വി.ഡി. സവര്‍ക്കര്‍ മാനനഷ്ടക്കേസില്‍ കുറ്റക്കാരനല്ലെന്ന് രാഹുല്‍ ഗാന്ധി കോടതിയില്‍
വി.ഡി. സവര്‍ക്കര്‍ മാനനഷ്ടക്കേസില്‍ കുറ്റക്കാരനല്ലെന്ന് രാഹുല്‍ ഗാന്ധി കോടതിയില്‍
ന്യൂഡല്‍ഹി: വി.ഡി. സവര്‍ക്കര്‍ മാനനഷ്ടക്കേസില്‍ താന്‍ കുറ്റക്കാരനല്ലെന്ന് കോണ്‍ഗ്രസ് നേതാവ് രാഹുല്‍ ഗാന്ധി കേസ് പരിഗണിക്കുന്ന പുനെയിലെ എം.പി/ എം.എല്‍.എ കോടതിയെ അറിയിച്ചു. പ്രത്യേക ജഡ്ജി അമോല്‍ ഷിന്‍ഡെ രാഹുലിനെതിരായ കുറ്റങ്ങള്‍ വായിച്ചപ്പോള്‍ കേസില്‍ കുറ്റക്കാരനല്ലെന്ന് രാഹുല്‍ ഗാന്ധിയുടെ അഭിഭാഷകന്‍ മിലിന്ദ് പവാര്‍ വാദിച്ചു.
2023 മാര്‍ച്ച് അഞ്ചില്‍ ലണ്ടനില്‍ നടന്ന ഒരു ഓവര്‍സീസ് കോണ്‍ഗ്രസ് സമ്മേളനത്തിനിടെ രാഹുല്‍ ഗാന്ധി ഹിന്ദുത്വ സൈദ്ധാന്തികനായ സവര്‍ക്കര്‍ക്കെതിരെ അപകീര്‍ത്തികരവും അവഹേളനപരവുമായ പ്രസ്താവനകള്‍ നടത്തിയെന്ന് ആരോപിച്ച് വി.ഡി. സവര്‍ക്കറുടെ അനന്തരവന്റെ മകന്‍ സത്യകി സവര്‍ക്കര്‍ മാനനഷ്ടക്കേസ് ഫയല്‍ ചെയ്യുകയായിരുന്നു. ഈ പരാമര്‍ശങ്ങള്‍ പിന്നീട് സോഷ്യല്‍ മീഡിയയില്‍ പ്രചരിച്ചുവെന്നും സവര്‍ക്കറുടെ പാരമ്പര്യത്തെയും പൊതു പ്രതിച്ഛായയെയും തകര്‍ത്തുവെന്നും ആരോപിച്ചായിരുന്നു പരാതി.
പരാതിക്കാരന്റെ അമ്മ ഹിമാനി അശോക് സവര്‍ക്കര്‍, മഹാത്മാഗാന്ധിയെ കൊലപ്പെടുത്തിയ നാഥുറാം ഗോഡ്സെയുടെ ഇളയ സഹോദരന്‍ ഗോപാല്‍ ഗോഡ്സെയുടെ മകളാണ്. പരാതിക്കാരന്‍ ഏതു നിയമ വ്യവസ്ഥ പ്രകാരമാണ് വ്യത്യസ്തവും പരസ്പര വിരുദ്ധവുമായ രണ്ട് 'കുടുംബ വൃക്ഷങ്ങള്‍' സമര്‍പ്പിച്ചതെന്ന് വ്യക്തമാക്കണമെന്ന് ആവശ്യപ്പെട്ട് രാഹുലിന്റെ അഭിഭാഷകന്‍ കോടതിയില്‍ അപേക്ഷ നല്‍കി. രേഖപ്പെടുത്തിയിരിക്കുന്ന രണ്ടാമത്തെ കുടുംബ വൃക്ഷത്തില്‍ തന്റെ അമ്മ ഹിമാനിയുടെ പേര് ഒഴിവാക്കിയതിന്റെ കാരണം വ്യക്തമാക്കാന്‍ പരാതിക്കാരനോട് നിര്‍ദേശിക്കണമെന്നും പവാര്‍ കോടതിയോട് അഭ്യര്‍ഥിച്ചു.
ജൂലൈ 29ന് നടക്കുന്ന അടുത്ത വാദം കേള്‍ക്കലില്‍ രാഹുല്‍ ഗാന്ധിയുടെ അഭിഭാഷകന്‍ ആവശ്യപ്പെട്ട വിശദീകരണത്തില്‍ അഭിപ്രായം രേഖപ്പെടുത്താന്‍ കോടതി സത്യകിയുടെ അഭിഭാഷകന്‍ കോല്‍ഹത്കറിനോട് ആവശ്യപ്പെട്ടു.