ബോളിവുഡ് നടനും നിര്‍മാതാവുമായ ധീരജ് കുമാര്‍ അന്തരിച്ചു; അന്ത്യം ന്യുമോണിയ ബാധിച്ച് ചികിത്സയില്‍ കഴിയവെ
മുംബൈ: മുതിര്‍ന്ന ബോളിവുഡ് നടനും നിര്‍മാതാവുമായ ധീരജ്കുമാര്‍(80) അന്തരിച്ചു. ന്യുമോണിയ ബാധിച്ച് ചികിത്സയിലായിരുന്നു. ശ്വാസതടസം നേരിട്ടതിനെ തുടര്‍ന്ന് ഞായറാഴ്ച മുംബൈയിലെ കോകിലബെന്‍ ധീരുഭായ് അംബാനി ആശുപത്രിയില്‍ പ്രവേശിപിക്കുകയായിരുന്നു. 1997 മുതല്‍ 2001 വരെ ഡി.ഡി നാഷനലില്‍ സംപ്രേഷണം ചെയ്ത ഓം നമ ശിവായ എന്ന ടി.വി ഷോ അദ്ദേഹം സംവിധാനം ചെയ്തിരുന്നു.
1965ല്‍ തന്റെ കരിയര്‍ ആരംഭിച്ച ധീരജ്കുമാര്‍ സിനിമയിലും ടിവി വ്യവസായത്തിലും അറിയപ്പെടുന്ന ഒരു പേരായിരുന്നു. സുഭാഷ് ഘായ്, രാജേഷ് ഖന്ന എന്നിവര്‍ക്കൊപ്പം ഒരു ടാലന്റ് ഷോയുടെ ഫൈനലിസ്റ്റുകളില്‍ ഒരാളായിരുന്നു അദ്ദേഹം. പരസ്യങ്ങളില്‍ മോഡലായി അഭിനയിച്ചുകൊണ്ടാണ് അദ്ദേഹം തന്റെ അഭിനയ ജീവിതത്തിന് തുടക്കം കുറിക്കുന്നത്. വിക്‌സ് ആക്ഷന്‍ 500 ഉള്‍പ്പെടെയുള്ള പരസ്യങ്ങളില്‍ അദ്ദേഹം അഭിനയിച്ചിട്ടുണ്ട്. 1970 നും 1984 നും ഇടയില്‍ അദ്ദേഹം 21 പഞ്ചാബി സിനിമകളില്‍ അഭിനയിച്ചിട്ടുണ്ട്.
1970ല്‍ പുറത്തിറങ്ങിയ 'റാത്തോണ്‍ കാ രാജ' എന്ന ചിത്രത്തിലൂടെയാണ് ധീരജ് കുമാര്‍ ബോളിവുഡില്‍ അരങ്ങേറ്റം കുറിച്ചത്. പിന്നീട് ക്രിയേറ്റീവ് ഐ എന്ന പേരില്‍ നിര്‍മാണ കമ്പനി ആരംഭിച്ചു.1977 ല്‍ പുറത്തിറങ്ങിയ അദ്ദേഹത്തിന്റെ സ്വാമി എന്ന ചിത്രത്തിലെ 'കാ കരൂന്‍ സജ്‌നി, ആയേ ന ബാലമ്' എന്ന യേശുദാസ് ആലപിച്ച ഗാനം വളരെ ശ്രദ്ധേയമാണ്. ഹീര പന്ന, ശ്രീമാന്‍ ശ്രീമതി തുടങ്ങിയ മറ്റ് ചിത്രങ്ങളിലും അദ്ദേഹം പ്രവര്‍ത്തിച്ചിട്ടുണ്ട്.