ഇരുപത്തിരണ്ടുകാരന്റെ വിവാഹാഭ്യര്‍ത്ഥന നിരസിച്ചു; 18കാരിക്ക് നേരെ ആസിഡ് ആക്രമണം; സ്വയം തീ കൊളുത്തി ജീവനൊടുക്കാന്‍ പ്രതിയുടെ ശ്രമം

ബെംഗളൂരു: കര്‍ണാടകയിലെ ചിക്ബല്ലാപുരയില്‍ പതിനെട്ടുകാരിക്കു നേരെ ആസിഡ് ആക്രമണം. വിവാഹാഭ്യര്‍ത്ഥന നിരസിച്ചതിന് പെണ്‍കുട്ടിക്ക് നേരെ ആസിഡ് എറിഞ്ഞ ശേഷം അക്രമി തീ കൊളുത്തി ആത്മഹത്യയ്ക്ക് ശ്രമിച്ചു. പെണ്‍കുട്ടിയുടെ ബന്ധുവാണ് ആക്രമണം നടത്തിയതെന്നാണ് വിവരം.

സംഭവം നടന്നത് ചൊവ്വാഴ്ച വൈകിട്ടോടെയാണ്. ഇരുപത്തിരണ്ടുകാരനായ ആനന്ദ് കുമാറാണ് പെണ്‍കുട്ടിയോട് വിവാഹാഭ്യര്‍ത്ഥന നടത്തിയത്. പെണ്‍കുട്ടി നിരസിച്ചു. തുടര്‍ന്ന് വൈകുന്നേരം തിരിച്ചെത്തിയാണ് ആനന്ദ് ആക്രമണം നടത്തിയത്. ആസിഡ് എറിഞ്ഞതോടെ പെണ്‍കുട്ടിക്ക് മുഖത്ത് പൊള്ളലേറ്റു. പൊള്ളല്‍ ഗുരുതരമല്ല.

ആസിഡ് എറിഞ്ഞതിന് പിന്നാലെ ഡീസല്‍ ദേഹത്ത് ഒഴിച്ച് യുവാവ് തീ കൊളുത്തി. ദേഹമാകെ പൊള്ളലേറ്റ ആനന്ദ് കുമാറിന്റെ നില ഗുരുതരമാണ്. 70 ശതമാനം പൊള്ളലേറ്റിട്ടുണ്ട്. ഇയാളെ ആശുപത്രിയില്‍ പ്രവേശിപ്പിച്ചു.