ദമ്പതികളെ പാടത്ത് മരിച്ച നിലയില്‍ കണ്ടെത്തി; ഇരുവരുടേയും ശരീരത്ത് കുത്തിവെച്ച പാടുകള്‍: അന്വേഷണം ആരംഭിച്ച് പോലിസ്
ദമ്പതികളെ പാടത്ത് മരിച്ച നിലയില്‍ കണ്ടെത്തി
By : സ്വന്തം ലേഖകൻ
Update: 2025-07-31 02:15 GMT
ലക്നൗ: പാടത്ത് പണിക്കു പോയ ദമ്പതികളെ മരിച്ച നിലയില്‍ കണ്ടെത്തി. ഉത്തര്‍പ്രദേശിലെ പുര്‍ണിയ ഗ്രാമത്തിലാണ് സംഭവം. ബിജ്നൂര്‍ പാടത്ത് ജോലിക്കു പോയ പര്‍വേന്ദ്ര (35), ഭാര്യ ഗീത (32) എന്നിവരെയാണ് മരിച്ച നിലയില്‍ കണ്ടെത്തിയതെന്ന് നൂര്‍പൂര്‍ പൊലീസ് സ്റ്റേഷന്‍ ഇന്‍ചാര്‍ജ് ജയ് ഭഗവാന്‍ സിങ് അറിയിച്ചു. ഇരുവരുടെയും ശരീരത്തില്‍ കുത്തിവയ്പ് നടത്തിയ പാടുകള്‍ കണ്ടെത്തി.
ജോലിക്കു ശേഷം ഇരുവരും മടങ്ങി വരാത്തതിനെ തുടര്‍ന്ന് ബന്ധുക്കള്‍ നടത്തിയ തിരച്ചിലിലാണ് മൃതദേഹങ്ങള്‍ കണ്ടെത്തിയത്. ഒരു വൈക്കോല്‍ കൂനയുടെ സമീപം കിടക്കുന്ന നിലയിലായിരുന്നു പര്‍വേന്ദ്ര. ഗീതയുടെ മൃതദേഹം കുറച്ചകലെ കിടക്കുന്ന നിലയിലായിരുന്നു. സംഭവത്തില്‍ അന്വേഷണം ആരംഭിച്ചെന്നും പോസ്റ്റുമോര്‍ട്ടത്തിനു ശേഷമേ മരണം സംബന്ധിച്ച് കൂടുതല്‍ വ്യക്തത ലഭിക്കുവെന്നും ജയ് ഭഗവാന്‍ സിങ് പറഞ്ഞു.