഗതയിൽ എത്തിയ കാറിടിച്ച് നാലു വയസുകാരൻ മരിച്ചു. നടപ്പാതയിൽ താമസിച്ചിരുന്ന ലക്ഷ്മൺ കിൻവാഡെ(4) ആണ് മരിച്ചത്.അംബേദ്കർ കോളേജിന് സമീപമാണ് അപകടം നടന്നത്. സംഭവത്തിൽ, കാറോടിച്ചിരുന്ന ഭൂഷൺ സന്ദീപ് ​ഗോളിനെ(19) പോലീസ് അറസ്റ്റ് ചെയ്തു.

അപകടമുണ്ടാക്കിയ കാർ പോലീസ് കസ്റ്റഡിയിൽ എടുത്തു. അപകടസമയത്ത് അമിതവേ​ഗതയിലായിരുന്നു വാഹനമെന്നാണ് ദൃക്സാക്ഷികൾ പറയുന്നത്. വിലേ പാർലെ സ്വദേശിയാണ് സന്ദീപ്. അപകടസമയത്ത് ഇയാൾ മദ്യപിച്ചിരുന്നോ എന്ന് പോലീസ് പരിശോധിക്കുന്നുണ്ട്.

കാലങ്ങളായി നടപ്പാതയിൽ താമസിക്കുന്ന കുടുംബമായിരുന്നു ലക്ഷ്മണിന്റേത്. പിതാവിന് കൂലിപ്പണിയാണ്. കുട്ടി കളിച്ചുകൊണ്ടിരിക്കെയായിരുന്നു അപകടമെന്നാണ് പോലീസ് പറയുന്നത്.