സല്‍മാന്‍ ഖാനെ നേരിട്ട് കാണണമെന്ന് യുവാവ്; വസതിയില്‍ അതിക്രമിച്ചുകയറിയ 23-കാരന്‍ പിടിയില്‍; ബിഷ്‌ണോയി സംഘത്തിന്റെ ഭീഷണി നിലനില്‍ക്കെ അന്വേഷണവുമായി പൊലീസ്
സല്‍മാന്‍ ഖാനെ നേരിട്ട് കാണണമെന്ന് യുവാവ്
മുംബൈ: ബോളിവുഡ് നടന്‍ സല്‍മാന്‍ ഖാനെ നേരിട്ടു കാണാന്‍ വസതിയില്‍ അതിക്രമിച്ച് കയറിയ യുവാവ് പിടിയില്‍. മുംബൈയിലെ ബാന്ദ്രയില്‍ സ്ഥിതിചെയ്യുന്ന ഗാലക്‌സി അപ്പാര്‍ട്ട്‌മെന്റിലാണ് യുവാവ് അതിക്രമിച്ച് കടന്നത്. കഴിഞ്ഞ 20-ന് രാത്രി ഏഴ് മണിക്കാണ് സംഭവം. 23-കാരനായ ജിതേന്ദ്ര സിംഗാണ് അറസ്റ്റിലായത്. ബിഷ്‌ണോയി സംഘത്തിന്റെ ഭീഷണിയുള്ള സാഹചര്യത്തില്‍ പൊലീസ് അന്വേഷണം ശക്തമാക്കിയിട്ടുണ്ട്.
യുവാവ് രാവിലെ മുതല്‍ സല്‍മാന്‍ ഖാന്റെ വീടിന് മുന്നില്‍ ചുറ്റിത്തിരിയുകയായിരുന്നുവെന്ന് പൊലീസ് പറഞ്ഞു. താരത്തിന്റെ വീടിന് സമീപത്തെ സിസിടിവി ദൃശ്യങ്ങളും പൊലീസ് ശേഖരിച്ചു. ഒരു വ്യക്തിയോടൊപ്പമാണ് യുവാവ് കെട്ടിടത്തിനുള്ളിലേക്ക് കയറിയത്. എന്നാല്‍ സല്‍മാന്റെ സുരക്ഷാ ഉദ്യോഗസ്ഥര്‍ ഇയാളെ പിടികൂടി പൊലീസിനെ ഏല്‍പ്പിക്കുകയായിരുന്നു. സല്‍മാന്‍ ഖാനെ കാണാന്‍ ആഗ്രഹമുണ്ടെന്നും അതിനാണ് താന്‍ എത്തിയതെന്നും യുവാവ് പറഞ്ഞു.
ഛത്തീസ്ഗഢ് സ്വദേശിയായ യുവാവിനെതിരെ അന്വേഷണം നടന്നുവരികയാണ്. നേരത്തെ, സല്‍മാന്റെ വസതിക്ക് നേരെയുണ്ടായ വെടിവയ്പ്പിന് പിന്നാലെ താരത്തിന് വൈ പ്ലസ് സുരക്ഷ ഏര്‍പ്പെടുത്തിയിരുന്നു.