മഹാകുംഭമേളയുടെ ടെന്റില്‍ കോഴിക്കറി പാചകം ചെയ്‌തെന്ന് ആരോപണം; കുടുംബത്തിന് നേരെ ആക്രമണം
മഹാകുംഭമേളയുടെ ടെന്റില്‍ കോഴിക്കറി പാചകം ചെയ്‌തെന്ന് ആരോപണം; കുടുംബത്തിന് നേരെ ആക്രമണം
പ്രയാഗ് രാജ്: ഉത്തര്‍പ്രദേശിലെ പ്രയാഗ് രാജില്‍ നടക്കുന്ന മഹാകുംഭമേളക്കിടെ കോഴി പാചകം ചെയ്‌തെന്ന് ആരോപിച്ച് കുടുംബത്തിന് നേരെ ആക്രമണം. അക്രമികള്‍ കുടുംബാംഗങ്ങളെ ശാരീരികമായി ഉപദ്രവിക്കുകയും അവരുടെ ടെന്റ് നശിപ്പിക്കുകയും പാചകം ചെയ്ത കോഴിക്കറി പുറത്തേക്ക് വലിച്ചെറിയുകയും ചെയ്തതായി ലേറ്റസ്റ്റ്‌ലി വാര്‍ത്ത റിപ്പോര്‍ട്ട് ചെയ്തു
സംഭവത്തിന്റെ വിഡിയോ ദൃശ്യങ്ങള്‍ സാമൂഹ്യ മാധ്യമങ്ങളില്‍ പ്രചരിക്കുന്നുണ്ട്. വിഡിയോയില്‍ ഒരു കൂട്ടം ആളുകള്‍ ടെന്റ് പൊളിക്കുന്നതും പാചകം ചെയ്ത കോഴിക്കറി വലിച്ചെറിയുന്നതും മോശം വാക്കുകള്‍ ഉപയോഗിക്കുന്നതും കാണാം. സംഭവത്തെക്കുറിച്ച് കൂടുതല്‍ വിവരങ്ങള്‍ പുറത്തുവന്നിട്ടില്ല.
കുംഭമേളയുടെ പവിത്രത കളങ്കപ്പെടുത്തുന്ന ഇത്തരം പ്രവൃത്തികള്‍ അംഗീകരിക്കാനാവില്ലെന്ന് പ്രതിഷേധക്കാര്‍ വിഡിയോയില്‍ പറയുന്നത് കേള്‍ക്കാം. ഇത്തരം പ്രവര്‍ത്തികള്‍ ഭാരതീയ സംസ്‌കാരത്തിനും പാരമ്പര്യത്തിനും എതിരാണെന്നും ഹിന്ദു മതത്തെയും സനാതന ധര്‍മ്മത്തെയും താഴ്ത്തിക്കെട്ടാന്‍ ശ്രമിക്കുന്നവര്‍ ആരായാലും അവര്‍ക്കും അതേ ശിക്ഷ ലഭിക്കുമെന്നും പ്രതിഷേധക്കാര്‍ പറഞ്ഞു.