ഇറാനിലേക്ക് അടിയന്തരമായ യാത്രകളൊഴിച്ച് മറ്റെല്ലാ യാത്രകളും മാറ്റിവയ്ക്കണം; മുന്നറിയിപ്പുമായി എംബസി
ടെഹ്റാന്‍: ഇറാനിലേക്ക് യാത്ര ചെയ്യാന്‍ ഉദ്ദേശിക്കുന്ന ഇന്ത്യക്കാര്‍ക്ക് മുന്നറിയിപ്പുമായി ഇറാനിലെ ഇന്ത്യന്‍ എംബസി. അടിയന്തരമായ യാത്രകളൊഴിച്ച് മറ്റെല്ലാ യാത്രകളും മാറ്റിവയ്ക്കണമെന്നാണ് ഇന്ത്യന്‍ എംബസിയുടെ നിര്‍ദേശം. ഇറാന്റെ വിവിധ മേഖലകളില്‍ സുരക്ഷയുമായി ബന്ധപ്പെട്ട ആശങ്കള്‍ നിലനില്‍ക്കുന്ന സാഹചര്യത്തിലാണ് എംബസിയുടെ ഈ നിര്‍ദ്ദേശം.
ഇറാനിലെ സംഭവ വികാസങ്ങള്‍ ജനങ്ങള്‍ നിരീക്ഷിക്കണമെന്നും എംബസി പറഞ്ഞു. നിലവില്‍ ഇറാനിലുള്ള പൗരന്മാര്‍ക്ക് ഇന്ത്യയിലേക്ക് തിരികെ പോകാന്‍ ആഗ്രഹിക്കുന്നുവെങ്കില്‍ വിമാനസര്‍വീസുകള്‍ ലഭ്യമാണെന്നും ഇതു പ്രയോജനപ്പെടുത്താമെന്നും എംബസി അറിയിച്ചു. ഇറാന്‍- ഇസ്രയേല്‍ സംഘര്‍ഷത്തെ തുടര്‍ന്ന് ഇറാനില്‍ സുരക്ഷാ പ്രശ്നങ്ങള്‍ നിലനില്‍ക്കുന്നതിനാലാണ് ഇത്തരമൊരു മുന്നറിയിപ്പെന്നും എംബസി വ്യക്തമാക്കി.
സംഘര്‍ഷങ്ങളുടെ പശ്ചാത്തലത്തില്‍ ഇറാനില്‍ നിന്നുള്ള ഇന്ത്യക്കാരെ നേരത്തെ തന്നെ രാജ്യത്തേക്ക് തിരിച്ചു കൊണ്ട് വന്നിരുന്നു. 'ഓപ്പറേഷന്‍ സിന്ധു ' എന്ന പേരില്‍ നടത്തിയ രക്ഷാപ്രവര്‍ത്തനത്തില്‍ 4,400ല്‍ അധികം ഇന്ത്യക്കാരെ നാട്ടിലെത്തിക്കാന്‍ കഴിഞ്ഞതായി ആണ് കണക്ക്. സംഘര്‍ഷങ്ങള്‍ അവസാനിച്ചു എന്ന് കരുതി പല ഇന്ത്യക്കാരും തിരിച്ചെത്താന്‍ ശ്രമം ആരംഭിച്ചിട്ടുണ്ട്. അതിന്റെ പശ്ചാത്തലത്തിലാണ് മുന്നറിയിപ്പുമായി എംബസി രംഗത്ത് എത്തിയത്.