ആറ് വയസ്സുകാരിയായ മകളെ ബലാത്സംഗം ചെയ്തു; സ്വവര്‍ഗ പങ്കാളിയുടെ ജനനേന്ദ്രിയം മുറിച്ചു മാറ്റിയ ശേഷം പിതാവ് ജീവനൊടുക്കി

ഉത്തര്‍പ്രദേശ്: ആറ് വയസ്സുകാരിയായ മകളെ ബലാത്സംഗം ചെയ്ത സ്വവര്‍ഗ പങ്കാളിയുടെ ജനനേന്ദ്രിയം മുറിച്ചുമാറ്റിയ ശേഷം പിതാവ് ജീവനൊടുക്കി. ഉത്തര്‍പ്രദേശിലെ ദേവ്രിയ ജില്ലയിലാണ് സംഭവം. മരിച്ച യുവാവ് സംഗീത കലാകാരനാണ്. തന്റെ സ്വവര്‍ഗ പങ്കാളിയായ റാംബാബു യാദവ് എന്ന സുഹൃത്തിനൊപ്പം വാടകവീട്ടിലാണ് താമസിച്ചിരുന്നത്.

ഭാര്യയും മകളും ഉള്ള ഇയാള്‍ കുറച്ച് നാളുകളായി ഭാര്യയുമായി അകന്ന് സ്വവര്‍ഗ പങ്കാളിക്കൊപ്പമായിരുന്നു ജീവിച്ചിരുന്നത്. കഴിഞ്ഞ ദിവസം പിതാവിനെ സന്ദര്‍ശിക്കാനെത്തിയ ആറ് വയസ്സുകാരിയെ റാംബാബു യാദവ് ബലാത്സംഗം ചെയ്തുവെന്നാണ് ആരോപണം. ഇതറിഞ്ഞ യുവാവ് റാം ബാബുവുമായി വാക്കേറ്റമുണ്ടായി. തുടര്‍ന്ന് യുവാവ്, റാംബാബു യാദവിന്റെ ജനനേന്ദ്രിയം മുറിച്ചുമാറ്റുകയായിരുന്നു. പിന്നാലെ ഇയാളെ മുറിയില്‍ മരിച്ച നിലയില്‍ കണ്ടെത്തി.

ഗുരുതരാവസ്ഥയിലായ യാദവിനെ ആദ്യം ദേവ്രിയ മെഡിക്കല്‍ കോളജിലും പിന്നീട് വിദഗ്ധ ചികിത്സയ്ക്കായി ഗോരഖ്പൂരിലെ ആശുപത്രിയിലേക്കും മാറ്റി. ഇയാള്‍ക്കെതിരെ പോക്സോ നിയമപ്രകാരം കേസെടുത്തിട്ടുണ്ട്. സംഭവത്തില്‍ കൂടുതല്‍ അന്വേഷണം നടന്നുവരികയാണ്. കുട്ടിയെ അമ്മയുടെ മാതാപിതാക്കളുടെ വീട്ടിലേക്ക് മാറ്റിയിട്ടുണ്ടെന്നും കുട്ടിക്ക് വൈദ്യസഹായവും കൗണ്‍സലിങ്ങും നല്‍കുന്നുണ്ടെന്നും പൊലീസ് പറഞ്ഞു. സംഭവസ്ഥലത്തുനിന്ന് തെളിവുകള്‍ ശേഖരിക്കുകയും കുട്ടിയുടെ വൈദ്യപരിശോധന പൂര്‍ത്തിയാക്കുകയും ചെയ്തതായി അന്വേഷണ ഉദ്യോഗസ്ഥര്‍ പറഞ്ഞു.